پاريجدە باعىمدى تاعى ءبىر سىناپ كورەمىن – المات كەبىسباەۆ

سول كەزدە قاتتى جاراقاتتانعانىم راس. ءبىر ساعاتتان كەيىن قولا مەدال ءۇشىن كۇرەسۋىم كەرەك بولدى. باستاپقىدا باپكەرلەر مەن دارىگەرلەر رۇقسات بەرمەدى. بىراق مەن «بارلىق جاۋاپكەرشىلىكتى وزىمە الامىن» دەپ قولحات جازىپ بەرىپ, بوزكىلەمگە شىقتىم. اقىرىندا قارسىلاسىمدى سان سوقتىرىپ, قولا مەدالدى موينىما ءىلدىم.

– المات, ەكەۋمىز وسىدان 13 جىل بۇرىن تانىسقان ەدىك. 2010 جىلى تۇمەندە وتكەن يۆان پوددۋبنىيدىڭ تۋرنيرىندە توپ جارىپ, بارشا جان­كۇيەر نازارىن وزىڭە اۋداردىڭ. سەبەبى «كىشى الەم چەمپيوناتىنا» با­لانعان باسەكەدە ەلىمىزدىڭ سا­ناۋلى عانا بالۋانىنىڭ باعى جان­عانىن جۇرت جاقسى بىلەدى. ءدال وسى پوددۋبنىيدىڭ تۋرنيرىندە ولجالاعان باس جۇلدە سەنىڭ كەلە­شەك­تە­گى جارقىن جەڭىستەرىڭنىڭ التىن باستاۋى بولدى دەپ ايتساق بولا ما؟

– نەگىزى وعان دەيىن دە ەرەسەكتەر اراسىنداعى جارىستاردا ەلەۋلى تابىستارعا قول جەتكىزگەن ەدىم. ماسە­لەن, 2008 جىلى ستۋدەنتتەر اراسىندا الەم چەمپيونى اتانىپ, كەلەسى جىلى ازيا بىرىنشىلىگىندە كۇمىس مەدالدى موينىما ءىلدىم. ءيا, پوددۋبنىيدىڭ ءتۋرنيرى دە ماعان ۇلكەن سەرپىلىس بەرگەنى راس. تۇمەندە كەلەشەكتە لوندون وليم­پياداسى مەن ىستانبۇلداعى الەم چەمپيوناتىندا قولا مەدال يەلەنگەن اۆارلىق زاۋر كۋرماگومەدوۆتى قاپى قالدىرىپ, رەسەيدىڭ ەكى دۇركىن چەمپيونى ماكسيم ءموردوۆيندى ۇتتىم. فينالدا امەريكالىق دجوزەفف باتەر­ماننان باسىم ءتۇسىپ, باس جۇلدەنى قانجىعاما بايلادىم.

– جالپى, سەمەي وڭىرىندە بالۋاندىق ونەر وتە جوعارى دەڭگەي­دە دامىعانى بارشاعا ايان. ال ءۇرجاردىڭ گرەك-ريم كۇرەسىنىڭ داڭقتى تىپتەن شارىقتاپ تۇر. الىس­قا بارماي-اق, ءححى عاسىر تابال­دىرىقتان اتتاعان كەزەڭگە توق­تال­ساق, كوپ نارسەگە قانىق بولامىز. سول ارالىقتا بۇل وڭىردەن اسەت يمانباەۆ, اسەت مامبەتوۆ, داۋرەن مەن دارحان باياحمەتوۆتەر, ەربول قوڭىراتوۆ سىندى ساڭلاقتار شىق­تى. وسى سپورت تۇرىنە سول اعالارىڭا ەلىكتەپ كەلگەن بولارسىڭ؟

