ازيانىڭ مىقتىلارى استانادا بەلدەسەدى

ەركىن كۇرەستەن وتكەن ازيا چەمپيوناتتارىندا ەڭ كەرەمەت كورسەتكىشكە قول جەتكىزگەن يران قۇراماسى. پارسى ەلىنىڭ پەحلەۆاندارى سول 35 جارىستىڭ 29-ىندا جالپىكوماندالىق ەسەپتە باس جۇلدەنى ولجالادى. ءۇش دودادا وزبەكستان (1999, 2011 جانە 2018 جىلدارى) وزسا, قازاقستان (2006) مەن ءۇندىستاننىڭ (2013) ءبىر-ءبىر رەتتەن اسىعى الشىسىنان ءتۇستى.

جەرلەستەرىمىز ءوزىنىڭ ەڭ زور تا­بىسىنا 2016 جىلى قول جەت­كىزدى. الماتىداعى بالۋان شو­لاق اتىنداعى سپورت سارايىندا ۇيىمداستىرىلعان بايراقتى باسەكەدە بالۋاندارىمىز قازاق ەلىنىڭ ءانۇرانىن ءۇش مارتە شىر­قاتتى. الاتاۋ باۋرايىندا لەونيد سپيريدونوۆ (66 كيلو), نۇرجان قاتاەۆ (96 كيلو) جانە ماريد مۋتاليموۆ (120 كيلو) قارسىلاس شاق كەلتىرمەسە, ب­اۋىرجان وراز­عاليەۆ (60 كيلو) پەن گەن­نا­دي لاليەۆ (84 كيلو) قولا مەدالدى يەلەندى. ناتيجەسىندە, قازاقستان قۇراماسى جالپى ەسەپتە جەكە-دارا كوش باستادى. وعان دەيىن دە, ودان كەيىن دە ەركىن كۇرەس شەبەرلەرىمىز ءدال وسى ناتيجەسىن قاي­تالاي العان جوق. ال 2018 جىلى بىش­كەكتە جىگىتتەرىمىز جەتى جۇلدە (2 التىن+1 كۇمىس+4 قولا) السا, 2022 جىلى ۇلان­باتىردا سەگىز مەدال (1+3+4) ولجالادى.

ءبىزدىڭ بالۋاندار 2018 جىلى بىشكەكتە, 2019 جىلى سياندە, 2020 جىلى نيۋ-دەليدە جانە 2021 جىلى الماتىدا ۇيىمداس­تىرىلعان ازيا چەمپيوناتتارىندا ەكى التىننان الدى. تاعى 11 جارىس­تا ءبىر رەتتەن باس جۇلدەگە قول جەتكىزدى. 10 دودادا جەڭىس تۇعى­­رىنىڭ ەڭ بيىك ساتىسىنا كو­تەرىلە المادى. ءسوز ورايى كەل­گەندە, 1997 مەن 2004 جىلدارى تەگەراندا تىم سۇرەڭسىز كۇرەس­كەنىمىزدى ايتا كەتكەنىمىز ءجون. بۇل باسەكەلەردە جالعىز عا­نا قولانى قاناعات تۇتتىق. ال 2001 جىلى ۇلان­باتىردان قور­جىنىمىز بوس قايتتى.

قازاقستان جانكۇيەرلەرىنە ازيا چەم­پيوناتىنىڭ العاشقى مەدالىنىڭ سىڭ­عىرىن ەستىرتكەن يسلام بايرامۋكوۆ پەن سەرگەي نەپومنياششي. 90 كيلو سال­ماق­تا كۇرەسكەن يسلام فينالدا ات­لان­تا وليمپياداسىنىڭ جەڭىمپازى, بار­سەلونا وليمپياداسىنىڭ قولا جۇلدەگەرى, كەيىننەن ەكى دۇر­كىن الەم چەمپيونى اتان­عان يران­نىڭ داڭقتى بالۋانى راسۋل حادە­مەننەن جەڭىلىپ, كۇمىس مەدال يە­لەندى. 100 كيلو سالماقتا سايىسقا تۇس­كەن سەرگەي جارتىلاي فينالدا ءسۇرىنىپ, قولا جۇلدەنى ەنشىلەدى. 1995 جىلى مانيلادا ەلمادي جابىرايىلوۆ (82 كيلو) الدىنا جان سالمادى. بۇل – ەركىن كۇرەس شەبەرلەرىمىزدىڭ جەڭىپ العان العاشقى التىنى. قانداس­تارىمىزدىڭ اراسىنان ءدال سول مەجەگە ءبىرىنشى بولىپ جەتكەن ماۋ­لەن مامىروۆ (54 كيلو) ەدى. ول 1999 جىلى تاشكەنتتە توپ جاردى.

سارى قۇرلىقتىڭ باستى دوداسىندا ەڭ كوپ جۇلدە العان بالۋاندار كوشىن ماريد مۋتاليموۆ (120 كيلو) پەن داۋلەت نيازبەكوۆ (61 كيلو, 65 كيلو) باستاپ تۇر. ەكەۋى دە جەتى رەتتەن جەڭىس تۇعىرىنا كوتەرىلدى. 2003-2010 جىلدار ارا­لىعىندا كۇرەسكەن ماريد 3 التىن, 2 كۇمىس جانە 2 قولانى قورجىنعا سالدى. 2013-2020 جىلدار ارالى­عىندا بەلدەسكەن داۋلەت 3 التىن مەن 4 قولانى قانجىعاسىنا باي­لادى. يسلام بايرامۋكوۆ (90 كيلو, 97 كيلو), نۇرجان قاتاەۆ (96 كيلو) جانە داۋلەت شابانبايعا (96 كيلو, 125 كيلو) بەس جۇلدەدەن بۇيىردى. يسلام 1 التىن, 3 كۇمىس جانە 1 قو­لانى ولجالادى. نۇرجان 1 التىن, 2 كۇمىس جانە 2 قولانى ەن­شىلەسە, داۋلەت 1 كۇمىس پەن 4 قو­لانى يەم­دەندى.

