تۇركيانىڭ كونيا قالاسىندا WKF كاراتەدەن ا سەرياسىنا كىرەتىن حالىقارالىق باسەكە مارەسىنە جەتتى. وسى ماۋسىمداعى ەكىنشى تۋرنيردە ونەر كورسەتكەن ەلىمىزدىڭ تاتامي شەبەرلەرى تولايىم تابىسقا قول جەتكىزىپ, ەكى التىن مەدال جەڭىپ الدى.
سپورتتى دامىتۋ ديرەكتسياسىنىڭ مالىمەتى بويىنشا, قازاقستان قۇراماسى ساپىنان كۋميتە باعدارلاماسىندا سىنعا تۇسكەن 55 كيلو سالماقتاعى بەللا ساماشەۆا فينالدا بوسنيا جانە گەرتسەگوۆينا سپورتشىسى نەيرا ءشيپوۆيچتى قاپى قالدىرىپ, جارىس جەڭىمپازى اتانسا, 68 كيلوداعى لاۋرا الىقۇل دا تۇركيا تاتاميىندە قارسىلاس شاق كەلتىرمەي, التىننان القا تاقتى.
وزگە جەرلەستەرىمىزدەن ماليكا ءابجانوۆا (-50 كگ), اسەمگۇل ەرداۋلەت (-55 كگ), ۆەنەرا جاقسىباەۆا (-68 كگ), ايدوس مۇحات (-67 كگ), باتىرعالي ءابىلمانسۇر (-75 كگ) ءوز سالماعىندا 5-ورىنعا تۇراقتادى. انادولىداعى جارىسقا ەل قۇراماسىنان جالپى سانى 49 سپورتشى قاتىسقان بولاتىن. مۇندا ەڭ كوپ سپورتشىنى جارىس قوجايىنى تۇركيا (187 سپورتشى) قوسسا, ودان كەيىن يران (136 سپورتشى) مەن يتاليا (75 سپورتشى) تۇر.
جالپى, تۇركياداعى تۋرنيردە الەمنىڭ 76 ەلىنەن كەلگەن 1 100 كاراتەشى شەبەرلىك بايقاستى. سەريانىڭ كەلەسى ءتۋرنيرىن ريچموند-ۆانكۋۆەر (كانادا), لارناكا (كيپر) مەن ماتوزينيۋش (پورتۋگاليا) قالالارى قابىلدايدى. ماۋسىمداعى العاشقى باسەكە گرەكيا استاناسىندا وتكەن بولاتىن.
ايتا كەتەيىك, ا سەرياسىنداعى باسەكەلەردە ەڭ كوپ ۇپاي جيناپ, ءوز سالماعىنداعى رەيتينگتە 32 مىقتىنىڭ قاتارىنا ەنگەن سپورتشىلار جوعارى ساناتتاعى پرەمەر-ليگا سايىستارىنا جولداما الادى.