اباي وبلىسىندا سايلاۋ كۇنى ءسان-سالتاناتى جاراسقان ءتۇرلى ءىس-شارالار كوپ ۇيىمداستىرىلدى. ۇلىستىڭ ۇلى كۇنى قارساڭىنداعى تاريحي ساتتە قىدىر اتا سايلاۋشىلارعا اق باتاسىن بەرىپ, ۇمىتكەرلەرگە ساتتىلىك تىلەدى. سايلاۋ كۇنى تىركەلگەن ەلەۋلى وقيعالار دا بولدى.
اياگوز قالاسىندا تۇراتىن ەگىز قىز – ايدانا مەن گۇلدانا العاش رەت داۋىس بەرسە, تىل ارداگەرى كۇلپاش جاقىپقىزى دا ساياسي ناۋقاننان تىس قالماي, بالالارىنىڭ كومەگىمەن ءوز تاڭداۋىن جاسادى. 1924 جىلى بۇرىنعى ابىرالى اۋدانىندا دۇنيەگە كەلگەن قاريا «ەڭبەك ەرى» سەكىلدى جوعارى ماراپاتتاردىڭ يەگەرى.
– ەلىمىزدە سايلاۋ بولىپ جاتىر دەگەندى ەستىپ وتىرمىن. ەلىمىزدە بەرەكە-بىرلىك بولسىن, سوعىس بولماسىن! – دەپ جۇرەكجاردى لەبىزىن ءبىلدىردى كۇلپاش جاقىپقىزى.
وزگە وڭىردەگىدەي اباي وبلىسىندا دا سايلاۋشىلارعا مەرەكەلىك ناۋرىزكوجە مەن باۋىرساق ۇسىنىلدى. ۋچاسكەگە ەرتە كەلگەن سايلاۋشىلارعا كادەسىيلار تاراتىلدى.
– بۇل سايلاۋدى حالقىمىز كوپتەن بەرى كۇتتى. سول ءۇشىن دە بۇگىن قۋانا-قۋانا كەلدىك. 18 جاسقا تولعان ءار ازامات ءوزىنىڭ كونستيتۋتسيالىق قۇقىعىن پايدالانا وتىرىپ, سايلاۋعا اتسالىسۋعا ءتيىس, – دەدى سەمەي قالالىق قوعامدىق كەڭەسىنىڭ توراعاسى شاعان جۇماقسانوۆ.
وسى كۇنگى ەلەۋلى وقيعالاردىڭ تاعى ءبىرى سايلاۋ ۋچاسكەسىندە سەمەيلىك جىگىت سۇيىكتىسىنە تۇرمىسقا شىعۋ جونىندە ۇسىنىس جاسادى. ولار بولاشاقتا شاڭىراقتارىندا ۇل تۋسا, ەسىمىن سايلاۋبەك قويامىز دەپ ىرىمدادى. 19 ناۋرىز كۇنى اباي وبلىسىندا 18 ءسابي دۇنيەگە كەلسە, ونىڭ 12-ءسى – قىز, التاۋى – ۇل. بىلە بىلسەك, بۇگىنگى ۇرپاقتىڭ ەرتەڭى جارقىن بولۋى ءۇشىن اركىم سايلاۋعا بارىپ, ءوز تاڭداۋلارىن جاساۋ كەرەك.
اباي وبلىسى