سايتاماداعى ساتسىزدىك

بيىلعى دۇنيەجۇزىلىك دودا دا سايتامادا ءوتتى. وسى جارىستا ءبىز ميحايل شايدوروۆقا ايرىق­شا ءۇمىت ارتتىق. بىراق بىلتىر تال­ليندە جالاۋى جەلبىرەگەن جاس­تار اراسىنداعى الەم بىرىنشى­لىگىندە كۇمىس مەدالدى موينىندا جارقىراتقان 19 جاستاعى جەرلەسىمىز كۇن شىعىس ەلىندە سەنىم ۇدەسىنەن شىعا المادى. قىس­قا باعدارلامادا 18-ورىندى (75,41 ۇپاي) قاناعات تۇتقان شايدوروۆ ەركىن باعدارلامادا دا ءوزىن جاق­سى قىرىنان كورسەتە المادى. ناتي­جەسىندە, 236,93 ۇپايمەن 14-ورىندا قالىپ قويدى. بۇل جارىستا بىل­تىرعى جىلعى الەم چەمپيونى, ءۇش دۇركىن وليمپيا ويىندارىنىڭ جۇل­دەگەرى سەما ۋنو باس جۇلدەنى ولجالادى. جاپونيانىڭ جۇلدىزى 301,14 ۇپايدى ەنشىلەدى. وڭتۇستىك كورەيانىڭ وكىلى چحا چجۋن حۆان (296,03 ۇپاي) كۇمىس السا, امەري­كالىق يليا مالينين (288,44 ۇپاي) قولاعا قول سوزدى.

ايەلدەردىڭ سايىسىندا دا جەر­گىلىكتى سپورتشىنىڭ باعى جان­دى. بەيجىڭ وليمپياداسىندا قوس قولانى يەلەنىپ, 2022 جىلى مونپەلەدە توپ جارعان كاوري ساكاموتو (224,61 ۇپاي) بۇل جولى دا التىننان القا تاقتى. كورەيالىق لي حە ين (220,94 ۇپاي) ەكىنشى ورىندى يەمدەنسە, بەلگيالىق لۋنا حەندريكس (210,42 ۇپاي) ءۇشىنشى ساتىعا تابان تىرەدى.

بيشىلەردىڭ باسەكەسىندە باق سى­ناعان گاۋھار ناۋرىزوۆا مەن بوي­سانگۋر داتيەۆ قىسقا باعدارلامادا 33 ساتىعا تۇراقتاپ, جارىستىڭ في­نالدىق بولىگىندە ونەر كورسەتۋ قۇقىعىنان ايىرىلدى. باسەكەنىڭ بۇل تۇرىندە امەريكالىق مەديسون چوك پەن ەۆان بەيتس (226,01 ۇپاي) توپ جاردى. يتاليالىق شارلەن گينيار مەن ماركو فاببري (219,85 ۇپاي) ەكىنشى ورىن السا, كانا­دالىق پايپەر گيللەس پەن پول پۋارە (217,88 ۇپاي) ءۇشىنشى ساتىعا جايعاستى. جۇپتىق سايىستا جاپونيالىق ريكۋ ميۋرا مەن ريۋيتي كيحارا (222,16 ۇپاي) قارسىلاس شاق كەلتىرمەدى. اقش-تان كەلگەن الەكسا كنيريم مەن برەندون فرەيزەر (217,48 ۇپاي) جانە يتاليالىق سارا كونتي مەن نيككولو ماچي (208,08) جۇل­دەگەرلەر قاتارىنان كورىندى.