سامار اۋدانى, باستاۋشى اۋىلىنىڭ كوكپارشىلارى ءبىر كىسىدەي كەلىپ, №835 سايلاۋ ۋچاسكەسىندە ءوز تاڭداۋلارىن جاسادى, دەپ حابارلايدى Egemen.kz.
ۇلتتىق سپورتتى سەرىك ەتىپ جۇرگەن جىگىتتەر ۇلىستىڭ ۇلى كۇنى قارساڭىندا ءوتىپ جاتقان ساياسي ناۋقانعا ءبىر كىسىدەي قاتىسىپ قايتپاق نيەتتە اتقا قونعان. ساپتاما ەتىك كيىپ, توبىلعى قامشى ۇستاعان ولار باستاۋشى اۋىلىنداعى ءوز تاڭداۋلارىن جاسادى.
«بۇگىنگى كۇن ءبىز ءۇشىن جاۋاپتى كۇن بولدى. سوندىقتان اۋىلداعى كوكپارشىلار جينالىپ, بىرگە بارىپ داۋىس بەردىك. جالپى سايلاۋعا اركىم جاۋاپكەرشىلىكپەن قاراپ, ەل ەرتەڭى ءۇشىن داۋىس بەرسە ەكەن», دەيدى كوكپارشى سەرىك اسحات ۇلى.
سامار اۋدانى, باستاۋشى اۋىلىنىڭ بەرەكە-بىرلىگى جاراسقان ۇيىمشىل اۋىل. ايتپاعىمىز, ساياسي ناۋقانعا كوكپارشىلار عانا ەمەس, اۋىل حالقى تايلى-تۇياعىمەن قاتىسىپ جاتىر.