بيىلعى جىل ءدارى-دارمەك باعاسىنىڭ وسۋىمەن باستالدى. دارىلىك پرەپاراتتار ءوندىرىسى 2022 جىلدىڭ قاڭتارىمەن سالىستىرعاندا اقشالاي تۇردە 61,3%-عا جانە ناقتى ماندە 57,3%-عا ءوستى, دەپ حابارلايدى Egemen.kz.
ەnergyprom ساراپشىلارى اتاپ وتكەندەي, 2023 جىلدىڭ ءبىرىنشى ايىندا فارماتسەۆتيكالىق ونىمدەردىڭ ءوندىرىسى 17 ملرد تەڭگەگە جەتتى, ونىڭ 15,7 ملرد تەڭگەسى دارىلىك زاتتارعا, 1,3 ملرد تەڭگەسى باسقا فارماتسەۆتيكالىق ونىمدەرگە تيەسىلى.
دارىلىك زاتتاردىڭ ءوندىرىسى 2022 جىلعى قاڭتارمەن سالىستىرعاندا اقشالاي تۇردە 61,3%-عا (جانە ناقتى ماندە 57,3%-عا), باسقا فارماتسەۆتيكالىق ونىمدەر – 22,9%-عا ءوستى (بىراق مۇندا ناقتى ءوسىم 0,1%-دى قۇرادى).
2022 جىلى ءدارى-دارمەك ءوندىرىسىنىڭ كولەمى 142 ملرد تەڭگەنى قۇرادى, بۇل 2021 جىلدىڭ قاڭتار-جەلتوقسانىمەن سالىستىرعاندا قۇندىق ماندە 4,5%-عا از, ال باسقا فارماتسەۆتيكالىق ونىمدەردىڭ ءوندىرىسى بىردەن 2,4 ەسەگە, ياعني 17,9 ملرد تەڭگەگە دەيىن قىسقاردى.
فارماتسەۆتيكانىڭ انتيبيوتيكتەر سياقتى ماڭىزدى سەگمەنتىندە وتاندىق كومپانيالار سۇرانىستى (ىشكى نارىق جانە ەكسپورت) 2021 جىلعى 14,8%-عا قارسى 18,4%-عا قامتاماسىز ەتتى. سالاداعى ءوندىرىس ءبىر جىل ىشىندە ءبىر جارىم ەسە ءوسىپ, 2022 جىلدىڭ قاڭتار-جەلتوقسانىندا 14,1 تونناعا جەتتى. انتيبيوتيكتەردىڭ يمپورتى 15,2%-عا, بىردەن 62,4 تونناعا دەيىن ءوستى. ىشكى نارىقتا انتيبيوتيكتەردى ساتۋ 20,4%-عا ءوسىپ, 76,5 توننانى قۇرادى. قازاقستان رەسپۋبليكاسىنان سەكتورداعى ەكسپورت شامالى (27,7 كگ) بولدى.
پروۆيتاميندەر مەن ۆيتاميندەرگە كەلەتىن بولساق, شىن مانىندە قازاقستان رەسپۋبليكاسىنداعى بۇل نارىق يمپورتپەن تولىعىمەن جابىلعان. وتاندىق فارماتسەۆتيكالىق كومپانيالار 2022 جىلى نەبارى 0,1 توننا ءونىم شىعاردى. بۇل 2021 جىلمەن بىردەي سوما, ياعني سۇرانىستىڭ 0,03%-ى عانا. بۇل رەتتە سەكتورداعى يمپورت ءبىر جارىم ەسە ءوسىپ, 307 توننا ءدارىنى قۇرادى. قازاقستان رەسپۋبليكاسىنان پروۆيتاميندەر مەن ۆيتاميندەردىڭ ەكسپورتى ءبىر جىلدا 2,7 ەسەگە ازايىپ, 2022 جىلعى قاڭتار-جەلتوقسان ايلارىندا 3,8 توننانى قۇرادى. ىشكى نارىقتاعى ساتۋ كولەمى ءبىر جارىم ەسەدەن استام ءوسىپ, 303,3 تونناعا جەتتى.
2023 جىلدىڭ اقپان ايىندا فارماتسەۆتيكالىق ونىمدەردىڭ باعاسى ايىنا 1,2%-عا ءوستى. وتكەن جىلدىڭ اقپان ايىندا دا وسى سەكتوردا باعانىڭ ءوسۋى وسىعان ۇقساس بولدى.
سوڭعى ءبىر جىلدا فارماتسەۆتيكالىق ونىمدەر باعاسىنىڭ اي سايىنعى ايتارلىقتاي ءوسۋى ناۋرىز جانە ءساۋىر ايلارىندا (1,7%-عا), ودان كەيىن قازاندا (1,6%-عا) بايقالدى.
جىلدىق ديناميكا بويىنشا فارماتسەۆتيكالىق ونىمدەر 13,6%-عا قىمباتتادى, بۇل 2017 جىلعى قاڭتاردان بەرگى ەڭ جوعارى جىلدىق ءوسۋ قارقىنى بولىپ سانالادى.
وڭىرلىك بولىنىستە بيىلعى جىلدىڭ اقپان ايىندا فارماتسەۆتيكالىق ونىمدەر قۇنىنىڭ جىل سايىنعى ءوسۋى الماتى وبلىسىندا 7,2%-دان الماتى قالاسىندا 21,2%-عا دەيىن بولدى. سونداي-اق ماڭعىستاۋ (18,3%-عا), سولتۇستىك قازاقستان (15,4%-عا) جانە قىزىلوردا (15,3%-عا) وبلىستارىندا دا ايتارلىقتاي ءوسىم بايقالدى.