ەلىمىزدە قىسقى سپورت تۇرلەرىنىڭ دامۋ قارقىنى كوڭىل قۋانتارلىقتاي جاعدايدا ەمەس. بۇگىندە تەك شورت-ترەك پەن كونكيمەن جۇگىرۋ سپورتىندا عانا ءبىرشاما تابىسىمىز بار دەپ ايتۋعا بولادى. وعان جەرلەستەرىمىزدىڭ الەم كۋبوگى كەزەڭدەرىندە اراگىدىك ۇزدىكتەر قاتارىنان كورىنىپ, ەل قورجىنىنا جۇلدە سالىپ جۇرگەنى دالەل بولا الادى. سونداي-اق كەيىنگى جىلدارى بياتلون سپورتىندا ىلگەرىلەۋ بايقالادى. سونىڭ ايعاعى رەتىندە جۋىردا ششۋچينسكىدە تۇڭعىش رەت بياتلوننان جاسوسپىرىمدەر مەن جاستار اراسىنداعى الەم چەمپيوناتى ۇيىمداستىرىلدى.
ششۋچينسك قالاسىنداعى قىسقى سپورت تۇرلەرى بويىنشا وليمپيادالىق دايارلاۋ ورتالىعىنىڭ بازاسىندا وتكەن جارىسقا جەر-جاھاننىڭ 39 ەلىنەن كەلگەن 600-گە جۋىق سپورتشى قاتىسىپ, ءبىر اپتاعا جالعاسقان الەمدىك دودادا 18 جۇلدە جيىنتىعىن ساراپقا سالدى. بياتلون جارىستارىنىڭ كوشباسشىسى سانالاتىن گەرمانيا سپورتشىلارى باسەكەنىڭ العاشقى كۇنىنەن باستاپ جارىس تىزگىنىن ءوز قولدارىنا الىپ, جاھاندىق سايىستىڭ سوڭىنا دەيىن جالپىكوماندالىق ەسەپتە ەشكىمگە دەس بەرگەن جوق.
ماسەلەن, وليمپيا ويىندارىنىڭ جەڭىمپازى, الەم كۋبوگى جارىستارىنىڭ بىرنەشە دۇركىن چەمپيوندارى ارند پايففەر مەن ماگدالەنا نوينەردىڭ ءىزباسارلارى توعىز قاشىقتىق بويىنشا وق بويى وزىق شىقتى. اتاپ ايتقاندا, جاسوسپىرىمدەر اراسىنداعى ۇلدار سايىسىندا بەندجامين مەنتس 15 شاقىرىمعا جەكەلەي جارىستا الەم چەمپيونى اتانسا, قىزدار باسەكەسىندە سەلينا گروتيان 7,5 شاقىرىمدىق سپرينتتە جانە 10 شاقىرىمعا ءىز كەسۋدە مارە سىزىعىن ءبىرىنشى كەستى. سونىمەن قاتار گەرمانيانىڭ ءجاسوسپىرىم قىزدار قۇراماسى ەستافەتادا توپ جارسا, ارالاس ەستافەتادا فرانتسيا جانە نورۆەگيا سپورتشىلارىن ارتقا تاستاپ, التىننان القا تاقتى.
ال جاستار اراسىنداعى جارىستا گەرمانيانىڭ ەرلەر قۇراماسى ۇزدىكتەر قاتارىنان كورىنە الماسا دا, قىزدارى بارلىق قاشىقتىق بويىنشا جەڭىمپاز اتاندى. يۋليا كينك 10 شاقىرىمعا جەكەلەي جارىستا تۇعىردىڭ ەڭ بيىك ساتىسىنان كورىنسە, يۋليا تاننحايمەر 6 شاقىرىمدىق سپرينت پەن 7,5 شاقىرىمدىق ءىز كەسۋدە الدىنا جان سالمادى. ەستافەتا سايىسىندا دا نەمىس قىزدارىنىڭ باعى جاندى.
وسىلايشا, جاسوسپىرىمدەر مەن جاستار اراسىنداعى الەم چەمپيوناتىندا 9 التىن, 6 كۇمىس مەدال جەڭىپ العان گەرمانيا بياتلونشىلارى جالپىكوماندالىق ەسەپتە ءبىرىنشى بولدى. ەكىنشى ورىنعا 5 التىن, 3 كۇمىس جانە 9 قولا مەدال ولجالاعان داڭقتى ۋلە-ەينار بيورندالەننىڭ وتانداستارى جايعاسسا, ءۇشىنشى ورىندى ءبىر-بىردەن التىن جۇلدەنى قورجىنعا سالعان چەحيا, جاڭا زەلانديا, سلوۆەنيا جانە سلوۆاكيا سپورتشىلارى تۇيىندەدى. جالپى, الەم چەمپيوناتىندا 15 ەلدىڭ سپورتشىلارى جۇلدەگەرلەر قاتارىنان كورىندى.
ال قازاقستان سپورتشىلارىنان ەڭ ۇزدىك ناتيجەگە جاسوسپىرىمدەر اراسىندا سىنعا تۇسكەن دانيل چەرۆەنكو قول جەتكىزدى. ول 15 شاقىرىمعا جالعاسقان جارىستا مارە سىزىعىن 41 مينۋت 58 سەكۋند ىشىندە كەسىپ, 11-ورىنعا جايعاستى. جەرلەسىمىز ءتورت وق اتۋ ايلاعىندا ءبىر مارتە عانا ءمۇلت كەتىپ, جەڭىمپاز بەندجامين مەنتستەن 1 مينۋت 45 سەكۋندقا قالىپ قويدى. ال قىزدار سايىسىندا ەڭ ۇزدىك ناتيجەنى ميلانا گەنەۆا تىركەدى. ول جاستار اراسىنداعى 7,5 شاقىرىمدىق ءىز كەسۋدە مارەگە 15-ءشى بولىپ جەتتى. ونىڭ ۋاقىت كورسەتكىشى – 29 مينۋت, 31 سەكۋند. نىسانا كوزدەۋ ساتىندە ءۇش مارتە ءمۇلت كەتتى.