ءماجىلىس دەپۋتاتتارىنىڭ VIII شاقىرىلىمىنا سايلانعان قۇرامى دا بەلگىلى بولدى. بۇل – وسى كۇنگە دەيىنگى ارالاس ماجوريتارلىق پروپورتسيونالدى پرينتسيپ بويىنشا سايلانعان باسەكەگە ەڭ قابىلەتتى جانە پليۋراليستىك پارلامەنتتەردىڭ ءبىرى.
بىرىنشىدەن, ءماجىلىس قۇرامىنا التى پارتيا كىردى. زاڭ شىعارۋشى ورگانعا العاش رەت «اۋىل» پارتياسىنىڭ جانە «ەسكى مەكتەپ» وپپوزيتسياسى وكىلدەرىنىڭ اتىنان جالپىۇلتتىق سوتسيال-دەموكراتيالىق پارتياسى كەلدى. سونداي-اق پارلامەنتتىك جارىسقا جاڭادان كەلگەن «Respublica» كاسىپكەرلەر پارتياسى ۇزدىك ۇشتىككە ەنىپ كەتتى. جالپى, مۇنى پارلامەنتتىك ناۋقاننىڭ باستى سەنساتسيالارىنىڭ ءبىرى دەپ اتاۋعا بولادى.
ەكىنشىدەن, «Amanat» پارتياسى كانديداتتارىنىڭ ءبىر مانداتتى وكرۋگتەر بويىنشا داۋىس بەرۋدەگى ايقىن باسىمدىعىنا قاراماستان, جەتى وكرۋگتە ءوزىن-ءوزى ۇسىنۋشىلار جەڭىسكە جەتتى. ونىڭ ىشىندە كورنەكتى قوعام قايراتكەرى, «دات» وپپوزيتسيالىق باسىلىمىنىڭ رەداكتورى ەرمۇرات باپي بار.
ۇشىنشىدەن, ءداستۇرلى پارلامەنتتىك پارتيالار ازاماتتىق بەلسەندىلەر قاتارىنا وتە سىني ريتوريكامەن قوسىلدى. مىسالى, «Amanat» پارتياسىنان ماجىلىسكە قوعام قايراتكەرى, ايتىسكەر رينات زايىتوۆ سايلاندى. اتاپ وتەرلىگى, «Amanat» پارتياسى پارتيالىق ءتىزىم بويىنشا داۋىس بەرۋدە سايلاۋشىلاردىڭ داۋىسىن جوعالتقانىمەن (53,9%), ول ءوزىنىڭ بۇل «شىعىنىن» ءبىر مانداتتى وكرۋگتەردەگى 22 كانديداتتىڭ سەنىمدى جەڭىسىمەن وتەپ الدى.
ايەلدەر, جاستار جانە ەرەكشە قاجەتتىلىكتەرى بار ادامدار ءۇشىن كۆوتانىڭ 30 پايىزىنا كەلەتىن بولساق, پارتيالار ونى ءتۇرلى پروپورتسيادا ساقتادى. ماسەلەن, «Amanat»-تان پارتيالىق ءتىزىم بويىنشا ماجىلىسكە 8 ايەل (20%), ءتورت جاس بۋىن وكىلى (10%) قاتىستى. دەپۋتات ەرلان ابديەۆ مۇمكىندىگى شەكتەۋلى جانداردىڭ مۇددەسىن قورعاماق. ال ەڭ ينكليۋزيۆتى ءتىزىم ۇسىنعان قازاقستان حالىقتىق پارتياسى بولدى. پارتيا وكىلدەرىنىڭ قاتارىندا ەكى ايەل (يرينا سميرنوۆا جانە گاۋحار تاناشەۆا), جاس بەلسەندى يسلام سۇڭقار جانە پاراليمپياداشى كەنجەعۇل سەيتجان بار. «اق جول» پارتياسىنىڭ 6 دەپۋتاتىنىڭ بىرەۋى ايەل (16%), «اۋىل» پارتياسىنان 8-ءدىڭ ءبىرى (12%), جسدپ-دان 4-ءتىڭ ءبىرى (25%), «Respublica»-دان 6-نىڭ (50%) ۇشەۋى ايەل دەپۋتات. سونىمەن قاتار ءبىرمانداتتى 29 وكرۋگتەن تەك ەكى ايەل جەڭىسكە جەتتى – اينا مۋسراليموۆا (اقمولا وبلىسى) جانە گۇلدارا نۇرىموۆا (جامبىل وبلىسى). وسىلايشا, VIII شاقىرىلىمداعى ماجىلىسكە 18 ايەل (18%) ءوتتى, ال وتكەن شاقىرىلىمدا 28 ايەل (26%) بولعان ەدى.
وسىعان قاراماستان, پارلامەنت ءماجىلىسىنىڭ جاڭا قۇرامى ءتۇرلى پىكىردەگى جانە ۇستانىمدارى بولەك تۇلعالاردان قۇرالعان, نونكونفورميستىك بولارى ءسوزسىز. بۇل قۇرام ۇكىمەت ءۇشىن ىڭعايسىز ارينە, بىراق قوعامنىڭ ءتۇرلى الەۋمەتتىك توبىنىڭ مۇددەلەرى ەسكەرىلەتىنى انىق.
جاننا تولەندينوۆا,
ساياساتتانۋشى