بەلگىلى زاڭگەر ولەگ چەرنوۆ پەن ونىڭ ايەلىن داۋلەت تۇرلىحانوۆتىڭ ۇلىمەن توبەلەس بويىنشا سوت-مەديتسينالىق ساراپتامالار تاعايىندالدى. بۇل تۋرالى باس اسكەري پروكۋراتۋرا مالىمدەدى, دەپ حابارلايدى Egemen.kz Tengrinews.kz سايتىنا سىلتەمە جاساپ.
«سوتقا دەيىنگى تەرگەپ-تەكسەرۋ اياسىندا سوت-مەديتسينالىق ساراپتامالار تاعايىندالىپ, قاداعالاۋشى پروكۋرور وقيعانىڭ بارلىق ءمان-جايىن انىقتاۋعا جازباشا نۇسقاۋ بەردى», دەپ حابارلادى باس اسكەري پروكۋراتۋرا.
ۆەدومستۆودا داۋلەت تۇرلىحانوۆتىڭ ۇلىنا قاتىستى ءىستىڭ جاي-جاپسارى دا ايتىلدى. اسكەري پروكۋراتۋرا ۇسىنعان مالىمەتكە قاراعاندا, 11 اقپانعا قاراعان ءتۇنى الماتىداعى ءال-فارابي داڭعىلىندا ويىن-ساۋىق ورىندارىنىڭ ءبىرىنىڭ ماڭىندا قورعانىس مينيسترلىگىنە قاراستى 30212 اسكەري ءبولىمىنىڭ اسكەري قىزمەتشىسى دەمالىستا جۇرگەن قاتارداعى بولات ن.د. مەن ازامات ولەگ چەرنوۆ اراسىندا جانجال شىققان.
«جانجال كەزىندە بولات چەرنوۆ پەن ونىڭ ايەلى چەرنوۆاعا بىرنەشە سوققى جاساعان. بيىل 11 اقپانىندا وسى فاكت بويىنشا الماتى قالالىق پوليتسيا دەپارتامەنتىنىڭ بوستاندىق اۋداندىق پوليتسيا ءبولىمى بولاتقا قاتىستى قازاقستان رەسپۋبليكاسى قىلمىستىق كودەكسىنىڭ 293-بابى 1-بولىگى «بۇزاقىلىق» بويىنشا سوتالدى تەرگەۋ امالدارىن تىركەدى. كەيىننەن بولات اسكەري قىزمەتكەر بولعاندىقتان, قىلمىستىق ءىس الماتى وبلىستىق گارنيزونى اسكەري پوليتسيا باسقارماسى قاراۋىنا بەرىلدى», دەدى باس اسكەري پروكۋراتۋرا وكىلدەرى.
ەسكە سالايىق, بۇعان دەيىن الماتىدا اسكەري قىزمەتكەر بەلگىلى زاڭگەردى سوققىعا جىققانى حابارلانعان ەدى.
بۇل وقيعا تۋرالى زاڭگەر ولەگ چەرنوۆتىڭ ايەلى اننا ديميتريەۆيچ Facebook-پاراقشاسىندا جازعان. ولار تاكسيگە وتىرا بەرگەندە ءبىر جىگىت جۇگىرىپ كەلىپ, سوققىعا جىعىلعان قىزعا كومەكتەسۋىن سۇراعان. الماتى پد بۇل دەرەك قر قىلمىستىق كودەكستىڭ 293-بابى «بۇزاقىلىق» بويىنشا سوتالدى تەرگەۋدىڭ بىرىڭعاي تىزىلىمىنە تىركەلگەنىن حابارلايدى. قىلمىستىق ءىس بويىنشا العاشقى تەرگەۋ ارەكەتتەرى جۇرگىزىلىپ, ساراپتامالار تاعايىندالعان.