جۋىردا «اتامەكەن» ۇكپ توراعاسىنىڭ ورىنباسارى تيمۋر ناقىپبەكوۆ «حيمفارم» اق-عا بارعان ءىس-ساپارى بارىسىندا رەسپۋبليكانىڭ ءۇشىنشى قالاسىندا مەديكو-فارماتسەۆتيكالىق كلاستەر قولعا الىناتىنىن مالىمدەدى. جانە مۇنداي قادامنىڭ وتاندىق فارماتسەۆتيكا سالاسى ءۇشىن ماڭىزدى وقيعا ەكەنىن اتاپ ءوتتى.
ياعني شىمكەنتتە دارىلىك نىسانداردى ازىرلەۋمەن, ولاردى ونەركاسىپتىك وندىرىسكە ەنگىزۋمەن, ەكستراكتسيالاۋ تەحنولوگيالارىن, ساپانى باقىلاۋ, ستاندارتتاۋ ادىستەمەلەرىن قولدانۋمەن اينالىساتىن يننوۆاتسيالىق كومپانيالار توبىنان مەديتسينالىق-فارماتسەۆتيكالىق جاڭا كلاستەر پايدا بولادى.
مەملەكەت باسشىسى 2025 جىلعا قاراي فارماتسەۆتيكا ونەركاسىبىندەگى وتاندىق ءوندىرىستىڭ ۇلەسىن 50 پايىزعا دەيىن ۇلعايتۋ تۋرالى تاپسىرما بەرگەن-ءدى. وسىعان بايلانىستى استانا, شىمكەنت جانە اقتوبە قالالارىندا ءۇش مەديكو-فارماتسەۆتيكالىق كلاستەر قۇرۋ جوسپارلانعان. بۇل ءوز كەزەگىندە يمپورتقا تاۋەلدىلىكتى ەداۋىر قىسقارتىپ, ەلىمىزدە ۇلتتىق دارىلىك قاۋىپسىزدىكتى قامتاماسىز ەتەدى.
شىمكەنت قالاسىنىڭ مەديتسينا مەن دارىلىك پرەپاراتتار ءوندىرىسىنىڭ كلاستەرلىگىنە تاڭدالىپ الىنۋىنىڭ باستى سەبەبى مۇندا وندىرىستىك الاڭدار, مەديتسينالىق جانە فارماتسەۆتيكالىق جوعارى وقۋ ورىندارى مەن قاۋىمداستىقتار شوعىرلانعان.
«وڭىردە تولىق تسيكلدى فارمكلاستەر تابىستى جۇمىس ىستەپ جاتقانى بەلگىلى, سوندىقتان شىمكەنتتە مەديكو-فارماتسەۆتيكالىق كلاستەردى دامىتۋ ءۇشىن ماڭىزدى ارتىقشىلىقتار بار. ولاردىڭ قاتارىنا بىلىكتى كادرلاردى دايارلاۋ جۇيەسىن, وتكىزۋ بويىنشا سەرىكتەستەردى, سەرۆيستىك جانە ينفراقۇرىلىمدىق قولداۋدى جاتقىزۋعا بولادى. 2020 جىلعى پاندەميادا قيىن جاعدايدى باستان وتكەردىك. سوندا دەنساۋلىق ماسەلەسىنە, ءدارى-دارمەك قاۋىپسىزدىگىنە ءار مەملەكەت ءوزى جاۋاپتى ەكەنىن تۇسىندىك. سوندىقتان وتاندىق فارماتسەۆتيكا ونەركاسىبىن دامىتۋ ەلدىڭ ۇلتتىق قاۋىپسىزدىگىنە پارا-پار» دەدى ءىس-شاراعا ونلاين قوسىلعان دەنساۋلىق ساقتاۋ مينيسترلىگى مەديتسينالىق جانە فارماتسەۆتيكالىق باقىلاۋ كوميتەتىنىڭ توراعاسىنىڭ مىندەتىن اتقارۋشى لاۋررا احمەتنياز.
سونداي-اق ت.ناقىپبەكوۆ ۇلتتىق پالاتا دەنساۋلىق ساقتاۋ مينيسترلىگىمەن, باسەكەلەستىكتى قورعاۋ جانە دامىتۋ اگەنتتىگىمەن بىرلەسىپ ارتىق كەدەرگىلەردى ازايتۋ مەن فارماتسەۆتيكالىق قوعامداستىقتىڭ پروبلەمالىق ماسەلەلەرىن شەشۋ بويىنشا تۇراقتى جۇمىس جۇرگىزىپ جاتقانىن جەتكىزدى. بۇدان وزگە مەديكو-فارماتسەۆتيكالىق كلاستەردى قۇرۋ دارىلىك زاتتار مەن مەديتسينالىق بۇيىمدار ءوندىرىسىن دامىتۋدى جەدەلدەتۋگە, ەلىمىزدىڭ يمپورتتالاتىن فارماتسەۆتيكالىق ونىمگە دەگەن تاۋەلدىلىكتى ازايتۋعا مۇمكىندىك بەرەتىنىنە توقتالدى.
ءوز كەزەگىندە «وڭتۇستىك قازاقستاننىڭ فارماتسەۆتيكالىق كلاستەرى» قاۋىمداستىعىنىڭ پرەزيدەنتى, پروفەسسور بەكايدار نۇرماشەۆ مەديكو-فارماتسەۆتيكالىق كلاستەردىڭ تانىستىرىلىمىن ۇسىندى.
