ۇلىستىڭ ۇلى كۇنى – ءاز ناۋرىز مەيرامى قارساڭىندا مۇحيتتىڭ ارعى بەتىنەن ءسۇيىنشى حابار جەتتى. تەننيستەن ەلىمىزدىڭ ءبىرىنشى, الەمنىڭ جەتىنشى راكەتكاسى, «ۇلكەن دۋلىعا» ساناتىنداعى «ۋيمبلدون» ءتۋرنيرىنىڭ جەڭىمپازى ەلەنا رىباكينا قازاقستان تەننيسشىلەرى اراسىندا تۇڭعىش رەت «BNP Paribas Open» (WTA 1000) تۋرنيرىندە توپ جاردى. ول فينالدا بەلارۋس ماقتانىشى, الەمنىڭ ەكىنشى راكەتكاسى ارينا سوبولەنكونى تىزە بۇكتىردى.
اقش-تىڭ ينديان-ۋەللس قالاسىندا ۇيىمداستىرىلعان بۇل دودا – تەننيسشىلەردىڭ «ۇلكەن دۋلىعا» ساناتىنداعى ءتورت ءىرى جارىسىنان كەيىنگى ورىندا تۇراتىن شوقتىعى بيىك باسەكە. 1974 جىلى تۇساۋى كەسىلگەن جارىستا بۇگىنگە دەيىن نەبارى 17 مەملەكەتتىڭ عانا وكىلى ۇزدىك شىققان ەكەن. ەندى بۇل قاتارعا قازاقستان تەننيسشىسى ەلەنا رىباكينا دا قوسىلدى.
اقش-تاعى تەننيسشىلەر سايىسىنىڭ فينالىن تەك قازاقستاننىڭ عانا ەمەس, بۇكىل الەمنىڭ جانكۇيەرلەرى تاعاتسىزدانا كۇتتى. ويتكەنى وسىدان بىرەر اي بۇرىن ءدال وسى ەكى تەننيسشى اۋستراليا اشىق چەمپيوناتىنىڭ فينالىندا كەزدەسىپ, سول سايىستا ارينانىڭ مەرەيى ۇستەم بولعان ەدى. ال بۇل كەزدەسۋدە كوپشىلىكتى ەلەنا رىباكينا مەلبۋرندەگى ەسەسىن قايتارا الا ما دەگەن سۇراق قىزىقتىردى.
تارتىستى باسەكەنىڭ ءبىرىنشى پارتياسىندا ەكى تەننيسشى دە اسا ساقتىقپەن ويناپ, قاتەلىك جاساماۋعا تىرىستى. بەسىنشى گەيمگە كەلگەندە ءبىرىنشى بولىپ رىباكينانىڭ جۇيكەسى سىر بەردى. دوپتى ءوزى ويىنعا قوسقان گەيمدە قارسىلاسىنا برەيك جاساۋعا مۇمكىندىك بەرىپ قويدى – 3:2. بىراق كوپ ۇزاماي ەلەنانىڭ ءوزى دە قايىرا برەيك جاساپ, تەز ارادا تارازى باسىن تەڭەستىرىپ ۇلگەردى – 4:4. كەيىنگى ءتورت گەيمدە ەكى تەننيسشى دە ساۋاتتى ويىنىمەن كوزگە ءتۇسىپ, ءبىر-ءبىرىن العا جىبەرگەن جوق – 6:6. ءسويتىپ ءبىرىنشى پارتيانىڭ جەڭىمپازى تاي-برەيكتە انىقتالدى. بۇل كەزەڭدە ەلەنا رىباكينانىڭ باعى جاندى – 7:6 (13:11). ءبىرىنشى پارتيادا تەننيسشىلەر ءبىر ساعات 20 مينۋت وينادى.
ەكىنشى سەتتى وتانداسىمىز ء«ا» دەگەننەن برەيكپەن باستادى. تابلوداعى كورسەتكىش 4:2 بولىپ تۇرعان جەتىنشى سەتتە ەلەنا تاعى دا ءبىر برەيك جاساپ, 5:2 ەسەبىمەن العا ۇزاپ كەتتى. سەگىزىنشى گەيمدە رىباكينانىڭ ويىندى اياقتايتىن تاماشا مۇمكىندىگى بولدى. بىراق دوپتى ويىنعا قوسقان سەتتە بىردە-ءبىر ۇپاي الا الماي, سوبولەنكوعا 40:0 ەسەبىمەن جول بەرىپ قويدى – 5:3. دەگەنمەن, وتانداسىمىز كەلەسى مۇمكىندىگىن 100 پايىز پايدالانىپ, ەكىنشى سەتتى 6:4 ەسەبىمەن ءوز پايداسىنا اياقتادى. ەكى ساعاتتان استام ۋاقىتقا سوزىلعان باسەكە بارىسىندا ەلەنا 7 ەيس جاساپ, 10 برەيك-پوينتتىڭ ۇشەۋىن پايدالاندى.
وسىلايشا, العاش رەت WTA 1000 جارىسىنىڭ جەڭىمپازى اتانعان ە.رىباكينا ا.سوبولەنكودان اۋستراليا اشىق چەمپيوناتىنىڭ فينالىندا كەتكەن ەسەسىن قايتاردى. سونداي-اق ەلەنا رىباكينا سپورتتىق جولىندا العاش رەت الەمدىك رەيتينگتە جەتىنشى ورىنعا كوتەرىلدى. بۇل – ونىڭ جەكە رەكوردى.
ەلەنا رىباكينانىڭ «BNP Paribas Open» تۋرنيرىندەگى ءجۇرىپ وتكەن جولىنا زەر سالار بولساق, جارىستى ەكىنشى اينالىمنان باستاعان ول العاشقى كەزدەسۋىن 2020 جىلعى اۋستراليا اشىق چەمپيوناتىنىڭ جەڭىمپازى, الەمدىك رەيتينگتە 170-ورىندا تۇرعان امەريكالىق سوفيا كەنيندى (7:6, 7:6), ءۇشىنشى كەزەڭدە الەمنىڭ 22-راكەتكاسى يسپانيالىق پاۋلا بادوسانى (6:3, 7:5), ءتورتىنشى اينالىمدا دۇنيەجۇزىلىك رەيتينگتە 66-ساتىعا جايعاسقان رەسەيلىك ۆارۆارا گراچەۆانى (6:3, 6:0) جەڭىپ, شيرەك فينالعا جولداما الدى. ال ¼ فينالدا كارولينا مۋحوۆانى ەكى سەتتە 7:6, 6:4 ەسەبىمەن جارىس جولىنان ىعىستىرسا, جارتىلاي فينالدا الەمنىڭ 1-راكەتكاسى پولشالىق يگا شۆەنتەكتەن ايلاسىن اسىردى – 6:2, 6:2.
«BNP Paribas Open» تۋرنيرىندە توپ جارعان ەلەنا رىباكينا 1 271 230 اقش دوللارى (574 550 449 ملن تەڭگە) كولەمىندەگى قارجىلاي سىياقى مەن 1 000 رەيتينگتىك ۇپايعا يە بولدى. ال ءتۋرنيردىڭ ەرلەر اراسىنداعى باسەكەسىندە 19 جاستاعى يسپانيالىق كارلوس الكاراس جەڭىس تۇعىرىنا كوتەرىلدى. ول فينالدا رەسەيلىك دانيل مەدۆەدەۆتى ەكى سەتتە 6:3, 6:2 ەسەبىمەن تىزە بۇكتىردى.