استانادا سۋ قىسىمى تومەندەيدى. قالا تۇرعىندارىنا سۋدى ۇتىمدى پايدالانۋ ۇسىنىلدى. بۇل تۋرالى «استانا سۋ ارناسىنىڭ» ءباسپاسوز قىزمەتى حابارلادى, دەپ جازادى Egemen.kz.
«قالا حالقىنىڭ وسۋىنە جانە ەلوردانىڭ قارقىندى دامۋىنا بايلانىستى اۋىز سۋ وندىرۋگە ارنالعان جوبالىق قۋاتتاردىڭ تاپشىلىعى بايقالادى. «استانا سۋ ارناسى» سۋ قىسىمىن رەتتەۋ بويىنشا شارالار قابىلداۋعا ءماجبۇر:
04:30-دان 09:30-عا دەيىن سۋدىڭ قىسىمى جوعارى رەجيمدە بولادى;09:30-دان 12:00-گە دەيىن - تومەندەتىلگەن قىسىمدا;12:00-دەن 14:00-گە دەيىن - جوعارى قىسىمدا;14:00-دەن 18:00-گە دەيىن - تومەندەتىلگەن قىسىمدا;18:00-دەن 00:00-گە دەيىن - جوعارى قىسىمدا;00:00-دەن 04:30-عا دەيىن – تومەندەتىلگەن قىسىمدا», دەدى كومپانيا وكىلدەرى.
بۇل شارالار جاڭا سورعى-سۇزگى ستانتسياسى ىسكە قوسىلعانعا دەيىن قولعا الىنادى. ونىڭ قۇرىلىسى 2021 جىلدىڭ كۇزىندە باستالعان.
«تاۋلىگىنە 105 000 تەكشە مەتر وتكىزۋ قابىلەتى بۇكىل قالانى سۋمەن قامتاماسىز ەتۋدى ۇلعايتۋعا مۇمكىندىك بەرەدى. جاڭا سورعى جانە سۇزگى ستانتسياسى قۇرىلىسىن اياقتاۋ بيىلعى جازعا جوسپارلانىپ وتىر. بارلىق تۇتىنۋشىلاردان سۋدىڭ ساپاسى مەن مولشەرىنە تەرىس اسەردى ازايتۋ ءۇشىن سۋدى ۇتىمدى پايدالانۋدى سۇرايمىز. تۇسىنىستىك تانىتقاندارىڭىزعا راقمەت», دەدى كومپانيا استانالىقتارعا.