7-9 ءساۋىر ارالىعىندا الماتىداعى بالۋان شولاق اتىنداعى مادەنيەت جانە سپورت سارايىندا دزيۋدودان جاسوسپىرىمدەر مەن جاستار اراسىندا ازيا كۋبوگى وتەدى.
اتالعان جارىس ايگىلى سپورت فۋنكتسيونەرى بەكەت ماحمۇتوۆتى ەسكە تۇسىرۋگە ارنالىپ وتىر. كەزىندە بۇل ازامات قازاقستان بوكسىن وراسان زور بيىككە كوتەردى. سول كىسىنىڭ باسشىلىعىمەن وتاندىق بىلعارى قولعاپ شەبەرلەرى وليمپيا ويىندارى مەن الەم چەمپيوناتى, ازيا ويىندارى جانە باسقا دا كوپتەگەن اسا ءىرى حالىقارالىق دودادا جەڭىس تۇعىرىنا كوتەرىلدى. كەيىننەن رەسپۋبليكالىق دزيۋدو فەدەراتسياسىنىڭ تىزگىنىن ۇستاپ, كۇرەستىڭ بۇل ءتۇرىنىڭ وركەندەۋىنە دە ولشەۋسىز ەڭبەك ءسىڭىردى. وسىدان ءۇش جىل بۇرىن ول ۇزاققا سوزىلعان ناۋقاستان كەيىن 81 جاسقا قاراعان شاعىندا جارىق دۇنيەمەن قوش ايتىسقان ەدى.
بەكەت ساپابەك ۇلىن ەسكە تۇسىرۋگە ارنالعان تۋرنير وسىمەن التىنشى مارتە ۇيىمداستىرىلعالى وتىر. بيىلعى جارىستا قازاقستاننان بولەك, گرەكيا, اقش, موڭعوليا, گرۋزيا, گونكونگ, وزبەكستان, تاجىكستان, تۇرىكمەنستان جانە قىرعىزستاننىڭ دزيۋدوشىلارى بەلدەسەدى دەپ كۇتىلۋدە.