نيۋ-دەليدە شانحاي ىنتىماقتاستىق ۇيىمىنا مۇشە مەملەكەتتەردىڭ قاۋىپسىزدىك كەڭەسى حاتشىلارىنىڭ ون سەگىزىنشى كەزدەسۋى ءوتتى. جيىنعا قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى عيزات نۇرداۋلەتوۆ قاتىستى.
ءىس-شارا بارىسىندا شىۇ كەڭىستىگىندەگى قاۋىپسىزدىك پەن تۇراقتىلىقتى قامتاماسىز ەتۋ سالاسىنداعى احۋالعا قاتىستى بىرقاتار ماسەلە تالقىلاندى.
تاراپتار حالىقارالىق جانە ايماقتىق كۇن تارتىبىندەگى وزەكتى ماسەلەلەر, اتاپ ايتقاندا, كيبەرقىلمىسپەن كۇرەس, تەرروريزم مەن ەكسترەميزمگە, زاڭسىز قارۋ مەن ەسكىرتكى اينالىمىنا, ۇيىمداسقان ترانسۇلتتىق قىلمىسقا قارسى ءىس-ارەكەت, اۋعانستانداعى جاعدايدى تۇراقتاندىرۋ, حالىقارالىق اقپاراتتىق قاۋىپسىزدىكتى قامتاماسىز ەتۋ سالالارىنداعى ءوزارا ىنتىماقتاستىقتى دامىتۋ جونىندە پىكىر الماستى.
عيزات نۇرداۋلەتوۆ ارىپتەستەرىنە شىۇ قىزمەتىنىڭ ماڭىزدى باعىتتارى بويىنشا قازاقستاننىڭ ۇستانىمى تۋرالى مالىمەت بەردى. سونداي-اق ەلىمىزدىڭ مۇددەسىن ەسكەرە وتىرىپ, قاۋىپسىزدىكتىڭ نەگىزگى اسپەكتىلەرى بويىنشا ءوزارا ءىس-ارەكەتتەردى ودان ءارى دامىتۋ جونىندە بىرقاتار ۇسىنىس ايتتى.
جيىن قورىتىندىسى بويىنشا شىۇ-عا مۇشە مەملەكەتتەردىڭ قاۋىپسىزدىك كەڭەسى حاتشىلارىنىڭ كەلەسى كەزدەسۋىن قازاقستاندا وتكىزۋ جونىندە شەشىم قابىلداندى.
كەزدەسۋ اياسىندا قازاقستان رەسپۋبليكاسى پرەزيدەنتىنىڭ كومەكشىسى – قاۋىپسىزدىك كەڭەسىنىڭ حاتشىسى عيزات نۇرداۋلەتوۆ ءۇندىستان پرەمەر-ءمينيسترىنىڭ ۇلتتىق قاۋىپسىزدىك جونىندەگى كەڭەسشىسى ادجيت دوۆالمەن ەكىجاقتى كەلىسسوز جۇرگىزىپ, ءوزارا ىنتىماقتاستىقتىڭ وزەكتى ماسەلەلەرىن تالقىلادى. ولار ەكى ەلدىڭ قاۋىپسىزدىك كەڭەسى اپپاراتتارى اراسىنداعى كەڭەستىڭ ءتورتىنشى كەزەڭىن استانادا وتكىزۋ جونىندە ۋاعدالاستى.