كەشە استانادا باس پروكۋرور اسحات داۋىلباەۆتىڭ جەمقورلىققا قارسى ورگاندارى حالىقارالىق قاۋىمداستىعىنىڭ باس حاتشىسى, قىتاي حالىق رەسپۋبليكاسى جوعارعى حالىق پروكۋراتۋراسى قۋدالاۋ كوميتەتىنىڭ مۇشەسى يە فەنگپەن كەزدەسۋى ءوتتى.
باس پروكۋرور قوناقتى پروكۋراتۋرا ورگاندارى قىزمەتىنىڭ باسىم باعىتتارى, قازاقستاننىڭ سىبايلاس جەمقورلىقپەن كۇرەس سالاسىندا قولدانىپ وتىرعان ناقتى شارالارى جونىندە حاباردار ەتتى. ول سىبايلاس جەمقورلىققا قارسى كۇرەستى مەملەكەتتىك ساياساتتىڭ باسىم باعىتتارىنىڭ ءبىرى ەكەنىن اتاپ كورسەتتى. ەلىمىزدە سىبايلاس جەمقورلىققا قارسى زاڭنامانى جەتىلدىرۋ بويىنشا اۋقىمدى جۇمىستار جۇرگىزىلۋدە, سىبايلاس جەمقورلىق كورىنىستەرىنە قارسى تۇرۋعا باعىتتالعان شارالار قابىلدانۋدا.
تاراپتار سىبايلاس جەمقورلىققا توسقاۋىل قويۋدىڭ وزەكتى ماسەلەلەرى بويىنشا پىكىر الماستى. يە فەنگ بولىپ وتكەن كەزدەسۋدىڭ ماڭىزدىلىعىن ايتىپ, جەمقورلىقپەن كۇرەس سالاسىنداعى بەلسەندى ءوزارا ىقپالداستىققا ريزاشىلىعىن ءبىلدىردى, – دەپ حابارلادى باس پروكۋراتۋرانىڭ ءباسپاسوز قىزمەتى.