ەلەنا رىباكينا اقش-تىڭ مايامي قالاسىندا ءوتىپ جاتقان جۇلدە قورى 8 800 000 دوللاردى قۇرايتىن WTA 1000 ءتۋرنيرىنىڭ شيرەك فينالىنا شىقتى.
ءتورتىنشى كەزەڭدە رىباكينا ەليزە مەرتەنسپەن كەزدەستى. قازىرگى كەزدە بەلگيالىق تەننيسشى WTA رەيتينگىندە 39 ورىندا تۇرعانىمەن, كەزىندە 12 ساتىعا دەيىن كوتەرىلگەن. حامونت-احەلدىڭ تۋماسى 2018 جىلى اۋستراليانىڭ اشىق بىرىنشىلىگىنىڭ جارتىلاي فينالىندا ويناسا, 2019 جانە 2020 جىلدارى US open دوداسىنىڭ شيرەك فينالىنا دەيىن جەتتى. WTA تۋرنيرلەرىن ول جەتى رەت ۇتتى. بۇل باسەكەنى ءوز پايداسىنا شەشۋ جەرلەسىمىزگە ايتارلىقتاي قيىندىق تۋعىزا قويعان جوق. 1 ساعات 46 مينۋتقا سوزىلعان سايىستا ەلەنا 6:4, 6:3 ەسەبىمەن جەڭىسكە جەتتى.
ءسويتىپ, ءوز مانسابىندا تۇڭعىش رەت ماياميدەگى ءتۋرنيردىڭ شيرەك فينالىنا دەيىن جەتكەن ەلەنا رىباكينا وسى مەجەدە الەمدىك رەيتينگتە 24 ساتىعا جايعاسقان يتاليالىق مارتينا ترەۆيزانمەن شەبەرلىك بايقاسادى.