استانا. 1 شىلدە. بۇگىن تۇندە سان-پاۋلۋ قالاسىندا ارگەنتينا جانە شۆەيتساريا قۇرامالارى اراسىندا 1/8 فينالدىق ويىن وينالدى. ماتچتىڭ نەگىزگى ۋاقىتى 0:0 ەسەبىمەن تەڭ اياقتالدى. ال وۆەرتايمدا ارگەنتينالىقتار 1:0 ەسەبىمەن جەڭىسكە جەتتى. بۇل تۋرالى egemen.kz حابارلادى.
وڭتۇستىك امەريكا قۇرلىعىنىڭ بۇل قۇراماسى بۇعان دەيىنگى بىردە-ءبىر ماتچتا ءوزىن كەرەمەت ويىندارىمەن كورسەتە المادى. سوعان قاراماستان, توپتا 9 ۇپايدى تۇگەل الىپ, كەلەسى كەزەڭگە ءبىرىنشى بولىپ ءوتتى. ال ەۋروپالىقتار ءوزىن قيمىل-قوزعالىسىن الدىن الا بولجاۋ قيىن جۇمباق كوماندا رەتىندە تانىتتى.
ارگەنتينا – شۆەيتساريا 1:0. نەگىزگى ۋاقىت - 0:0. وۆەرتايم - 1:0.
1 شىلدە. سان-پاۋلۋ. «ارەنا كورينتيانس» ستاديونى. تورەشى - يۋناس ەريكسسون (شۆەتسيا).
ارگەنتينا: سەرحيو رومەرو, پابلو سابالەتا, ەزەكيەل گاراي, ماركوس روحو (حوسە ماريا باسانتا, 45), فەدەريكو فەرناندەس, حاۆەر ماسكەرانو, فەرناندو گاگو, انحەل دي ماريا, ليونەل مەسسي, ەزەكيەل لاۆەسسي, گونسالو يگۋاين.
شۆەيتساريا: ديەگو بەنالو, ستەفان ليحتشتاينەر, يوحان دجۋرۋ, ريكاردو رودريگەس, فابيان شەر, ۆالون بەحرامي, گەكحان ينلەر, گرانيت دجاكا (جەلسون فەرناندەس, 66), جەردان شاكيري, ادمير مەحمەدي (بلەريم دجەمايلي, 113), يوسيپ درميچ (حاريس سەفەروۆيچ, 82).
گول: انحەل دي ماريا (118).
ەسكەرتۋلەر: ماركوس روحو (90) - گرانيت دجاكا (36), جەلسون فەرناندەس (73).
چەمپيوناتتىڭ 1/8 فينالىندا تاعى دا كارى قۇرلىق پەن جاڭا دۇنيەنىڭ, ياعني ەۋروپا مەن وڭتۇستىك امەريكانىڭ تەكەتىرەسى ورىن الدى. ال بۇگىنگى ەكى قۇرامانىڭ بۇعان دەيىنگى ءوزارا كەزدەسۋلەرى سانىنا كەلسەك, ارگەنتينانىڭ ايقىن باسىم بولعانىن بايقاۋعا بولادى. ولار 6 رەت كەزدەسسە, سونىڭ 4-ندە امەريكالىقتار جەڭىپ, 2 ويىندا قارسىلاستار تەڭ تارقاسقان. مۇندا ارگەنتينالىقتار 14 گول سوعىپ, بار-جوعى 3 دوپ جىبەرىپ العان.
قارسىلاستار كەزدەسۋدىڭ العاشقى 15 مينۋتىنا دەيىن ءبىر-بىرلەرىنىڭ قاقپالارىنا پالەندەي قاۋىپ توندىرە المادى. دەگەنمەن, بۇل ارالىقتا ارگەنتينالىقتاردىڭ ازداعان ارتىقشىلىعى بايقالعانى دا راس. ولار شۆەيتساريالىقتاردىڭ قورعانىس شەبىن بىرنەشە رەت بۇزىپ ءوتتى. ەۋروپالىقتار وسىدان كەيىن عانا قارسى الاڭ بەتىنە قاراي شولعىنداپ بارا باستادى.