– جەرلەس اعالارىمدى كۇرەس ۇيىرمەسىنە كەلگەن كەزدە عانا تاني باستادىم. ال سپورتتىڭ وسى ءتۇرىن تاڭداۋىما تىكەلەي ىقپال ەتكەن – ءوزىمنىڭ ناعاشى اعام مارات سۇلەيمەنوۆ. كەزىندە ول كىسى دە جاقسى كۇرەستى. كوبىنە-كوپ مارات اعاما ەلىكتەدىم. اۋىلدا جۇماش اعانىڭ قول استىندا جاتتىقتىم. ول – قازاقتىڭ ايگىلى بالۋانى, جاستار اراسىنداعى الەمنىڭ ەكى دۇركىن چەمپيونى, ازيا ويىندارىنىڭ جەڭىمپازى اسەت يمانباەۆتىڭ اكە­سى. كەيىننەن بالۋاندىق ونەردىڭ قىر-سىرىنا قانى­عا­ باستاعانىمدا ءوزىڭىز جوعارىدا ەسىم­دە­رىن اتاعان اعالارىمنىڭ ونەرىن ءجىتى باقىلادىم. ول جىگىتتەردەن دە كوپ نارسە ۇيرەندىم.

– ءسال ەرتەرەكتە بەرگەن سۇحبات­تارىڭنىڭ بىرىندە سەن «اكەم سپورتشى, انام مۋزىكانت بولعانىمدى قالادى» دەپ ايتقان ەدىڭ...

– اكەم بالا كەزىمنەن سىمبات اعام ەكەۋمىزدى جۇگىرتىپ, سەكىرتىپ, بەل­­تەمىرگە تارتىلدىرىپ, شپاگاتقا وتىر­­عىزىپ, اساۋ اتتارعا مىنگىزىپ, ابدەن شىنىقتىرىپ ءوسىردى. ال انام 40 جىلداي ونەر جولىندا ەڭبەك ەتتى.­ اۋداندىق مۋزىكا مەكتەبىندە دوم­بىرادان ساباق بەردى, كەيىننەن ما­دە­نيەت ءۇيىنىڭ ديرەكتورى قىزمەتىن ات­قاردى. اناشىم مەنى مۋزىكاعا دا باۋ­لىدى. بىراق اقىرىندا اكەمنىڭ «سەن جىگىتسىڭ عوي. كۇرەسۋىڭ كەرەك!» دەگەن ءبىر اۋىز ءسوزى مەنىڭ تۇبەگەيلى سپورتپەن شۇعىلدانۋىما تۇرتكى بولدى.

– قازىر دە مۋزىكادان قارا جاياۋ ەمەس شىعارسىڭ؟

– مۋزىكانىڭ دا ماعان بەرگەنى كوپ. ەكىنشى سىنىپتان باستاپ ساح­نا­عا­ شىعىپ, حالىقتىڭ الدىندا ونەر كور­سەتتىم. عيبرات ازۋباەۆ اعامىز جە­تەك­شى­لىك ەتەتىن «سونار» ءان-بي ءانسامبلى قۇرا­مىندا سەمەي مەن وسكەمەننەن باس­تاپ, الماتى, كيشينەۆ, حاركوۆكە دەيىن بارىپ قايتتىم.

– كەيىننەن استاناداعى قاجى­مۇقان اتىنداعى سپورتتاعى دارىندى بالالارعا ارنالعان ما­مان­داندىرىلعان مەكتەپ-ينتەر­ناتقا قابىلداندىڭ. كۇش اتا­سى­نىڭ ەسىمىن يەلەنىپ وتىرعان قارا شا­ڭىراقتا كوپ نارسە ۇيرەنگەن بولارسىڭ؟