ونىڭ ايتۋىنشا, جوبانى ىسكە اسىرۋعا وڭتۇستىك قازاقستان مەديتسينا اكادەمياسى, «ەكوفارم-ينتەرنەيشنل» جشس, «زەردە» كومپانيالار توبى جانە«حيمفارم» اق قاتىساتىن بولادى. دارىلىك زاتتارعا كلينيكالىق زەرتتەۋلەر قالالىق №2 كوپبەيىندى اۋرۋحاناسى مەن «جۇرەك ورتالىعى» بازاسىندا جۇرگىزىلەدى.
عىلىمي جانە ادىستەمەلىك سۇيەمەلدەۋدى كلينيكالىق زەرتتەۋلەر بويىنشا گرانتتىق عىلىمي جوبالاردى وقما سياقتى كلينيكالىق كافەدرالار قامتاماسىز ەتەدى. سونىمەن قاتار الداعى ۋاقىتتا ەڭ ءىرى كوپسالالى ۋنيۆەرسيتەتتىك كلينيكانىڭ قۇرىلىسى سالىنادى.
اتالعان ءىس-شارا بارىسىندا «شىمكەنت» مەديكو-فارماتسەۆتيكالىق كلاستەرىن قۇرۋ شەڭبەرىندە وڭتۇستىككورەيالىق ۆوندجۋ مەديتسينا ونەركاسىبىنىڭ تەحنودولينىمەن ((WMIT) ىنتىماقتاستىق تۋرالى مەموراندۋمعا قول قويىلدى.
مامانداردىڭ پىكىرىنشە, بۇل ءوڭىردىڭ ءوندىرىسى مەن عىلىمي الەۋەتىن دامىتۋعا مۇمكىندىك بەرەدى. سونداي-اق وڭىرلىك فارماتسەۆتيكا سالاسىنا جانە وتاندىق ءونىم وندىرىسىنە ينۆەستيتسيالار تارتۋ ءۇشىن فارميندۋستريا كاسىپورىندارىنىڭ بارلىق كۇش-جىگەرى ءبىر ارناعا توعىسادى.
ايتا كەتۋ كەرەك مەديتسينالىق-فارماتسەۆتيكالىق كلاستەر – بۇل ءبىر-ءبىرىن تولىقتىراتىن جانە جەكەلەگەن كومپانيالار مەن تۇتاستاي كلاستەردىڭ باسەكەلەستىك ارتىقشىلىقتارىن كۇشەيتەتىن عىلىمي-زەرتتەۋ ينستيتۋتتارى, جوعارى وقۋ ورىندارى, تەحنوپاركتەر, بيزنەس-ينكۋباتورلار جانە باسقا دا ۇيىمدار.
جالپى, مەگاپوليستە بۇكىل ەلىمىز بويىنشا شىعارىلاتىن فارماتسەۆتيكالىق پرەپاراتتاردىڭ جارتىسىنا جۋىعى وندىرىلەدى. ناقتى مالىمەتكە سۇيەنسەك جىلىنا 115 ملن دوللاردىڭ ءونىمى شىعارىلادى. سونىمەن قاتار مەديتسينالىق ماقساتتاعى بۇيىمدار ءوندىرىسى جولعا قويىلعان. وعان ينە, قان سىناماسىن الاتىن قۇتى, ورتوپەديالىق بينت, بەلسەندىرىلگەن بيو قوسپا سەكىلدى ونىمدەر جاتادى. ياعني شىمشاھاردا بۇگىنگى كۇننىڭ وزىندە دارىلىك پرەپاراتتار مەن مەديتسينالىق كەرەكتى زاتتار ءوندىرىسىن جانە قاجەتتى ماماندار دايارلايتىن جوعارى مەديتسينالىق جانە فارماتسەۆتيكالىق وقۋ وردالارىنىڭ باسىن قوسقان وزىندىك ءبىر كلاستەرى بار ەدى دەسەك قاتەلەسپەيمىز. بۇعان قوسا قىتايلىق ينۆەستورلارمەن بىرلەسكەن سىيىمدىلىعى مىڭ توسەك-ورىندى قۇرايتىن ۋنيۆەرسيتەتتىك كلينيكا قۇرىلىسى باستالدى.
ال «حيمفارم» اق زاۋىتىنا ەكىنشى مارتە دەم بەرگەن SANTO – ورتالىق ازيا ەلدەرىندە دارىلىك زاتتاردىڭ جەتەكشى ءوندىرۋشىسى جانە Polpharma حالىقارالىق فارماتسەۆتيكالىق توبىنىڭ ءبىر مۇشەسى. كومپانيا دەنساۋلىق ساقتاۋ جۇيەسى كوپ سۇرانىسقا يە ءتۇرلى فورمالار مەن مولشەرلەردەگى دارىلىك زاتتاردىڭ قازىرگى زامانعى جوعارى تەحنولوگيالىق وندىرىسىنە يە. كومپانيانىڭ باسىمدىعى ۇلتتىق جانە حالىقارالىق GMP ساپا ستاندارتتارىن بارلىق قىزمەتكەردىڭ مۇلتىكسىز ورىنداۋى جانە وعان پروتسەستەردىڭ تولىق سايكەس كەلۋى ەسەبىنەن قامتاماسىز ەتىلەتىن پرەپاراتتاردىڭ تيىمدىلىگى مەن قاۋىپسىزدىگى بولىپ تابىلادى. بۇل SANTO كومپانياسىن ەڭ تانىمال جانە سەنىمدى سەرىكەستەردىڭ ءبىرى ەتۋگە ىقپال ەتەدى.