بۇعان دەيىن بولجانعانداي, ارگەنتينا ءبىرىنشى تايمدا كەزدەسۋدىڭ ءفاۆوريتى رولىندە كورىندى. ولار دوپقا دا كوبىرەك ەگەلىك ەتتى, شابۋىلدى دا ارتىعىراق جاسادى. بىراق شۆەيتساريا فۋتبولشىلارىنىڭ سيرەك جاساعان قارسى شابۋىلدارى قاۋىپتىرەك بولا ءتۇستى. تايمنىڭ سوڭىندا ولار ەكى رەت گول سوعۋ ساتىندە تۇردى. العاشىندا 39-مينۋتتا ولار قاۋىرت جورىققا شىقتى. وڭ قاپتالدان يوسيپ درميچكە پاس تاستالدى. قاقپاشى سەرحيو رومەرو ونى قاعىپ الۋعا ۇمتىلدى. بىراق ءمۇلت كەتتى. ونى ءىلىپ اكەتكەن يوسيپ ايىپ الاڭىنا كىرىپ, رومەرودان اسىرىپ اتتى. الايدا, وتە باياۋ ۇشقان دوپتى قاقپاشى وڭاي قاعىپ الدى. 45-مينۋتتا جەردان شاكيري ۇزاق ارباسىپ بارىپ, قاقپاعا قاراي دوپ اۋەلەتتى. ونى گولكيپەر سىرتقا شىعارىپ جىبەردى.
ەكىنشى تايم دا ارگەنتينانىڭ شابۋىلىمەن باستالدى. بىراق بىرەر مينۋتتان كەيىن قارسى شابۋىل جاساۋدى قايتا قولعا العان شۆەيتساريانىڭ ءاربىر العا ۇمتىلىسى تاعى قاۋىپتى بولا ءتۇستى. 50-مينۋتتا رومەرو ەۋروپالىقتار ۇرعان ءبىر دوپتى جاپ-جاقسى قاعىپ الىپ تۇرىپ, كەنەت قولىنان ءتۇسىرىپ جىبەردى. ال دوپ قاقپاعا قاراي دومالاپ بارا جاتقاندا, ونى ءوزى باۋىرىمەن باسىپ توقتاتتى.
58-مينۋتتا ارگەنتينالىقتارعا كەزەك كەلدى. ليونەل مەسسي الاڭنىڭ ورتاسىن جارىپ ءوتىپ, ايىپ الاڭىنىڭ سول قاپتالىنا كىرگەن ماركوس روحوعا دوپ جەتكىزدى. ال قورعاۋشى العان دوبىن قاقپانىڭ لاسى بۇرىشىنا قاراي زىرلاتتى. ونى قاقپاشى ديەگو بەنالو قولىنىڭ ۇشىمەن سىرتقا شىعارىپ ۇلگەردى. 62-مينۋتتا ەۋروپالىق قاقپاشىعا تاعى ەرلىك كورسەتۋگە تۋرا كەلدى. تاعى روحو سول قاپتالدان اشىلدى. ال پاس العاسىن ايىپ الاڭىنىڭ ورتاسىنا كىردى. سوسىن قاقپاعا قاراي باعىتتادى. قاقپاشى ونى ءبىر قولىمەن قاعىپ جىبەردى. مۇنداي جاعداي بۇل داربازا ماڭىندا 67 جانە 77-مينۋتتاردا دا قايتالاندى. بۇلاردا دا گولكيپەر قاقپا تورىن امان ساقتاپ قالدى.
بۇدان ارى دا روحو مەن مەسسي وسىنداي وقيعالاردىڭ ورتاسىنان تابىلىپ جاتتى. شۆەيتساريالىقتار قورعانىس شەبى سەتىنەي باستاعانداي كورىندى. بىراق قاقىراپ كەتكەن جوق. ولار شابۋىلدى بارىنشا جانتالاسىپ قايتارىپ باقتى. وسىمەن ويىننىڭ نەگىزگى ۋاقىتى دا ءبىتتى. ال قوسىمشا تايم بىتۋگە 2 مينۋت قالعان شامادا ارگەنتينالىق انحەل دي ماريا گول سوعىپ, ءوز كومانداسىنا جەڭىس سىيلادى. راس, بۇدان كەيىن شۆەيتساريالىقتار ەسەپتى تەڭەستىرۋگە ءبىر رەت مۇمكىندىك الىپ ەدى, ونى ءتيىمدى پايدالانا المادى.
سونىمەن, ارگەنتينا شيرەك فينالعا شىقتى. ول ەندى بەلگيا – اقش ماتچىنىڭ جەڭىمپازىمەن 5 شىلدە كۇنى كەزدەسەدى.
دامير قوجامقۇل.
دەرەككوز: egemen.kz.
فوتو: Sportbox.ru.