استانادا وتەتىن ازيا چەمپيوناتى قارساڭىندا ءبىز گرەك-ريم مەن ەركىن كۇرەس شەبەرلەرى جايىندا كولەمدى ساراپتاما ماقالالار بەرگەن ەدىك. ەندىگى كەزەكتە – ايەلدەر كۇرەسى. بۇگىنگى تاڭدا سارى قۇرلىقتىڭ باستى دوداسىندا كىمدەر ۇستەمدىك قۇرۋدا؟ سول جارىستاردا ءبىزدىڭ بۇرىمدىلار قانداي تابىسقا قول جەتكىزدى؟ مىنە, بۇگىنگى ماقالامىزدا وسى ساۋالدارعا جاۋاپ ىزدەپ كورەمىز.
ايەلدەر كۇرەسىنەن ازيا چەمپيوناتىنىڭ تۇساۋى 1996 جىلى قىتايدىڭ سياوشان قالاسىندا كەسىلدى. سول كەزدەن بەرى اتالعان جارىستىڭ جالاۋى 25 مارتە جەلبىرەدى. سول باسەكەلەردە ۇپاي سانى بويىنشا جالپى ەسەپتە جاپونيا – 16, قىتاي – 8 جانە ءۇندىستان 1 رەتتەن كوش باستادى. مەدالدەردىڭ سانى بويىنشا كۇنشىعىس ەلىنىڭ قىزدارى – 19, قىتاي ەلىنىڭ ارۋلارى – 5 جانە ءۇندى ەلىنىڭ بۇرىمدىلارى 1 رەتتەن وزىق شىقتى. مىنە, وسى دەرەكتەردەن-اق كوماندالىق سايىستا باستى باسەكەلەستىك قاي مەملەكەتتەردىڭ وكىلدەرى اراسىندا ءوربيتىنىن بايقاۋ قيىن ەمەس.
قازاقستاننىڭ قىزدارى دا «قارا جاياۋ» ەمەس. جەرلەستەرىمىز جالپىكوماندالىق ەسەپتە ءبىر رەت ەكىنشى ورىن السا, 10 رەت ۇزدىك ۇشتىكتى تۇيىندەدى. تاعى ەكى مارتە ءتورتىنشى ساتىعا تۇراقتادى. ەڭ كوپ جۇلدە العان كەزدەرىمىز: 2020 جىلى – 8 (2+1+5), 2015 جىلى – 6 (0+1+5), 2021 جىلى – 6 (2+1+3), 2007 جىلى – 5 (1+3+1), 2008 جىلى – 5 (0+3+2), 2012 جىلى – 5 (2+0+3), 2014 جىلى – 5 (2+0+3) جانە 2016 جىلى – 5 (0+3+2). سارى قۇرلىقتىڭ باستى دوداسىندا جەرلەستەرىمىز بارلىعى 78 جۇلدە ولجالادى. ونىڭ 17-ءسى التىن, 16-سى كۇمىس جانە 45-ءى قولا. بۇل مەدالدىڭ يەگەرلەرى مىنا سپورتشىلار:
التىن: گۇزەل مانيۋروۆا (2010, 2011, 2012,2014), تاتيانا امانجول (2009. 2013, 2014, 2020), ەلەنا شالىگينا (2009, 2012), ءجاميليا باقبەرگەنوۆا (2020, 2022), سۆەتلانا ياروشەەۆيچ (2003), جۇلدىز ەشىموۆا (2007), ۆالەنتينا يسلاموۆا (2021), ەلميرا سىزدىقوۆا (2021) جانە ءمادينا باقبەرگەنوۆا (2022).
كۇمىس: جۇلدىز ەشىموۆا (2008, 2009, 2010, 2017), ەلەنا شالىگينا (2006, 2007), ەلميرا سىزدىقوۆا (2015, 2016), داريا كارپەنكو (2007), ولگا جانىبەكوۆا (2007), سالتانات ءابدىراحمانوۆا (2008), ولگا سميرنوۆا (2008), يرينا بوريسوۆا (2016), ايىم ءابدىلدينا (2016), اياۋلىم قاسىموۆا (2021) جانە ءجاميلا باقبەرگەنوۆا (2021).