ەركىن كۇرەستىڭ قازىرگى دامۋ بارىسىنا ناقتى باعا بەرۋ ءۇشىن سوڭعى بەس ازيا چەمپيوناتىنا جە­كە-جەكە توقتالا كەتكەندى ءجون كور­دىك. 2018 جىلى بىشكەكتە نۇر­­يسلام ساناەۆ (61 كيلو) پەن داۋ­لەت نيازبەكوۆ (65 كيلو) الدارىنا جان سالماسا, ادىلەت داۋ­­لىنباەۆ (92 كيلو) كۇمىسپەن كۇپ­­تەلدى. جاندوس يسمايىلوۆ (57 كيلو), مەيىرجان ءاشىروۆ (70 كيلو), دانيار قاي­سانوۆ (74 كيلو) جانە ازامات داۋ­لەتبەكوۆكە (86 كيلو) بۇيىر­عانى قولا مەدال. الاتاۋدىڭ ارعى بە­تىندە وزبەك­ستان (3+2+3) مەن يران (3+1+2) قۇرامالارى الدىمىزدى ورادى.

2019 جىلعى ءدۇبىرلى دودا پارسى ەلى بالۋاندارىنىڭ ايقىن جەڭىسىمەن اياق­تالدى. ولار جەتى رەت جەڭىس تۇعىرىنىڭ ەڭ بيىك ساتىسىنان قول بۇلعادى. تاعى ءۇش سپورتشىسى ءۇشىنشى ورىندى يە­لەندى. ياعني يراننىڭ بارلىق وكىلى سيان­داعى چەمپيوناتتا جۇلدە الدى. ەكى التىن, ءبىر كۇمىس جانە ەكى قولاسى بار قازاقستاندىقتار كوماندالىق سايىستا ەكىنشى ورىندى ەنشىلەدى. ءبىزدىڭ ورەندەر اراسىنان نۇرقوجا قايپانوۆ (70 كيلو) پەن دانيار قايسانوۆ (74 كيلو) وزا شاپتى. ساياتبەك وقاسوۆ (65 كيلو) ەكىنشى ساتىعا جايعاستى. عالىمجان وسەرباەۆ (79 كيلو) پەن الىشەر ەر­عالي (97 كيلو) ءۇشىنشى ورىندى يەمدەندى.

2020 جىلى ءۇندىستاننىڭ اس­تاناسىندا يران, قازاقستان, جا­پونيا جانە قىرعىزستاننىڭ ءانۇرانى ەكى رەت­تەن شىرقالدى. وزگە جۇلدەلەردى قوسا ەسەپ­­تەگەندە يراندىقتار (2+2+4) وزدى. ودان كەيىنگى ورىندارعا جاپون­دار (2+1+4) مەن قازاقتار (2+0+4) جاي­عاستى. وتانداستارىمىزدىڭ ارا­سى­نان دانيار قايسانوۆ (74 كيلو) پەن يۋسۋپ باتىرمۇرزاەۆقا (125 كيلو) تەڭ كەلەر ەشكىم تابىلمادى. داۋلەت نيازبەكوۆ (65 كيلو), مەيىرجان ءاشىروۆ (70 كيلو), يليس­حان چيلاەۆ (92 كيلو) جانە الىشەر ەرعالي (97 كيلو) جۇلدەگەرلەر ساناتىنان كورىندى.

2021 جىلى الماتىدا شىمىل­دىعى تۇرىلگەن سارى قۇرلىقتىڭ باستى دوداسىندا تالعات سىرباز (70 كيلو), نۇرقوجا قايپانوۆ (74 كيلو) جانە ولەگ بولتين (125 كيلو) وزدەرىنىڭ مىقتىلىعىن پاش ەتىپ, التىن مەدالدى مويىندارىندا جار­قىراتتى. اقتىق سىندا وزبەكستاندىق جاھانگەرمىرزا تۋبوروۆتان ايلاسىن اسىرا ال­ماعان ادلان اسقاروۆ (61 كيلو) پەن يراندىق ءالي شابانيگە ەسە جىبەرگەن الىشەر ەرعالي (97 كيلو) كۇمىستى قاناعات تۇتتى. بۇل جارىستا بەس بالۋانىمىز فينالدا كۇرەسكەنىمەن, كوماندالىق سايىس­تا يراندى تاعى دا العا جىبەردىك. ولار ءۇش التىننان بولەك, ءۇش كۇمىس پەن ەكى قولانى قانجىعاعا باي­لادى.

بىلتىر ۇلانباتىردا سەگىز جۇلدە العانىمىزدى جوعارىدا ايت­­تىق. اتالعان دودادا ازامات داۋلەتبەكوۆ (86 كيلو) قارسى كەل­گەندەردىڭ بارلىعىن قوعاداي جا­پىردى. راحات قالجان (57 كيلو), نۇر­قوجا قايپانوۆ (74 كيلو) جانە الىشەر ەرعالي (125 كيلو) – ەكىن­شى, ال اقبار قۇر­با­نوۆ (61 كيلو), تالعات سىرباز (70 كيلو), ادى­لەت داۋلىن­باەۆ (92 كيلو) جانە ما­مەد يبرا­­گيموۆ (97 كيلو) ءۇشىن­شى ورىن­دى يەلەندى.

ازيا چەمپيوناتىندا قازاق­ستاننىڭ ەركىن كۇرەس شەبەرلەرى بارلىعى 92 جۇلدەگە قول جەت­كىزدى.