فينالدا جەڭىلدى

جالپى, ەلەنا رىباكينا ءۇشىن بيىلعى تەننيس ماۋسىمى وتە ءساتتى ءوتىپ جاتىر دەپ ايتا الامىز. وتانداسىمىز كەيىنگى ءۇش ايدا وسىمەن ءۇشىنشى مارتە حالىقارالىق تۋرنيرلەردىڭ فينالدىق كەزەڭىندە باق سىنادى. قاڭتار ايىندا «ۇلكەن دۋلىعا» ساناتىنداعى ەڭ ماڭىزدى ءتورت جارىستىڭ العاشقىسى – اۋستراليا اشىق چەمپيوناتىنىڭ فينالىندا ويناسا, ناۋرىز ايىندا ينديان-ۋەللستەگى «BNP Paribas Open» (WTA 1000) تۋرنيرىندە توپ جاردى. ءبىر قىزىعى, رىباكينا «جاسىل قۇرلىقتاعى» ءتۋرنيردىڭ فينالىندا بەلارۋس ماقتانىشى, الەمنىڭ ەكىنشى راكەتكاسى ارينا سوبولەنكوعا ەسە جىبەرگەن بولسا, ينديان-ۋەللستەگى فينالدا ءدال سول ارينادان ەسە قايتارعان بولاتىن. ەندى, مىنە, قازاقستان تەننيس­شىسى بيىلعى ماۋسىمداعى ءۇشىنشى فينالىندا ونەر كورسەتتى.

وكىنىشكە قاراي, وتانداسىمىزعا اقش-تا قاتارىنان ەكى تۋرنيردە جەڭىس تۇعىرىنان كورىنگەن الەمدەگى ءتورت تەننيسشىنىڭ قاتارىنا قوسىلۋ باقىتى بۇيىرمادى. اتاپ ايتار بولساق, بۇگىنگە دەيىن ينديان-ۋەللس پەن ماياميدەگى تۋرنيردە گەرمانيالىق شتەففي گراف (1994, 1996), بەلگيالىق كيم كليس­تەرس (2005), بەلارۋس وكىلى ۆيك­توريا ازارەنكو (2016) جانە پول­شالىق يگا شۆيونتەك (2022) توپ جارعان.

ماياميدەگى تۋرنيردە كىل مىقتى تەننيسشىلەردى جارىس جولىنان ىعىستىرعان ەلەنا رىباكينا فينالدا الەمنىڭ 12-راكەتكاسى, جوعارىدا ايتىپ وتكەنىمىزدەي ۋيمبلدوننىڭ ەكى دۇركىن جەڭىمپازى, 2019 جىلعى اۋستراليا اشىق بىرىنشىلىگىنىڭ ءفيناليسى پەترا كۆيتوۆادان ايلاسىن اسىرا المادى.

ۋيمبلدون ءتۋرنيرىنىڭ ەكى جەڭىمپازى اراسىندا وتكەن فينالدىق باسەكەنىڭ ءبىرىنشى پارتياسى ءبىر ساعاتتان اسا ۋاقىتقا سوزىلىپ, ەكى تەننيسشى دە جەڭىس ءۇشىن ايانىپ قالعان جوق. دوپتى ويىنعا قوسۋ ساتىندە قارسىلاستار اسا ساق ويناپ, قاتەلىك جاساماۋعا تىرىستى. توعىزىنشى گەيمگە كەلگەندە ءبىرىنشى بولىپ رىباكينا قاتەلىك جاساپ, دوپتى ءوزى ويىنعا قوسقان گەيمدە قارسىلاسىنا برەيك جاساۋعا مۇمكىندىك بەرىپ قويدى – 4:5. بىراق كەلەسى گەيمدە ەلەنانىڭ ءوزى دە قايىرا برەيك جاساپ, تارازى باسىن تەڭەستىرىپ ۇلگەردى – 5:5. كەيىنگى ەكى گەيمدە ەكى تەننيسشى دە ساۋاتتى ويىنىمەن كوزگە ءتۇسىپ, ءبىر-ءبىرىن العا جىبەرگەن جوق – 6:6. ءسويتىپ, ءبىرىنشى پارتيانىڭ جەڭىمپازى تاي-برەيكتە انىقتالدى. بۇل كەزەڭدە پسيحولوگيالىق تۇرعىدا سەنىمدى كورىنگەن چەحيالىق تەننيسشىنىڭ باعى جاندى – 7:6 (16:14).

ءبىرىنشى سەتتە قارسىلاسىنا جول بەرىپ قويعان سوڭ وتانداسىمىز ەكىنشى كەزەڭدە ەڭسە تىكتەپ ۇلگەرە المادى. بۇل پارتيادا العاشقى گەيمدى ءوز پايداسىنا جازعان كۆيتوۆا ەكىنشى گەيمدە برەيك جاسادى. كەيىن ءوزى دوپتى ويىنعا قوسقان ءۇشىنشى گەيمدە دە قاتەلەسكەن جوق – 3:0. ءسويتىپ, سەگىزىنشى گەيمگە كەلگەندە پەترا تاعى ءبىر برەيك جاساپ, سەتتى دە, ماتچتى دا ءوز پايداسىنا اياقتادى – 6:2. وسىلايشا, 33 جاستاعى كۆيتوۆا ءوزىنىڭ سپورتتىق عۇمىرىنداعى 30-شى جەڭىسىنە قول جەتكىزدى. ايتا كەتەيىك, قارسىلاستار وسىعان دەيىن ەكى مارتە كەزدەسىپ, ءبىر-بىردەن جەڭىسكە جەتكەن ەدى. بۇل جەڭىستەن كەيىن پەترا 2:1 ەسەبىمەن العا شىعىپ الدى.

ەلەنا رىباكينا مايامي WTA 1000 ءتۋرنيرى بارىسىندا 70-كە جۋىق ەيس جاساپ, تەننيس تاريحىندا رەكورد ورناتتى. اتاپ ايتقاندا, رىباكينا رەسەيلىك اننا كالينسكايامەن ويىندا – 14, يسپانيالىق پاۋلا بادوسامەن باسەكەدە – 12, بەلگيالىق ەليزا مەر­تەنس جانە يتاليالىق مارتينا ترەۆيزانمەن وتكەن كەزدەسۋدە 10-10-نان ەيس جاساسا, امەريكالىق دجەسسيكا پەگۋلامەن ماتچتا – 11 جانە پەترا كۆيتوۆامەن فينالدا – 12, بارلىعى 69 ەيسكە قول جەتكىزدى.

مايامي WTA 1000 تۋرنيرىندە ەكىنشى ورىنعا يە بولعان جەرلەسىمىز 662,3 مىڭ اقش دوللارى (301,2 ميلليو­ن تەڭگە) كولەمىندە سىياقىعا يە بولدى. ال WTA 1000 ساناتىنداعى ونىنشى تۋرنيرىندە ۇزدىك شىققان كۆيتوۆا 1,26 ميلليون دوللارمەن (574,08 ميلليون تەڭگە) بىرگە 1 000 رەيتينگتىك ۇپايعا يە بولدى. وسى ناتيجەسىنىڭ ارقاسىندا ول بۇگىننەن باستاپ توپ-10 تەننيسشىنىڭ قاتارىنا قوسىلسا, رىباكينا الەمدىك رەيتينگتەگى 7-ورنىن ساقتاپ قالدى.