UEFA نۇسقاسى بويىنشا فۋتبولدان قازاقستان ۇلتتىق قۇراماسىنىڭ كاپيتانى اسحات تاعىبەرگەننىڭ دانيا قاقپاسىنا سوققان گولى ەۋرو-2024 ىرىكتەۋ كەزەڭىنىڭ ەكىنشى تۋرىندا سوعىلعان ەڭ ۇزدىك گول دەپ تانىلدى.
26 ناۋرىزدا قازاقستان قۇراماسى 2024 جىلعى ەۋروپا چەمپيوناتىنىڭ ىرىكتەۋ كەزەڭى اياسىندا ەلورداداعى «استانا ارەنا» ستاديونىندا الەمنىڭ ەڭ ۇزدىك قۇرامالارىنىڭ ءبىرى دانيا فۋتبولشىلارىن قابىلداپ, 3:2 ەسەبىمەن «دات ءديناميتىن» تىزە بۇكتىرگەن بولاتىن. سول ماتچتىڭ 86-مينۋتىندا اسحات تاعىبەرگەننىڭ الىستان قاقىراتا تەپكەن دوبى كاسپەر شمەيحەلدىڭ قاقپاسىنان تابىلىپ, تارازى باسىن تەڭەستىرگەن-ءدى.
وتانداسىمىزدىڭ بۇل گولى الەۋمەتتىك جەلىدە كەڭىنەن تالقىلانىپ, 2024 جىلعى ەۋروپا چەمپيوناتىنىڭ رەسمي سايتى ۇيىمداستىرعان ساۋالدامادا تۋردىڭ ەڭ ۇزدىك گولى دەپ تانىلدى. ەكىنشى ورىنعا انگليا قۇراماسىنىڭ ويىنشىسى بۋكايو ساكانىڭ ۋكراينا قاقپاسىنا سوققان گولى يە بولسا, ۇزدىك ۇشتىكتى بەلارۋس فۋتبولشىسى ۆلاديسلاۆ موروزوۆتىڭ رۋمىنيا قۇراماسىنىڭ قاقپاسىن ءدال كوزدەگەن گولى تۇيىندەدى.