پەتر چايكوۆسكيدىڭ «يولانتا» وپەراسىنىڭ كونتسەرتتىك قويىلىمىن كورەرمەن نازارىنا «استانا وپەرا» حالىقارالىق وپەرا اكادەمياسىنىڭ سوليستەرى ۇسىندى. ماحابباتتىڭ الاپات كۇشى جايلى حيكايا كورەرمەنگە تاڭسىق ەمەس. جاس تالانتتاردىڭ ونەرىمەن ورىلگەن ايگىلى شىعارما بۇل جولى جاڭا فورماتتا شىقتى. قويۋشى ديريجەر رۋسلان ءبايمۋرزيننىڭ شەبەر ەكپىنىمەن مۋزىكانى تەاتردىڭ سيمفونيالىق وركەسترى مەن حورى ناقىشىنا كەلتىرىپ ورىندادى.
«استانا وپەرا» حالىقارالىق وپەرا اكادەمياسىنىڭ العاشقى شىعارىلىمى دارىندى جاس انشىلەردى جينادى. ولار ۇستازدارى بەرگەن ءبىلىم مەن تاجىريبەنى اسقان قىزىعۋشىلىقپەن قابىلداپ ءجۇر. مۇنداعى ءدارىس بەرۋشىلەر دە ءوز ءىسىنىڭ مايتالماندارى, – دەپ اتاپ ءوتتى «استانا وپەرا» ديرەكتورى عالىم احمەدياروۆ. – جاستار شەبەر ورىنداپ شىققان «يولانتا» وپەراسىنىڭ كونتسەرتتىك قويىلىمى – ولاردىڭ مانسابىنداعى ماڭىزدى ەمتيحان, شىعارماشىلىق جەتىلۋدىڭ جاڭا كەزەڭى. تەاترىمىزدىڭ كورەرمەندەرى جاس داۋىستارعا ەرەكشە ىلتيپاتپەن قاراپ, اكادەميستەردى قولدايدى. جاقىن ارادا ولاردىڭ ءوز الەۋەتتەرىن اشۋعا جاڭا مۇمكىندىكتەرى پايدا بولادى دەگەن ۇمىتتەمىز. اكادەميا تۇلەكتەرىنىڭ قازاقستاندا عانا ەمەس, شەتەلدە دە ونەر كورسەتەتىندەرىنە سەنەمىز».
«يولانتا» وپەراسى نازىك ليريكاسىمەن, جاسامپاز, ءپوزيتيۆتى ويلاۋىمەن, تەرەڭ ءارى تازا مانىسىمەن ەرەكشەلەنەدى. شىعارمانىڭ جەلىسى ەسىڭىزدە بولار, كوزى كورمەيتىن ءھام ونىسىن ءوزى بىلمەيتىن يولانتا بىردە قاتتى عاشىق بولادى. ۇلى ماحابباتىنىڭ اسەرىنەن جانارى اشىلىپ سالا بەرەدى. بۇل ءبىر تاڭعاجايىپ وقيعا دەرسىز. قويىلىمنىڭ باستى يدەياسىن جۇزەگە اسىرۋ ءۇشىن رەجيسسەر ەرەنباق تويكەنوۆ وپەرانىڭ مازمۇنىنا ەكپىن جاساپ, وعان قاراپايىم دەكوراتسيالار قوستى, ياعني تەاتر ساحناسىنىڭ زاماناۋي تەحنولوگيالىق مۇمكىندىكتەرىن پايدالاندى. بۇل ءتاسىل كورەرمەننىڭ نازارىن مۋزىكا مەن سوليستەردىڭ داۋىستارىنا اۋدارتۋعا مۇمكىندىك بەردى.
