ەلوردادا «ساحنادان سالەم» اتتى تەاتر فەستيۆالى شىمىلدىعىن اشتى

استانا. 1 شىلدە. «ساحنادان سالەم» تەاتر فەستيۆالى كورەرمەنگە ءوز شىمىلدىعىن ايقارا اشتى. بۇل تۋرالى astana.kz حابارلادى. «ساحنادان سالەم» تەاتر فەستيۆالىندە استانا, كوكشەتاۋ, قوستاناي, جەزقازعان, اقتاۋ, پاۆلودار, الماتى قالالارىنان, سونداي-اق, ماحاچكالا قالاسىنىڭ م.گوركي اتىنداعى رەسپۋبليكالىق ورىس دراما تەاترى (داعىستان رەسپۋبليكاسى) جانە ەرزۋرۋم قالاسىنىڭ مەملەكەتتىك تەاترى (تۇركيا), بارلىعى 13 تەاتر ۇجىمى وزدەرىنىڭ قويىلىمدارىن كورەرمەن نازارىنا ۇسىنادى. ق.قۋانىشباەۆ اتىنداعى اكادەميالىق قازاق مۋزىكالىق دراما تەاترىنىڭ كوركەمدىك جەتەكشىسى بولات ۇزاقوۆ: «ساحنادان سالەم» فەستۆيالى استانادا ەكىنشى رەت وتكىزىلىپ وتىر. ءبىز ەلورداعا وتاندىق, شەتەلدىك تەاتر ۇجىمدارىن دا شاقىردىق», – دەدى. اتالعان شارانىڭ العاشقى كۇنىندە م.بايجيەۆتىڭ «ءتىل تابىسقاندار» قويىلىمىنىڭ تۇساۋكەسەرى وتەدى. ال م.گوركي اتىنداعى اكادەميالىق ورىس دراما تەاترى ءۇشىن فەستيۆال ل. اگۋليانسكيدىڭ «تورعايدىڭ ۇياسى» سپەكتاكلىمەن باستالادى. جولدىباي بازار. دەرەككوز: astana.kz. فوتو: astana.kz.