قاسىم-جومارت توقاەۆتىڭ اتىنا ناۋرىز مەرەكەسىنە وراي شەت مەملەكەتتەردىڭ باسشىلارىنان قۇتتىقتاۋلار كەلىپ ءتۇسىپ جاتىر, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
قىتاي حالىق رەسپۋبليكاسىنىڭ توراعاسى سي تسزينپين ەل ۇكىمەتى مەن حالقىنىڭ, سونداي-اق ءوزىنىڭ اتىنان جولداعان قۇتتىقتاۋ جەدەلحاتىندا دوستاس قازاقستان حالقىنا باق-بەرەكە, ال قاسىم-جومارت توقاەۆقا زور دەنساۋلىق جانە ونىڭ جاۋاپتى جۇمىسىنا تابىس تىلەدى.
– مەن قىتاي جانە قازاقستان اراسىنداعى قارىم-قاتىناستىڭ دامۋىنا ايرىقشا ءمان بەرەمىن. ءسىزدىڭ قىتايعا مەملەكەتتىك ساپارمەن كەلەتىنىڭىزگە جانە بيىل مامىر ايىندا وتەتىن العاشقى «قىتاي – ورتالىق ازيا» سامميتىنە قاتىساتىنىڭىزعا قۋانىشتىمىن. ەكى ەلدىڭ ىنتىماقتاستىعىن ودان ءارى دامىتۋ, سونداي-اق قىتاي مەن ورتالىق ازيا اراسىنداعى بايلانىستى نىعايتۋ ماسەلەلەرى جونىندە وزىڭىزبەن پىكىر الماسامىز دەپ سەنەمىن, – دەپ جازىلعان سي ءتسزينپيننىڭ جەدەلحاتىندا.
اقش پرەزيدەنتى دجو بايدەن قاسىم-جومارت توقاەۆتى جانە قازاقستان حالقىن ناۋرىز مەيرامىمەن جانە رامازان ايىنىڭ باستالۋىمەن قۇتتىقتادى.
– ەلدەرىمىزدىڭ اراسىنداعى ءوزارا ستراتەگيالىق سەرىكتەستىك پەن حالىقتارىمىزدىڭ دوستىق قارىم-قاتىناسى بۇكىل ايماقتاعى بەيبىتشىلىكتى ساقتاۋعا جانە ءوڭىردى وركەندەتۋگە سەپتىگىن تيگىزەدى. بۇگىن استانادان الماتىعا دەيىنگى جانە بۇكىل ەل تۇرعىندارى كوكتەمگى جاڭارۋ مەرەكەسىن تويلايدى. قازاقستاننىڭ جارقىن بولاشاعىن جانە ەلدە تەڭ قۇقىقتار مەن مۇمكىندىكتەردى قامتاماسىز ەتەتىن ءسىزدىڭ ساياسي جانە ەكونوميكالىق رەفورمالارىڭىزدى امەريكا قۇراما شتاتتارى ءاردايىم قولدايتىنىن راستايمىن. ناۋرىز قۇتتى بولسىن! ۇلىس وڭ بولسىن! – دەپ جازعان دجو بايدەن.