– مەنىڭ ينتەرناتقا ءتۇسۋ تاري­حىمنىڭ ءوزى قىزىق. بىردە پاۆلو­داردا وتكەن رەسپۋبليكالىق ءتۋرنيردى ءۇشىنشى ورىنمەن قورىتىندىلادىم. ونەرىم جەر­گى­لىكتى مامانداردىڭ كوڭىلىنەن شىق­سا كەرەك, ولار مەنى سول جاقتاعى ينتەر­ناتقا قابىلداعىسى كەلدى. جاتاق­حانادان ورىن بەرىپ, ساباققا دا بارىپ ۇلگەردىم. سول جاعدايدان قۇلاعدار بولعان بەتتە اتا-انام قوڭىراۋ شالىپ, اۋىلعا قايت دەدى. مەن ءاۋ باستا كونبەدىم. اكە-شەشەم: «پاۆلوداردا ەشبىر تامىر-تانىسىمىز جوق. ءبىز سەن ءۇشىن الاڭدايمىز. الماتى نەمەسە استانا بولسا ءبىر ءسارى. ايتەۋىر, ول جاقتا ءۇرجاردىڭ باپكەرلەرى مەن بالۋاندارى بار. سولار ساعان كوز قىرىن سالا جۇرەر», دەپ اقىرى مەنى كوندىردى. ءسويتىپ, استانادان ءبىر-اق شىعىپ, بىلىكتى باپكەر رىسبەك نۇرعازيننىڭ قول استىندا جاتتىعا باستادىم.

– ءبىزدىڭ بىلۋىمىزشە, سەن ەرەسەكتەر دۋىندا 2008 جىلدان بەرى باق سىناپ ءجۇرسىڭ. سول كەزدە ەل­ىشىلىك جارىستارداعى باستى قار­سىلاستارىڭ كىمدەر ەدى؟

– جاستار بۋىنى اراسىنداعى جارىستاردى اياقتاعاننان كەيىن بولات تۇرلىحانوۆتىڭ مەموريالىندا ءبىرىنشى ورىن الىپ, قىراعى مامانداردىڭ نازارىنا ىلىكتىم. ۇلتتىق قۇرامانىڭ باس باپكەرى تاڭات ساعىندىقوۆ رەسپۋبليكامىزدىڭ باس كومانداسىنا شاقىرتتى. سول كەزدەن بەرى ەرەسەكتەر اراسىندا ەلەۋلى تابىستارعا جەتە باستادىم. ءيا, ول كەزدەرى مەن ونەر كورسەتكەن 60 كيلو سالماق دارەجەسىندە باسەكەلەستىك وتە كۇشتى بولدى. وليمپيا ويىندارى مەن الەم چەمپيوناتىنىڭ جۇلدەگەرى نۇرباقىت تەڭىزباەۆتان باستاپ, ەربول قوڭىراتوۆ, بەكجان جاربولوۆ, ەلدار قايراتوۆ جانە تاعى باسقا بەدەلدى بالۋاندارمەن كۇش سىناستىم.

– قازىرگى جاتتىقتىرۋشىڭ بورانبەك قوڭىراتوۆ ەكەن. كەزىندە ەلىمىزدەگى بەلدى بالۋانداردىڭ ءبىرى بولعان بىلىكتى باپكەردىڭ قول استىندا قاي كەزدەن بەرى جاتتىعىپ ءجۇرسىڭ؟

– 2005 جىلى استاناداعى مەكتەپ-ينتەرناتتى ءتامامداپ, قۇجاتتارىمدى سومكەگە سالدىم دا, اۋىلعا قايتتىم. شىنى كەرەك, ول كەزدە ەكى ويلى بولىپ ءجۇردىم. كۇرەستى جالعاستىرايىن دەسەم, ەرەسەكتەردى الىپ ۇرۋعا ءالىم جەتپەيدى. ال كوپتىڭ ءبىرى بولىپ جۇرە بەرۋدى جانىم قالامادى. وسىنداي قىسىلتاياڭ شاقتا جانىمنان تاعى دا سول جاناشىر ناعاشى اعام تابىلدى. سول كىسىنىڭ اقىل-كەڭەسىن تىڭداپ, الماتىدا ورنالاسقان قازاقتىڭ سپورت جانە تۋريزم اكادەمياسىنا وقۋعا ءتۇستىم. سول كەزدەن بەرى بورانبەك قوڭىراتوۆتان ءتالىم-تاربيە الىپ ءجۇرمىن.

