رەسەيدىڭ سامارا قالاسىندا ارالاس جەكپە-جەكتەن «Ural Fighting Championship 2» ءتۋرنيرى ءوتتى.
اتالعان جارىستىڭ باستى جەكپە-جەكتەرىنىڭ بىرىندە داۋرەن ەرمەكوۆ ونەر كورسەتتى. ورتا سالماقتا كۇش سىناسىپ جۇرگەن 35 جاستاعى قازاق فايتەرى 2012 جىلدان بەرى وسى سپورت ءتۇرىن سەرىك ەتىپ كەلەدى. سول ارالىقتا 21 كەزدەسۋ وتكىزىپ, 16 رەت جەڭىسكە جەتتى. 10 قارسىلاسىن نوكاۋتقا جىبەردى. ول سامارادا گامزات حيراماگومەدوۆپەن ايقاستى. 29 جاستاعى نالچيكتىڭ تۋماسى 11 باسەكەنىڭ تەك ەكەۋىندە عانا ۇتىلعان. جەتى جەكپە-جەكتى مەرزىمىنەن بۇرىن اياقتادى. وسىعان دەيىن بۇل سپورتشىلار ەكى مارتە كەزدەستى. 2015 جىلى اۋەسقويلار اراسىندا وتكەن تۋرنيردە گامزات ۇپاي سانىمەن جەڭىسكە جەتسە, بىلتىر جازدا اقتاۋدا داۋرەن ونى ايقىن باسىمدىقپەن ۇتتى.
ساماراداعى سايىس قانداسىمىزدىڭ جەڭىسىمەن اياقتالدى. باسەكەنىڭ ەكىنشى كەزەڭىندە ول حيرماگومەدوۆتى «قىلقىندىرۋ» ادىسىمەن جەڭدى.