OpenAI كومپانياسى ءوزىنىڭ تانىمال chatgpt چاتبوتىنا ءبىرشاما وزگەرىستەر ەنگىزىپ, جاڭا نۇسقاسىن جاساپ شىقتى, دەپ حابارلايدى Egemen.kz.
سhatgpt چاتبوتتىڭ سوڭعى نۇسقاسى ماتىنمەن جانە سۋرەتتەرمەن دە جۇمىس ىستەي الادى. ازىرلەۋشىلەر جاڭا چاتبوتتىڭ 25 مىڭ سوزگە دەيىن, ياعني بۇرىڭعىدان قاراعاندا 8 ەسە كوپ اقپاراتتى تاۋىپ, جۇيەلەپ بەرە الاتىنىن اتاپ ءوتتى.
Reuters اگەنتتىگىنىڭ حابارلاۋىنشا, OpenAI باسشىسى گرەگ بروكمان ونلاين پرەزەنتاتسيا كەزىندە GPT-4-ءتىڭ كەيبىر مۇمكىندىكتەرىن تانىستىرعان. ەندى جاساندى ينتەللەكت قولمەن سالىنعان ەسكيزدىڭ فوتوسۋرەتى نەگىزىندە ناقتى ۆەب-سايت تا جاساپ بەرە الادى.
سونىمەن قاتار جاساندى ينتەللەكت زاڭ سالاسى بويىنشا ەمتيحان تاپسىرىپ, ۇزدىك ناتيجە كورسەتكەن ستۋدەنتتەردىڭ قاتارىنا كىرگەن.
چاتبوت ىسكە قوسىلعاننان باستاپ, جاساندى ينتەللەكتەن قولدانۋشىلار كوبىنە ان, ولەڭ, جارناما جانە كومپيۋتەرلىك كود جازىپ بەرۋىن سۇراعان. كومپانيا وسى سۇرانىستى ەسكەرە وتىرىپ, چاتبوتقا ولەڭ, ءان جازىپ بەرە الاتىن مۇمكىندىك قوسقان.
ازىرگە پايدالانۋشىلارعا GPT-4 چاتبوتىنىڭ ايىنا 20 دوللار تۇراتىن اقىلى نۇسقاسى عانا قولجەتىمدى.
ايتا كەتسەك, قولدانۋشىلار اراسىندا ءۇي تاپسىرماسىن ورىنداۋ ءۇشىن روبوتقا جۇگىنەتىن ستۋدەنتتەر مەن مەكتەپ وقۋشىلارى كوبەيگەن.