– 2010 جىلى الەم چەمپيوناتىنا العاش رەت قاتىسقانىڭا قارا­ما­ستان قولا مەدال يەلەنىپ, قازاق جان­كۇيەرلەرىن ءبىر جەلپىندىرىپ تاس­تا­دىڭ. ماسكەۋدە ءدال وسى مەجەدەن كورىنەمىن دەپ ويلادىڭ با؟

– شىنى كەرەك, ول كەزدە ەشكىمدى تانىمايسىڭ, كىمنىڭ قالاي كۇرەسەتىنىن دە بىلمەدىك. ويتكەنى عالامتور قا­زىر­گى­دەي دامىماعان. قارسىلاستارىم جايىندا قولىمدا ماردىمدى مالى­مەتتەر بولماعاندىقتان, ءوزىمنىڭ ينتۋيتسياما سۇيەنۋگە تۋرا كەلدى. ال­عا­شىندا اڭداسىپ, ارباسىپ ءجۇرىپ, باسەكە بەل ورتاعا تاياعان تۇستا قار­قىنىمدى كۇشەيتىپ, ءبىراز مىقتىنى جولىمنان ىعىستىردىم. العاشقىدا شۆەيتساريالىق پاتريك ستادەلمان جانە ۇندىستاندىق ستيۆ راۆيندەردەن  ايلامدى اسىردىم. ءۇشىنشى اينالىمدا وزبەكستاننىڭ اتاقتى بالۋانى, الەم جانە ازيا چەمپيونى ءدىلشود ءاريپوۆتى سان سوقتىردىم. جارتىلاي فينالدا ازەربايجاندىق حاسان اليەۆكە ەسە جىبەردىم. باس جۇلدە ءۇشىن تالاسۋ مۇمكىندىگىنەن ايىرىلعاننان كەيىن قالاي دا جەڭىس تۇعىرىنا كوتەرىلۋدى ماقسات تۇتىپ, بولگاريالىق يۆو انگەلوۆقا قارسى «بەس قارۋىمدى» اسىنىپ شىقتىم. بۇل باسەكەدە جەڭىسكە جەتىپ, قولا مەدالدى ۋىسىما ءتۇسىردىم.

– 2011 جىلى ىستانبۇلدا الەم چەمپيونى اتانۋعا تاماشا مۇمكىندىگىڭ بولدى. بارلىق قار­سىلاستى سىپىرا ۇتىپ, فينالعا دەيىن القىنباي جەتتىڭ. الايدا شەشۋ­شى سىندا يراندىق ءۇمىت نورۋ­زيدەن جەڭىلدىڭ. فينالدا قانداي اعاتتىق جىبەردىڭ؟

– باستاپقى باسەكەلەردە ەۋروپا بىرىنشىلىگىنىڭ ءۇش دۇركىن جۇلدەگەرى, بولگاريالىق يۆو انگەلوۆ, بەيجىڭ وليمپياداسى مەن ازيا ويىندارىنىڭ قولا جۇلدەگەرى, قۇرلىق چەمپيونى قىرعىزستاندىق رۋسلان تۇمەنباەۆ, دانيالىق اندرەس ەكسترەم جانە ۆەنەسۋەللالىق لۋيس ليەندونان باسىم ءتۇستىم. فينالدا ول كەزدەرى ازيا ويىندارىنىڭ جەڭىمپازى دەگەن اتاعى بار, كەيىننەن وليمپيادا چەمپيونى اتانعان وميد ءنورۋزيدى جەڭىپ جاتقانمىن. سول كەزدە قورعانىسقا كوبىرەك ءمان بەرىپ, باسىمدىعىمدى ساقتاپ قالۋىما دا بولار ەدى. بىراق ول جەلكەدەن تارتقىلاپ, باسپەن ۇرىپ, قيتۇرقى ارەكەتتەرگە باردى. مەن دە جاۋاپ قايتارماق بولىپ, قىزبالىققا سالىندىم. ءسويتىپ, سالقىنقاندىلىق تانىتپاعانىمنىڭ سالدارىنان وپىق جەدىم. سوڭعى كەزەڭدە 5:6 ەسەبىمەن ەسە جىبەرىپ, التىن مەدالدان ايىرىلدىم. ارينە, شەشۋشى تۇستا ۇتىلعانىم وكىنىشتى. بىراق بۇنى مەن «تراگەديا» دەپ ەسەپتەمەيمىن. ويتكەنى تورتكۇل دۇنيەنىڭ تەڭدەسسىزدەرى جينالعان جارىستا وسى مەجەگە جەتكەندەر دە بار, جەتپەگەندەر دە بار. ىستانبۇلداعى كۇمىس مەدال مەنىڭ سپورتتىق مان­سابىمداعى ەڭ زور تابىسىم ەكەنىن دە ەستەن شىعارماعان ابزال.

