كەشەگى ءتۇن مەن بۇگىنگى تاڭ الدىندا اياقتالعان ارگەنتينا – شۆەيتساريا, بەلگيا – اقش قۇرامالارى اراسىنداعى 1/8 فينالدىق ويىندار برازيليادا ءوتىپ جاتقان الەم چەمپيوناتىنىڭ كەلەسى كەزەڭىنە وتكەن ۇجىمداردى تولىق انىقتاپ بەردى. ال مۇنىڭ الدىنداعى ءتۇنى فرانتسيا فۋتبولشىلارى نيگەريا «قىراندارىن» 2:0 ەتىپ ۇتسا, تاڭ ساز بەرە گەرمانيا جاساعى الجير جاماعاتىن قوسىمشا ۋاقىتتا 2:1 ەسەبىمەن تىزە بۇكتىرىپ, مىقتى سەگىزدىكتىڭ قاتارىن تۇگەلدەي تۇسكەن ەدى.
بىردەن ايتىپ قويايىق, ءبىز بۇگىن ءسوز ەتكەلى وتىرعان جۇپتاردا جەڭىمپاز اتانعان فرانتسيا جانە گەرمانيا قۇرامالارى ءۇشىن اتالمىش ماتچتارداعى جەڭىستەر ونشالىقتى وڭايعا سوقپادى. جەڭىلگەن جاقتاردىڭ وزدەرى كەزدەسۋلەردىڭ باسىم بولىگىندە كەيىن ساتتىلىكتى سەرىك ەتكەن قارسىلاستارىنان تىم تومەن بولا قويعان جوق. ايتالىق, نيگەريا كومانداسى, ءتىپتى, كوبىنە-كوپ دوپقا يەلىك ەتىپ, تەرريتوريالىق باسىمدىق الدى. بىراق ولاردىڭ قاقپا الدىندا قاۋىپ تۋدىرۋلارى كەمشىندەۋ بولدى. ولارعا قاراعاندا, فرانتسۋزدار جاعى وتكىرلەۋ جورىقتار جاساپ تۇردى. دەگەنمەن, مۇنداعى ارەكەتتەرى جاتتاندى كورىنگەن سوڭ, قارسىلاستارى ۇدايى شابۋىلدارىنىڭ الدىن وراپ وتىردى. وسىدان كەيىن ديدە دەشام تاكتيكالىق سحەمانى وزگەرتتى. بۇل ءۇشىن كاريم بەنزەمانى شابۋىلدىڭ وتكىر شەبىنە شىعارىپ, انتۋان گريزماندى سول قاناتقا قويدى. ويىننىڭ قىزىپ سالا بەرۋىنە وسى وزگەرىس قاتتى اسەر ەتتى. فرانتسيا قۇراماسىنىڭ جورىقتارى ەندى وكتەم دە وتكىر بولا ءتۇستى. بۇعان قوسا ءىس-قيمىلدىڭ جۇمباقتىعى قارسى الاڭ بەتىندە ناعىز دۇربەلەڭ تۋعىزدى. سونىڭ سالدارىنان پول پوگبا 79-مينۋتتا ەسەپ اشتى. ال كەلەسى گول ويىن اياقتالىپ قالعان شامادا, 92-مينۋتتا سوعىلدى. ونى نيگەريالىق دجوزەف يوبو ءوز قاقپاسىنا ءتۇسىرىپ الدى.
بۇدان كەيىن الاڭعا گەرمانيا جانە الجير قۇرامالارى شىقتى. كەزدەسۋدىڭ نەگىزگى ۋاقىتى 0:0 دەگەن تەڭ ناتيجە اكەلدى. مۇندا دا «نەمىس ماشيناسىنىڭ» پالەندەي ارتىقشىلىعى بايقالمادى. بۇعان الجير فۋتبولشىلارىنىڭ قورعانىستا وتە مۇقيات ويناپ قويا سالماي, وقتا-تەكتە قارسىلاستار قاقپاسىنا قارسى شابۋىل جاساپ تۇرۋى دا دالەل. وسى رەتتە افريكالىقتار بىرنەشە رەت گول سوعاتىن مۇمكىندىكتەردى جىبەرىپ الدى.
نەمىستەر قوسىمشا ويىننىڭ باسىندا-اق گول سالىپ, بىردەن العا شىقتى. الدىمەن سول قاپتالدان توماس ميۋللەر سۋىرىلىپ ءوتتى. بۇدان ءارى ول دوپتى رايس مبولي قاقپاسى الاڭىنا كولبەۋلەتە جونەلتتى. وعان وزگەلەردەن بۇرىن جەتكەن اندرە شيۋررلە 93-مينۋتتا كوز ىلەسپەس جىلدامدىقپەن قيمىلداپ, دوپتى قاقپانىڭ وڭ جاق قاپتالىنا وكشەسىمەن سارت ەتكىزدى. ەسەپ – 1:0.
وۆەرتايمنىڭ سوڭىندا تالاس ءتىپتى قىزا ءتۇستى. سول دۇربەلەڭدە گەرمانيا قۇراماسى بىرنەشە رەت گول سوعىپ كەتە جازدادى. «بۋندەستيم» سونىڭ ءبىرىن عانا 120-مينۋتتا گولعا اينالدىردى. ونى مەسۋت ءوزيل سالدى. بىراق سونىڭ ارتىنشا, 121-مينۋتتا الجيرلىكتەر ءبىر دوپتىڭ قارىمتاسىن قايتارىپ ۇلگەردى. يسلام ءسليمانيدىڭ پاسىنان كەيىن ابدەلمۋمەن دجابۋ سوڭعى نۇكتەنى قويدى. ماتچ وسىلايشا 2:1 بولىپ ءبىتتى.
ەندى 4 شىلدە كۇنى فرانتسيا مەن گەرمانيا شيرەك فينالدا كۇش سىناسادى.
رۋسلان يگىلىك.
P.S. نومىرگە قول قويىلىپ جاتقاندا ارگەنتينا جانە شۆەيتساريا قۇرامالارى اراسىنداعى ويىننىڭ ءناتيجەسى بەلگىلى بولدى. قارسىلاستارىمەن نەگىزگى ۋاقىتتا 0:0 ەسەبىمەن تەڭ ويناعان ارگەنتينالىقتار وۆەرتايمنىڭ سوڭىندا انحەل دي ماريا سوققان گول ارقىلى جەڭىسكە جەتتى.