بۇگىن مەملەكەت باسشىسى قاسىم-جومارت توقاەۆ پرەمەر-ءمينيستردىڭ, مەملەكەتتىك ورگاندار باسشىلارىنىڭ, وبلىستار مەن استانا, الماتى, شىمكەنت قالالارى اكىمدەرىنىڭ قاتىسۋىمەن كەڭەس وتكىزدى. كەڭەس بارىسىندا ءتۇرلى الەۋمەتتىك جانە ساياسي ماسەلەلەر قوزعالدى. پرەزيدەنتتىڭ ايتۋىنشا, سوڭعى ۋاقىتتا ەل وڭىرلەرىندە بەلگىلى ادامدارعا ەسكەرتكىش ورناتۋ سانگە اينالىپ بارا جاتىر, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«سوڭعى كەزدە ءبىر ايماققا عانا بەلگىلى ادامدارعا ەسكەرتكىش ورناتۋ سانگە اينالدى. جەرگىلىكتى ونوماستيكا كوميسسيالارى بۇعان جول بەرمەۋگە ءتيىس. ورىنسىز شەشىمدەرگە رەسپۋبليكالىق كوميسسيا توسقاۋىل قويۋى كەرەك. اركىم ءوز باباسىنا ەسكەرتكىش قويا بەرسە, ەلدە رۋشىلدىق, جەرشىلدىك بەلەڭ الادى. وسىعان نازار اۋدارىڭىزدار», دەپ ەسكەرتتى قاسىم-جومارت توقاەۆ.
بۇل رەتتە پرەزيدەنت كەي ادامداردىڭ ومىرىندە مۇلدە بولماعان ەرلىك ىستەرگە تولى ءومىرباياندارى ويدان قۇراستىرىلىپ جاتقانىن دا تىلگە تيەك ەتتى.
«كەڭەستىك كەزەڭ قايراتكەرلەرىنە, سونىڭ ىشىندە جاپپاي قۋعىن-سۇرگىنگە تىكەلەي قاتىسى بار ادامدارعا ەسكەرتكىش, بيۋست ورناتۋ ءىسى ءالى جالعاسىپ كەلەدى. ومىردە بولماعان ەرلىك ىستەرگە تولى ءومىرباياندار ويدان قۇراستىرىلىپ جاتىر. ولار تۋرالى دەرەكتەر ارحيۆ قۇجاتتارىندا ناقتىلانباعان نەمەسە مۇلدە جوق. كەيبىر بەلسەندى توپتار ازاماتتارىمىزدى كەڭەستىك كەزەڭدەگى پارتيا جانە مەملەكەت قايراتكەرلەرىنىڭ اڭىزعا بەرگىسىز ءومىرباياندارىنا سەنۋگە ماجبۇرلەپ ءجۇر», دەپ قوستى مەملەكەت باسشىسى.