– سودان كەيىن 2015 جىلى لاس-ۆەگاس, 2019 جىلى استانا جانە 2021 جىلى وسلوداعى الەم چەمپيوناتتارىندا قولا مەدالدى موينىڭدا جارقىراتتىڭ. ارينە, بۇل – تاماشا كورسەتكىش! دەسەك تە باس جۇلدەگە قول جەتكىزە الماعانىڭا وكىنبەيسىڭ بە؟

– جالپى, بەس جارىستا دا مەنىڭ الەم چەمپيونى اتانۋعا مۇمكىندىگىم بولدى. بىراق باس جۇلدە بۇيىرمادى. كىم ءبىلسىن, بالكىم ول اتاققا مەن لايىق بولماعان شىعارمىن.

– قۇرلىقتىق دەڭگەيدەگى جارىس­تاردا دا سان مارتە دارالاندىڭ. تار­قاتىپ ايتساق, 2014 جىلى ينچ­حوندا الاۋى تۇتانعان ازيا ويىن­دارىندا قولا مەدال يەلەندىڭ. بارشا جانكۇيەر بۇل قولانى التىنمەن پارا-پار دەپ جاتتى. ويت­كەنى سونىڭ الدىنداعى باسەكە­لەر­دىڭ بىرىندە ميىڭ شايقالىپ, جا­عىڭ سىنعان بولاتىن. بىراق سەن تاۋەكەلگە باردىڭ...

– ازيا ويىندارىنا سولتۇستىك كورەيا بالۋانى, الەم چەمپيوناتى مەن ازيا ويىندارىنىڭ جۇلدەگەرى يۋن ۆون چحولگە ەسە جىبەردىم. سول كەزدە قاتتى جاراقاتتانعانىم راس. ءبىر ساعاتتان كەيىن قولا مەدال ءۇشىن كۇرەسۋىم كەرەك بولدى. باستاپقىدا باپكەرلەر مەن دارىگەرلەر رۇقسات بەرمەدى. بىراق مەن «بارلىق جاۋاپكەرشىلىكتى وزىمە الامىن» دەپ قولحات جازىپ بەرىپ, بوزكىلەمگە شىقتىم. اقىرىندا قارسىلاسىمدى سان سوقتىرىپ, قولا مەدالدى موينىما ءىلدىم. ەلگە ورال­عاننان كەيىن 10 كۇننەن كەيىن وتا جاساتتىم. سول كەزدە جاعىمنان بارماقتاي ءبىر سۇيەكتىڭ بولشەگىن الىپ تاستادى. ەگەر وتا ۋاقتىلى جاسالعاندا, ونى جالعاۋعا بولاتىن ەدى. بىراق سىنىق جاقپەن كۇرەسىپ ءجۇرىپ, سۇيەگىمنىڭ ۇگىتىلىپ كەتكەنىن دە سەزبەپپىن.