بەيتانىس ادامداردىڭ كەلۋى بەيقام ءومىرىن تۇبەگەيلى وزگەرتكەن زاعيپ قىز يولانتانىڭ باستى پارتياسىن ۇلپان اۋباكىروۆا مەن ايگەرىم امانجولوۆا ورىندادى. باستى ەرلەر پارتيالارى ۆودەمون مەن روبەرتتى سايان يسين مەن وراز مۇحامەديار, راسۋل جارماعامبەتوۆ پەن ازات مالىك سومدادى. باستى كەيىپكەردىڭ اكەسى – رەنە پاتشانىڭ رولىندە ۆالەري سەليۆانوۆ پەن شىڭعىس راسىلحان ونەر كورسەتتى. ال بريگيتتانىڭ ءرولىن نازىم ساعىنتاي مەن گۇلدانا الدادوسوۆا ورىنداسا, سونداي-اق لاۋرانى تانىستىرعان اسەم اۋباكىروۆا مەن داريعا مۇساەۆا كوپشىلىكتى داۋىستارىمەن باۋراپ الدى. ماۆريتانيالىق دارىگەر ەبن-حاكيانى دىنمۇحامەد كوشكىنباەۆ پەن ەرجان سايپوۆ, المەريكتى نۇرقانات تاپيەۆ پەن تالعات اللابيرينوۆ, قاراۋىلشى بەرتراندى جانداربەك ەركىنباەۆ شەبەر سومدادى. ال باستى كەيىپكەردىڭ كۇتۋشىسى مارتانى «استانا وپەرانىڭ» جەتەكشى ءسوليسى تاتيانا ۆيتسينسكايا تانىستىردى.
ايتا كەتەيىك, جاس ورىنداۋشىلارعا ونەر كورسەتۋگە دايىندالۋعا حالىقارالىق كوۋچتەر – ۇلكەن تەاتردىڭ جاستار وپەرا باعدارلاماسىنىڭ كوركەمدىك جەتەكشىسى دميتري ۆدوۆين مەن ارمەنيانىڭ حالىق ءارتىسى بارسەگ تۋمانيان كومەك كورسەتتى.
«اڭىزعا اينالعان يولانتانىڭ پارتياسىن ورىنداۋ مەن ءۇشىن ۇلكەن مارتەبە. ويتكەنى ونىمەن ۇزدىك الەمدىك سوپرانولار ساحناعا شىققان بولاتىن. سوندىقتان ءوز رولىمە بارىنشا جاۋاپكەرشىلىكپەن كەلدىم. دايىندىق ۆوكالدىق-تەحنيكالىق تۇرعىدان ەرەكشە قيىندىقتار تۋعىزعان جوق. كەيىپكەردىڭ ۋايىمىن, ەموتسياسىن, مىنەزىن, ونى تولىققاندى ادام ەتىپ كورسەتەتىن باسقا دا قاسيەتتەرىن بەرۋ وڭاي بولعان جوق. يولانتا ءوزى مۇلدەم بەيحابار بولعان سىرقاتىنا قاراماستان ءومىردى ءسۇيدى. ۇزاق ويلانىپ-تولعانىپ, سايكەس كەلەتىن بەينەنى ىزدەدىم. مەنىڭ يولانتام كۇتۋشىسىنە, قۇربىلارىنا, اكەسىنە جانە اينالاسىنداعى بارلىق جانعا مەيىرىمدى, كىشىپەيىل, نازىك, جايدارى دا سەزىمتال», دەيدى اكادەميا ءسوليسى ۇلپان اۋباكىروۆا.
وپەراعا كەلگەن كورەرمەن راۋشان قۇرمانباەۆا «يولانتانى» العاش رەت تاماشالاعانىن ايتتى.
«وپەرا اكادەمياسى سوليستەرىنىڭ ونەر كورسەتۋلەرىنە ءبىرىنشى رەت كەلىپ وتىرعان جوقپىن, ءار كەلگەن سايىن وسىناۋ جاس انشىلەرگە تامسانامىن, قۋات الامىن. اسىرەسە تۇراقتى كەلەتىن كورەرمەن وسى كاسىبي ءوسۋدى بايقايدى. باستى ءرولدى ورىنداعان ۇلپان اۋباكىروۆانى ەرەكشە اتاپ وتكىم كەلەدى, ونىڭ اۋەدە قالىقتاعان داۋىسىن تاپجىلماستان تىڭدادىم. ول يولانتانىڭ سەزىمدەرىن ءدال جەتكىزە ءبىلدى», دەدى ول.
ەسكە سالساق, «استانا وپەرا» حالىقارالىق وپەرا اكادەمياسى قازاقستاننىڭ وپەرا ونەرىن جەتىلدىرۋ جانە الەمدىك تەاتر الاڭدارىندا ەلىمىزدىڭ دارەجەسىن ارتتىرۋ ماقساتىندا شىعارماشىل دارىندى جاستاردى شەتەلدىك كوۋچتارمەن كاسىبي دايارلاۋ ءۇشىن ەلوردا تەاترى جانىنان 2019 جىلى قۇرىلعان ەدى.