استانا قالاسىنىڭ اكىمى جەڭىس قاسىمبەك Instagram پاراقشاسىندا قىس مەزگىلىنەن كەيىنگى جولداردىڭ ساپاسى تۋرالى ءمالىم ەتتى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
«كوكتەم مەزگىلىنىڭ باستالۋىمەن كەيبىر كوشەلەردە اسفالت قارمەن بىرگە اعىپ كەتكەندەي اسەر قالدىرادى. جولداردىڭ ءبارى دەرلىك ساپالى سالىنباعان. تۇرعىندار تاراپىنان دا شاعىمدار ءتۇسىپ جاتىر. جاۋاپتى باسقارما جول قىزمەتكەرلەرىمەن بىرلەسە جوندەۋدەن وتەتىن جولدار مەن كوشەلەردىڭ ساپاسىن ءارى ۇزاققا شىدامدىلىعىن قامتاماسىز ەتۋى كەرەك», دەپ جازدى جەڭىس قاسىمبەك.
اكىمنىڭ ايتۋىنشا, وتىنىشتەردى ەسكەرە وتىرىپ, كوشەلەر ءتىزىمىن جاڭارتۋ قاجەت.
«ەڭ الدىمەن, قوزعالىسى قارقىندى, جاڭا الەۋمەتتىك نىساندارى (كىرمە جولدار) بار ورىنداردى جوندەۋ قاجەت. سول سياقتى ەلدى مەكەندەردە بۇرىن مۇلدەم اسفالتتالماعان كوشەلەر دە بار. ال جاڭادان سالىنىپ جاتقان اۋدانداردا ينجەنەرلىك ينفراقۇرىلىمى مەن ۇيلەردىڭ قۇرىلىسى بىتكەننەن كەيىن عانا جولدارى سالىنادى. وعان دەيىن ۋاقىتشا توسەممەن قامتاماسىز ەتۋ قاجەت. جول جۇمىسىنىڭ ماۋسىمى قىسقا. سول سەبەپتى ۋاقىت تا تىعىز. ءبىز ساپاسىز ورىندالعان جۇمىستاردى قابىلدامايمىز», دەپ قوستى ەلوردا اكىمى.