– 2018 جىلى جاكارتادا وتكەن ازيا ويىندارىندا كۇمىسكە قول سوزدىڭ. نەبىر مىقتىلاردى جولىڭ­نان ىعىستىرعانىڭمەن, فينالدا الەمنىڭ ەكى دۇركىن چەمپيونى, وڭتۇستىككورەيالىق ريۋ حان سۋعا ءالىڭ جەتپەدى. ءدال سول بالۋان ينچحونداعى دودادا دارا شىققان ەدى. بۇل جولى ال­تىن تۇعىرعا كوتەرىلۋىڭە نە كەدەر­گى بولدى؟

– جاكارتادا قارسىلاسىمدى ەكى ۇپاي ايىرماشىلىعىمەن ۇتىپ جاتىپ, جەڭىستى ۋىسىمنان شىعارىپ الدىم. ول كەزدە تاكتيكالىق تۇرعىدان قاتەلەستىم. انىقتاپ ايتسام, اتويلاپ جەڭەمىن دەپ, اعاتتىق جىبەردىم.

– المات, ەكى بىردەي وليمپيا ويىندارىنا قاتىسىپ, ەكى رەتىندە دە جۇلدەگەرلەر قاتارىنا قوسىلا الماۋىڭ ءالى كۇنگە دەيىن جانىڭدى جەگىدەي جەيتىن شىعار؟

– ارينە, ءار سپورتشىنىڭ ارمانى – وليمپيادانىڭ جەڭىس تۇعىرىنا كوتەرىلۋ عوي. بىراق ەكى رەتىندە دە مەنىڭ جولىم بولمادى. 2012 جىلى لوندونداعى دودادا ءوزىمنىڭ سىرالعى قارسىلاسىم, يراندىق ءۇمىت نورۋزيدەن جەڭىلدىم. ارادا نەبارى 10 مينۋت وتكەننەن سوڭ قولا مەدال ءۇشىن بەلدەسۋگە شىقتىم. دۇرىس تىنىعىپ تا ۇلگەرمەدىم. اقىرى جاپونيالىق ريۋتارو ماتسۋموتوعا جول بەرىپ, بە­سىنشى ورىندا قالىپ قويدىم. 2016 جىلى برازيليانىڭ ريو-دە-جانەيرو قالاسىندا الاۋى تۇتانعان وليمپيا ويىندارىندا دا جامان كۇرەسكەن جوقپىن دەپ ويلايمىن. اسىرەسە يراننىڭ داڭقتى بالۋانى, لوندون وليمپياداسىنىڭ جەڭىمپازى, الەم­نىڭ التى دۇركىن چەمپيونى حاميد سوريانمەن بولعان بەلدەسۋ ەسىمدە ەرەكشە ساقتالدى. كۇرەس بارىسىندا 0:7 ەسەبىمەن ۇتىلىپ جاتقانىما قاراماستان, قارسىلاسىمدى قوس جاۋى­رى­نىمەن جەرگە قادادىم. بىراق بۇل تارتىستا بارلىق كۇشىمنىڭ سارقىل­عا­نىن كەلەسى كەزدەسۋىمدە انىق سەز­دىم. ءسويتىپ, الەم چەمپيوناتىنىڭ قولا جۇلدەگەرى نورۆەگيالىق ستيگ-اندرە بەرگەگە ەسە جىبەرىپ, جۇلدەلى ورىن ءۇشىن تالاسۋ مۇمكىندىگىنەن ايى­رىلدىم. مىنە, مەنىڭ ەكى بىردەي وليم­پيا­دادا جەڭىس تۇعىرىنا كوتەرىلە ال­ماۋىمنىڭ تاريحى وسىنداي. ال جالپى العاندا مەنىڭ سپورتتىق مانسابىمدا جارقىن جەڭىستەر از بولعان جوق. سوندىقتان دا بارعا ريزامىن. وسىنداي كورسەتكىشكە قول جەتكىزە العانىم ءۇشىن اللا تاعالاعا شەكسىز العىس ايتامىن.

