قازاقستاننىڭ ءبىرىنشى, كەشەگى كۇننەن باستاپ الەمنىڭ جەتىنشى راكەتكاسى اتانعان ەلەنا رىباكينا اقش-تاعى تاعى ءبىر ءىرى جارىس – مايامي WTA 1000 تۋرنيرىندە ونەر كورسەتەدى.
جۇلدە قورى 8,8 ملن دوللارعا باعالانعان «ماستەرس» دوداسى 21 ناۋرىز بەن 2 ءساۋىر ارالىعىندا وتەدى. قازاقستان تەننيس فەدەراتسياسىنىڭ مالىمەتى بويىنشا, جارىستىڭ 10-راكەتكاسى بولىپ تىركەلگەن رىباكينا ءتۋرنيردى ەكىنشى اينالىمنان باستايدى. بۇل كەزەڭدە ول الەمنىڭ 60-راكەتكاسى رەسەيلىك اننا كالينسكايا نەمەسە رەيتينگتە 194-ورىندا تۇرعان اندوررا وكىلى ۆيكتوريا حيمەنەس كاسينتسەۆا جۇبىنىڭ جەڭىمپازىمەن كەزدەسەدى. ەگەر جەرلەسىمىز بۇل دودادا دا ءساتتى ونەر كورسەتىپ جاتسا, فينالدا تاعى دا بەلارۋس وكىلى ارينا سوبولەنكومەن كەزدەسۋى مۇمكىن.
رىباكينادان بولەك, «ماستەرس» جارىسىندا تاعى ءبىر قازاقستاندىق تەننيسشى, الەمنىڭ 42-راكەتكاسى يۋليا پۋتينتسەۆا دا باق سىنايدى. ول العاشقى اينالىمدا رەيتينگتە 75-ساتىداعى كانادالىق رەبەككا مارينومەن شەبەرلىك بايقاسادى.