بۇل كۇندەرى البانيانىڭ دۋررەس قالاسىندا اۋىر اتلەتيكادان جاسوسپىرىمدەر اراسىندا ءوتىپ جاتقان الەم بىرىنشىلىگىندە قازاقستاننىڭ قورجىنىنا العاشقى جۇلدە ءتۇستى.
اتالعان جارىسقا ءبىزدىڭ ەلدەن بارلىعى 11 سپورتشى بارعان ەدى. سولاردىڭ اراسىنان نۇراسىل اراپباي ءتاۋىر ونەر كورسەتتى. 67 كيلو سالماق دارەجەسىندە سىنعا تۇسكەن ول جۇلقىپ كوتەرۋدە قولا مەدال يەلەندى. بىراق قوسسايىستىڭ قورىتىندىسى بويىنشا نۇراسىل 266 كيلولىق (120+146) كورسەتكىشپەن جۇلدەگەرلەر قاتارىنان كورىنە الماي, ءتورتىنشى ورىندا قالىپ قويدى.
دۋررەستەگى دودادا كەشە ەراسىل ساۋلەبەكوۆ (73 كيلو) پەن التىناي تاڭىربەرگەنوۆا (59 كيلو) ونەر كورسەتتى. ال بارلىق جەڭىمپازدار مەن جۇلدەگەرلەردىڭ ەسىمى 1 ساۋىردە بەلگىلى بولادى.