– المات, سەن ۇلتتىق قۇراما ساپىندا 15 جىلعا جۋىق ونەر كور­سەت­تىڭ. سول ارالىقتا نەبىر دۇل­دۇل­دەرمەن كۇش سىناستىڭ. سولار­دىڭ ارا­سىنان كىمدەردى بولە-جارا اتاپ وتەر ەدىڭ؟

– ءوز ەلىمىزدەگى نۇرباقىت تەڭىزباەۆتىڭ مەنىڭ وسى دەڭگەيگە جەتۋىمە قوسقان ۇلەسى ۇشان-تەڭىز. وسىنداي مىقتى بالۋانمەن ۇزەڭگى قاعىستىرا ءجۇرىپ, مەنىڭ دە شەبەرلىگىم ءوستى. شەتەلدىكتەر اراسىنان وليمپيا ويىندارىنىڭ جەڭىمپازى, الەمنىڭ التى دۇركىن چەمپيونى يراندىق حاميد سورياندى اتاپ وتكىم كەلەدى. ونىمەن بوزكىلەمدە ءبىر مارتە عانا كەزدەستىم. ال سول كەزدەسۋگە مەن جىلدار بويى دايىندالدىم. ماسەلەن, ريو وليمپياداسى قارساڭىندا وزىمىزگە سپاررينگ ارىپ­تەس تاڭداۋىمىزعا رۇقسات بەردى. ءوز كو­مان­دالاستارىمنىڭ اراسىنان مەنىڭ تاڭ­داۋىم ءادىس-ءتاسىلى سوريانعا كەلىڭ­كىرەيتىن رۋسلان يتەمگەنوۆ پەن قورلان جاقانشاعا ءتۇستى.سونىڭ ارقاسىندا وليمپيا ويىندارىندا مەن ونى ۇتتىم.

– بىلتىر سەن ۇلكەن سپورتپەن قوش ايتىسىپ, بىردەن قازاقستاننىڭ جاسوسپىرىمدەر قۇراماسىنىڭ اعا جات­تىقتىرۋشىسى بولىپ تاعايىن­دال­دىڭ. الايدا بيىلعى اقپان ايىندا الماتىدا وتكەن سپارتاكيادادا بوي كورسەتتىڭ. جاسىڭ 35-تەن اسسا دا بابىڭدا ەكەنىڭدى بايقاتىپ, باس جۇلدەنى ولجالادىڭ. جالىندى جاس­تارمەن ارپالىسۋ قانشالىقتى قيىن بولدى؟

– ءيا, جاستار ءوسىپ جاتىر. ولاردىڭ ەكپىنىنە توتەپ بەرۋ استە وڭاي ەمەس. الماتىدا ءوزىمنىڭ مىقتىلىعىمدى مويىنداتۋ ءۇشىن ماعان كوپ ەڭبەكتەنۋگە تۋرا كەلدى. تۇساۋكەسەر كەزدەسۋىمدە بىل­تىر جاستار اراسىنداعى الەم بىرىن­شىلىگىنىڭ كۇمىس جۇلدەگەرى دىنمۇحاممەد قوشقاردى قاپى قالدىر­دىم. جارتىلاي فينالدا جابىق عيما­راتتاعى ازيا ويىندارىنىڭ جەڭىمپازى دانيار قالەنوۆتى جەڭىپ, فينالدا كەندى التايدان كەلگەن تاعى ءبىر مىقتى بالۋان مەرەي بەكەنوۆتەن باسىم ءتۇستىم.

– بوزكىلەمگە قايتا ورالعانىڭا قارا­عاندا كەلەسى جىلى پاريجدە الاۋى تۇتاناتىن وليمپيا ويىن­دارىندا كۇش سىناسۋدى كوزدەپ وتىر­عان سەكىلدىسىڭ؟

– ويىڭىز دۇرىس. ەگەر 67 كيلو سالماقتا ەلىشىلىك جارىستار مەن حالىقارالىق ارەنادا ءوزىمنىڭ مىقتى­لى­عىمدى دالەلدەي السام, پاريجدە باعىمدى تاعى ءبىر سىناپ كورەمىن.

– المات, اڭگىمەڭە راقمەت! كوز­دەگەن ماقساتىڭا قول جەتكىز. لوندون مەن ريو وليمپيادالارىنداعى ولقى­لىقتىڭ ورنىن پاريجدە تول­تى­رۋىڭا تىلەكتەسپىز.

اڭگىمەلەسكەن

عالىم سۇلەيمەن,

«Egemen Qazaqstan»