ۇلتتىق ۇلاننىڭ 5514 اسكەري بولىمىنە بارعانىمىزدا اعا سەرجانت ءبىرجان نۇرىمعاليەۆتىڭ جۇمىسىمەن جاقىنىراق تانىستىق. سىرتقى ۇقىپتىلىق پەن ىشكى جيناقىلىق قاتار بايقالعان جاس كوماندير سوزگە ساراڭداۋ كورىنگەنىمەن, وزىمەن اڭگىمەلەسە كەلە سۇيىكتى ىسىنە بەرىلگەن مامان ەكەنىن بايقادىق.
ءبىرجان تالدىقورعان قالاسىنىڭ تۋماسى, اكەسى قۇقىق قورعاۋ ورگاندارىندا كوپ جىل جۇمىس ىستەگەن ازامات. بۇگىنگى تاڭدا قۇرمەتتى ەڭبەك دەمالىسىنا شىقتى. سوندىقتان «بولاشاقتا قانداي ماماندىق يەسى اتانامىن, كىم بولامىن؟» دەيتىن سۇراقتار تۋىندامايتىن. مەكتەپتى اياقتاعاننان كەيىن وتان الدىنداعى بورىشىن وتەۋ ءۇشىن وسكەمەن قالاسىنداعى ۇلتتىق ۇلاننىڭ اسكەري بولىمىنە بارعان. سول جەردە ازاماتتىق پارىزىن وتەگەن سوڭ, تۋعان جەرىنە ورالىپ, اكەسىنىڭ اق باتاسىمەن قۇقىقتىق ءتارتىپ اسكەرىنىڭ 5514 اسكەري بولىمىنە قۇجاتتارىن تاپسىرادى.
«وسىدان سەگىز جىل بۇرىن ءوز ماماندىعىمدى تاڭداعاندا وتان الدىنداعى جاۋاپكەرشىلىگىمدى سەزىندىم. مۇندا ەشكىم تەگىن كيىم, تەگىن تاماقتانۋ, وڭاي جالاقى ءۇشىن كەلمەۋى كەرەك. مۇندا كەز كەلگەن ازامات ەل الدىنداعى جاۋاپكەرشىلىگىن سەزىنىپ كەلگەنى ءجون. سوندا تاعدىردىڭ تالايىنا ءتوزىپ, قيىنشىلىعىنا توسەلەسىڭ. اسكەري قىزمەتتە وڭاي بولمايتىنىن ءبىلدىم. ءوز تاعدىرىمدى تاڭدادىم. بۇگىندە تاڭداۋىما وكىنبەيمىن», دەيدى ول.
ءبىرجان سارباز كەزىندەگى ستارشيناسى مەن ۆزۆود سەرجانتىنا ايتار العىسى مول. ولار ءبىر جىل بويى ساربازدار ءۇشىن جاقىندارىن الماستىردى. ولار ءۇشىن جاۋاپكەرشىلىكتى الىپ, قامقورلىعىن تانىتتى. سونداي-اق روتا كومانديرى بولعان بۇگىندە 5514 اسكەري ءبولىمى كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, پودپولكوۆنيك نۇرسۇلتان تولەگەنگە دە ايتار العىسى زور.
«اسكەري ءبولىم كومانديرىنىڭ ورىنباسارى بولىپ پودپولكوۆنيك نۇرسۇلتان تولەگەن كەلگەندە ىشتەي قۋانعانىمدى جاسىرمايمىن. ول وفيتسەر مەنىڭ روتا كومانديرىم بولدى. ءبىر جىل بويى ونىڭ قولاستىندا قىزمەت اتقاردىم. مەنى دە بىردەن تانىدى. بۇگىندە اسكەري بولىمدەگى وڭ وزگەرىستەر دە ءبولىمنىڭ باس تاربيەشىسىنە بايلانىستى. سونىمەن قاتار ءوزىمنىڭ ستارشينام مەن ۆزۆود سەرجانتى, بولىمشە كومانديرلەرىنە ايتار العىسىم كوپ. ولار مەنى جاۋىنگەر ەتىپ تاربيەلەدى. مەن دە العان ءبىلىمىم مەن تاجىريبەمدى قىزمەتىمدە قولدانىپ كەلەمىن. جاۋىنگەرلىك دايىندىقتىڭ جوعارى بولۋىنا ۇلەسىمدى قوسامىن. ساربازداردىڭ شيراق بولۋىنا, شىمىر بولۋىنا مەن ءبىر ادامداي ۇلەس قوسىپ جاتقانىما ىشتەي ريزامىن», دەپ اعىنان جارىلدى اعا سەرجانت ب.نۇرىمعاليەۆ.
ءبىرجان ەرلان ۇلى – ىسىنە مىعىم, سوزىنە ساق ازامات. ءار ءسوزى قورعاسىنداي سالماقتى. اكەسىنەن بەرى جالعاسىپ كەلە جاتقان ءتالىمى مەن ءوزىنىڭ تۋا بىتكەن جاۋاپكەرشىلىگى ونى توپتىڭ ىشىنەن الىپ شىعىپ, ۇزدىكتەردىڭ قاتارىنا قوستى. ول تۋرالى جوعارىدا سوزگە قوسقان 5514 اسكەري ءبولىمى كومانديرىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى, پودپولكوۆنيك نۇرسۇلتان تولەگەن: «ۇزدىك سەرجانت بولۋ ءۇشىن الدىمەن تاربيەلى ازامات بولعان ءجون. سونىمەن قوسا, اسكەري قىزمەت اتقارۋ بارىسىندا دا بولاشاق اسكەري مامان بىلىنەدى. ءبىرجان ەرلان ۇلىن سارباز كەزىنەن بىلەمىن. سول كەزدىڭ وزىندە سەرتكە بەرىك سارباز بولاتىن. بۇگىندە ءومىرىن ۇلتتىق ۇلانمەن بايلانىستىرىپ, 5514 اسكەري بولىمىنە كەلگەنىن قۇپ كوردىم. ءبىزدىڭ ورتامىزدا ۇزدىكتەر كوپ بولسا, قىزمەتىمىزدىڭ بارلىق سالاسى العا باسادى», دەدى.
ەلىمىز قاشان بولسىن ەرلەرگە سەنىم ارتاتىنى بەلگىلى. تەك اسكەري انتىنا بەرىك ءبىرجان سەكىلدى ازاماتتار جەكە قۇرامدى ەرلىككە باستاپ, ەلگە قورعان بولا بىلمەك.
دارىن سەيىتوۆ,
اسكەري جۋرناليست