قولا: ايىم ءابدىلدينا (2009, 2011, 2012, 2014, 2015), گۇلمارال ەركەباەۆا (2015, 2016, 2017, 2022), ولگا جانىبەكوۆا (2005, 2006, 2010), ەلميرا سىزدىقوۆا (2014, 2018, 2020), جۇلدىز ەشىموۆا (2015, 2018, 2022), ءمادينا باقبەرگەنوۆا (2017, 2020), ۆالەنتينا يسلاموۆا (2019, 2020), التىناي ساتىلعان (2020, 2021), تاتيانا امانجول (2015), تاتيانا زاحاروۆا (2011, 2012), ەكاتەرينا لاريونوۆا (2014, 2015), سۆەتلانا ۆولكوۆا (1996), بەكزات مۇستافينا (2005), ولگا كالينينا (2006), ولگا سميرنوۆا (2007), ەلەنا شالىگينا (2008), داريا كارپەنكو (2008), ايجان يسماعۇلوۆا (2011), يرينا بوريسوۆا (2017), اياۋلىم قاسىموۆا (2017). يرينا كازيۋلينا (2018), مارينا سەدنەۆا (2019), اينا تەمىرتاسوۆا (2019), ءجاميلا باقبەرگەنوۆا (2019), مارينا زۋەۆا (2020), اسىلزات ساعىمباي (2021) جانە ايشا ءۋاليشان (2021).
قازاقستاننىڭ جانكۇيەرلەرىنە ازيا چەمپيوناتىنىڭ العاشقى مەدالىنىڭ سىڭعىرىن ەستىرتكەن سۆەتلانا ۆولكوۆا. 1996 جىلى قىتايدىڭ سياوشان قالاسىندا تۇساۋى كەسىلگەن جارىستا 57 كيلو سالماقتا سىنعا تۇسكەن ول جاپونيالىق ماريكو سيميدزۋ مەن تايپەيلىك حۋان تسزياتسزيدەن قالىپ قويىپ, ءۇشىنشى ورىندى يەلەندى. سودان كەيىنى ءتورت جارىستان قورجىنىمىز بوس قايتتى. 2003 جىلى نيۋ-دەليدە بۇرىمدىلارىمىز تۇڭعىش رەت قازاق ەلىنىڭ ءانۇرانىن شىرقاتتى. بۇل جارىستا 75 كيلو سالماقتا كۇش سىناسقان سۆەتلانا ياروشەۆيچ الدىنا جان سالماي, التىننان القا تاقتى. فينالدا ول كورەيالىق كان مين دجوندى قاپى قالدىردى.
نەگىزى سۆەتلانا – رەسەيدىڭ تۋماسى. ول كراسنويارسك ولكەسىنىڭ اباكان قالاسىندا دۇنيەگە كەلگەن. وعان دەيىن ياروشەۆيچ جاستار اراسىنداعى ەۋروپا بىرىنشىلىگىندە ءۇش رەت جۇلدەگەرلەر قاتارىنان كورىندى. كەيىننەن قازاقستاننىڭ تۋى استىندا ونەر كورسەتتى. 2003 جىلدىڭ قوڭىر كۇزىندە جول اپاتىنا ۇشىراپ, بەل ومىرتقاسىنان قاتتى جاراقات الدى. دەسەك تە باسىنا تۇسكەن اۋىر جاعداي قايسار قىزدىڭ ساعىن سىندىرا العان جوق. سۆەتلانا مۇگەدەكتەر ارباسىنا تاڭىلسا دا, سپورتتان قول ۇزبەدى. ول شاڭعى, بياتلون جانە جەڭىل اتلەتيكامەن اينالىسىپ, 2010 جىلى ۆانكۋۆەردە الاۋى تۇتانعان پاراليمپيادالىق ويىنداردا ونەر كورسەتتى.
