كەيىنگى جىلدارى ەلىمىزدە ۇلكەن فۋتبولعا قاراعاندا, شاپشاڭدىقتى تالاپ ەتەتىن شاعىن فۋتبول قارقىندى دامىپ كەلەدى. بۇل سوزىمىزگە فۋتزال قۇراماسىنىڭ وسىدان ەكى جىل بۇرىن ليتۆادا ۇيىمداستىرىلعان الەمدىك دوداداعى جوعارى جەتىستىگى مەن بىلتىر نيدەرلاندتا جالاۋى جەلبىرەگەن ەۋروپا بىرىنشىلىگىندەگى تابىستى ونەرى دالەل بولا الادى.
كۇنى كەشە ريكاردو كاكا باستاعان فۋتزالدان ەل ۇلتتىق قۇراماسى كەلەسى جىلعى الەم چەمپيوناتىنا جولداما بەرەتىن نەگىزگى ىرىكتەۋ كەزەڭىندەگى سوڭعى ماتچىن وتكىزىپ, سىرت الاڭدا سلوۆەنيا فۋتزالشىلارىمەن تەڭ ءتۇستى. توپتاعى ءتورت ويىننىڭ ۇشەۋىندە جەڭىسكە جەتىپ, بىرەۋىندە ۇپاي بولىسۋگە ءماجبۇر بولعان جەرلەستەرىمىز ءبىرىنشى ورىنمەن ىرىكتەۋدىڭ كەلەسى اينالىمىنا, ياعني ەليتالى كەزەڭگە جولداما الدى.
ماريبور قالاسىندا ورنالاسقان «دۆورونا تابور» سپورت كەشەنىندەگى تارتىستى باسەكە 3:3 ەسەبىمەن تەڭ اياقتالدى. قازاقستان قۇراماسى كەلەسى كەزەڭنىڭ ماسەلەسىن مەرزىمىنەن بۇرىن شەشىپ قويعان سوڭ, بۇل كەزدەسۋدە بارىن سالىپ ويناعان جوق. سونىمەن قاتار جاراقاتتارىنا بايلانىستى اتالعان ماتچتا قاقپاشى يگيتا مەن قورعاۋشى لەو ۇلتتىق قۇراماعا كومەكتەسە المادى.
ماتچ بارىسىندا ۇلتتىق قۇراما ساپىنان البەرت اقبالىقوۆ (5-مينۋت), داۋرەن تۇرساعۇلوۆ (15) جانە تاينان (19) مەرگەندىگىمەن كوزگە تۇسسە, الاڭ يەلەرىنەن جيگو چەح (9), يگور وسرەدكار (25) جانە تەو تۋرك (26) دالدىك تانىتتى. وسىلايشا, ەل قۇراماسى ءتورت ماتچتا 10 ۇپاي جيناپ, ەكىنشى ىرىكتەۋ كەزەڭىن ءوز توبىندا ءبىرىنشى ورىنمەن اياقتادى. بۇعان دەيىن ءبىزدىڭ جىگىتتەر سلوۆەنيانى 2:0, چەرنوگوريا قۇراماسىن 5:1 جانە 7:0 ەسەپتەرىمەن تىزە بۇكتىرگەن بولاتىن. جەرلەستەرىمىز بەسىنشى توپتا ونەر كورسەتتى.
ەندى ريكاردو كاكا شاكىرتتەرى ەۋروپا چەمپيوناتىنىڭ فينالدىق كەزەڭىنە جولداما الۋ ءۇشىن ەليتالى كەزەڭدە باق سىنايدى. قازاقستان قۇراماسىنان بولەك, يسپانيا ء(بىرىنشى توپتىڭ جەڭىمپازى), گرۋزيا (2-توپ), ارمەنيا (3-توپ), پورتۋگاليا (4-توپ), پولشا (6-توپ), حورۆاتيا (7-توپ), رۋمىنيا (8-توپ), فرانتسيا (9-توپ), يتاليا (10-توپ), ۋكراينا (11-توپ) جانە سلوۆاكيا (12-توپ) قۇرامالارى دا ەليتالى كەزەڭدە وينايدى. سونىمەن قاتار ەكىنشى ىرىكتەۋ كەزەڭىندە ەكىنشى ورىن العان قۇرامالار ىشىندە ەڭ كوپ ۇپاي جيناعان تاعى ءتورت كوماندا ەليتالى كەزەڭگە جولداما الدى. ولار: سەربيا (9-توپ), سلوۆەنيا (5-توپ), فينليانديا (8-توپ) جانە ازەربايجان (6-توپ).
ال از ۇپايمەن ەكىنشى ورىنعا تابان تىرەگەن بەلگيا, ماجارستان, گەرمانيا, ليتۆا, مولدوۆا, نيدەرلاند, چەحيا, شۆەتسيا قۇرامالارى 10-19 ءساۋىر ارالىعىندا ءبىر-بىرىمەن قوسىمشا وتكىزەدى. جەڭىسكە جەتكەن ۇجىم كەلەسى كەزەڭدە ويناۋ مۇمكىندىگىنە يە بولادى.
20 قۇراما قاتىساتىن ەليتالى كەزەڭنىڭ جەرەبەسى 5 شىلدەدە تارتىلادى. ال ماتچتار 2023 جىلدىڭ جەلتوقسانىنا جوسپارلانعان.