ايەلدەر كۇرەسىن دامىتۋ ءۇشىن كەزىندە شەت مەملەكەتتەردەن سپورتشىلار كوپتەپ شاقىرتقانىمىز جاسىرىن ەمەس. سولاردىڭ ءبىرازى حالىقارالىق ارەنادا زور تابىستارعا قول جەتكىزدى. كەيىننەن ءوز قىزدارىمىزدىڭ اراسىنان دا دارىندى سپورتشىلار شىقتى. سوڭعى جىلدارى سولار بايراقتى باسەكەلەردە ەل نامىسىن ابىرويمەن قورعاپ ءجۇر.
قازاقستان قۇراماسى ساپىندا ەڭ كوپ ولجاعا كەنەلگەن بالۋاندار مىنالار: جۇلدىز ەشىموۆا 8 جۇلدە (1+4+3), ەلميرا سىزدىقوۆا 6 جۇلدە (1+2+3), ايىم ءابدىلدينا 6 جۇلدە (0+1+5), تاتيانا امانجول 5 جۇلدە (4+0+1), ەلەنا شالىگينا 5 جۇلدە (2+2+1), گۇزەل مانيۋروۆا 4 جۇلدە (4+0+0), ءجاميلا باقبەرگەنوۆا 4 جۇلدە (2+1+1), ولگا جانىبەكوۆا 4 جۇلدە (0+1+3) جانە گۇلمارال ەركەباەۆا 4 (0+0+4).
بىلتىر موڭعوليانىڭ استاناسى – ۇلانباتىردا قازاقستان قۇراماسى وتە تابىستى ونەر كورسەتىپ, ءوز تاريحىندا تۇڭعىش رەت جالپى ەسەپتە ەكىنشى ورىندى يەلەندى. ءبىزدىڭ قىزداردىڭ اراسىنان اپالى-ءسىڭلىلى – باقبەرگەنوۆالار باس جۇلدەنى ولجالادى. 68 كيلو سالماقتاعى ءمادينا فينالدا قىرعىزستاننىڭ اتاقتى سپورتشىسى, توكيو وليمپيداسىنىڭ قولا جۇلدەگەرى, الەم جانە ازيا چەمپيونى, الەم كۋبوگىنىڭ يەگەرى, ازيا ويىندارىنىڭ قولا جۇلدەگەرى مەيىرىم جۇمانازاروۆانى جەڭدى. 72 كيلوداعى ءجاميلا جاپونيانىڭ جاس جۇلدىزى سۋميرە نيكۋرادان ايلاسىن اسىردى. ودان بولەك, جۇلدىز ەشىموۆا (53 كيلو) مەن گۇلمارال ەركەباەۆا (76 كيلو) قولا مەدالدى قورجىنعا سالدى.
اتالعان جارىستا دا ادەتتەگىدەي جاپونيا قۇراماسىنا تەڭ كەلەر كوماندا تابىلمادى. بۇل ەلدىڭ رەمينا ەسيموتو (50 كيلو), اكارا فۋدزينامي (53 كيلو), ۋمي يماي (55 كيلو), تسۋگۋمي ساكۋراي (57 كيلو), سارا ناتامي (59 كيلو), نونوكا ودزوكي (62 كيلو) جانە ميۆا موريكاۆا (65 كيلو) سىندى سۇلۋلارى التىننان القا تاقتى. باس جۇلدەنىڭ تاعى بىرەۋىن قىرعىزستاندىق ايپەرى مەدەتقىزى (76 كيلو) جەڭىپ الدى. جالپى, بىلتىرعى ازيا چەمپيوناتىندا جاپونيا (7 التىن+2 كۇمىس+0 قولا), قازاقستان (2+0+2) جانە قىرعىزستاننان (1+2+0) بولەك, موڭعوليا (0+4+5), ءۇندىستان (0+2+3) جانە وزبەكستاننىڭ (0+0+1) بالۋاندارىنا عانا جەڭىس تۇعىرىنا كوتەرىلۋ باقىتى بۇيىردى.