قازاق پوەزياسىندا ءورشىل, ومىرشەڭ ولەڭىمەن الاش جۇرتىن باۋراعان تولەگەن ايبەرگەنوۆتىڭ شىعارماشىلىعى قازىر ءيسى قازاققا تانىس. ايبەرگەنوۆ دەسە, كوپتىڭ جادىندا ايدارىنان جەل ەسكەن سۇراپىل, سۇڭعىلا اقىننىڭ بەينەسى جاڭعىرادى...
بۇگىندە اقىننىڭ تۋعان جەرىندە, تابانى تيگەن ولكەلەردەن بولەك, بىرنەشە قالادا قۇندى ەستەلىكتەرى ساقتاۋلى. استانا قالاسىنداعى ت.ايبەرگەنوۆ اتىنداعى №16 ورتا مەكتەپتىڭ مۋزەيىن شاعىن دەمەسەڭىز, اقىننىڭ ءومىرى مەن شىعارماشىلىعىن تانىپ-بىلەمىن دەگەنگە ازىق بولارلىق دۇنيەلەر ساقتاۋلى تۇر.
جۋىردا وسى مەكتەپكە بارىپ, اقىن قۇرمەتىنە اشىلعان مۋزەيدى تاماشالاۋدىڭ ءساتى تۇسكەن ەدى. ءار جىلدارى وسى مۋزەيگە ءوز ءىسىن جەتىك بىلەتىن, پوەزياعا جاناشىر ۇستازدار جەتەكشىلىك ەتسە, قازىر سول اعا بۋىن ارىپتەستەردىڭ اماناتىن قازاق ءتىلى مەن ادەبيەتى ءپانىنىڭ مۇعالىمى گاۋھار ءجۇسىپوۆا ارقالاپتى. مەكتەپ 1979 جىلى اشىلسا, 2001 جىلى ءبىلىم مەكەمەسىنە ت.ايبەرگەنوۆتىڭ ەسىمى بەرىلگەن. سودان اراعا اتتاي التى جىل سالىپ, 2007 جىلى 23 جەلتوقساندا كوپتىڭ ۇسىنىس-تىلەگىمەن ايبەرگەنوۆ مۋزەيى اشىلىپتى. مىنە, 2000 جىلداردىڭ باس كەزىنەن-اق مەكتەپ ۇجىمى ء«بىر تويىم بار» دەپ جىرلاعان اقىننىڭ تۋعان كۇنىن اتاپ وتەتىن ءداستۇر قالىپتاستىردى. ايتا كەتەيىك, مەكتەپ ۇجىمى 2018 جىلى قالالىق مەكتەپ مۋزەيلەرىنىڭ بايقاۋىنا قاتىسىپ, باس جۇلدە جەڭىپ العان.
– ءوزىم 2017 جىلدان بەرى مۋزەي جەتەكشىسىمىن. اقىن اتىنداعى مەكتەپ مۋزەيىنە جەتەكشى بولعان سوڭ, بىرەر جىلدا ايبەرگەنوۆ پوەزياسىن تەرەڭىرەك ءتۇسىنىپ, قال-قادىرىمشە سونى جاس وسكىندەرگە جەتكىزۋدى ماقسات تۇتتىم. مۋزەي اشىلعان جىلى مەكتەپ ديرەكتورىنىڭ تاربيە ءىسى جونىندەگى ورىنباسارى اقبوتا ەساماتوۆا تولەگەن ايبەرگەنوۆتىڭ قىزى اينار تولەگەنقىزىمەن بىرگە ىسساپارعا شىققان. اقتوبە, شىمكەنت, الماتى, تاشكەنتكە بارىپ, ءبىراز قۇندى دەرەك جيناعان. تولەگەن ايبەرگەنوۆ ءبىلىم العان تاشكەنتتەگى نيزامي ينستيتۋتىندا دا اقىننىڭ ەستەلىكتەرى ساقتالعان. وسى تۇستا مۋزەيدىڭ اشىلۋىنا ىقپال ەتىپ, رۋحاني شاڭىراققا جەتەكشى بولعان اقىن ەرسايىن نارىمباەۆتىڭ ەڭبەگىن ەستەن شىعارماعانىمىز دۇرىس دەپ ويلايمىز. ول كىسىمەن ءبىز كۇنى بۇگىنگە دەيىن بايلانىستامىز. مۋزەيگە ءجيى كەلىپ تۇرادى, – دەيدى گاۋھار ءجۇسىپوۆا.
مەكتەپتىڭ مۋزەيگە اپاراتىن دالىزىندە ايبەرگەنوۆتىڭ سۋرەتى, ولەڭ جولدارى, قاز-قاتار تىزىلگەن كىتاپتارى كوزگە وتتاي باسىلادى. كوپ ۇزاماي مۋزەيگە كىرە بەرگەندە توردەگى ايبەرگەنوۆتىڭ سۋرەتىن بايقادىق. سول سۋرەتتىڭ ماڭدايىندا «ساعىنىپ كەلىپ, ساعىنتىپ كەتكەن اقىن» دەگەن ءبىر اۋىز ءسوز شوقتىعى بيىك اقىننىڭ تالانتىن ايقىنداي تۇسكەن. مۇندا اقىننىڭ كوز قاراشىعىنداي ساقتالعان قۇندى جادىگەردىڭ ءبىرى رەتىندە ۇيىندەگى ساعاتى, ىدىس-اياق جانە قولجازبالارىنىڭ كوشىرمەسىن ايتۋعا بولادى. مۋزەيدىڭ سول جاق بۇرىشىندا اقىننىڭ تۋعان جەرى قاراقالپاقستاننىڭ قوڭىرات اۋدانىنداعى, كەيىنگى ستۋدەنتتىك جىلدارى وتكەن تاشكەنتتەگى, مەكتەپ ديرەكتورى بولىپ قىزمەت ەتكەن سارىاعاشتاعى, شىعارماشىلىعىن شىڭداعان اسەم قالا الماتىداعى جىلدارى جايىندا كەڭ ماعلۇمات بار. سونداي-اق شىعارماشىلىق جولدا دوس-سىرلاس بولعان قازاقتىڭ بەلگىلى اقىن-جازۋشىلارى مەن كومپوزيتورلارى, سونىمەن بىرگە, تولەگەن ايبەرگەنوۆ اتىنداعى سىيلىقتىڭ لاۋرەاتتارى جونىندە دە مالىمەتتەرمەن تانىسۋعا بولادى. مۇندا اقىن ولەڭىنىڭ ورىس, اعىلشىن تىلىنە اۋدارىلعان نۇسقاسىن ەلەكتروندى فورماتتا وقۋعا دا مۇمكىندىك بار.
مەكتەپ ۇجىمى جىل سايىن ايبەرگەنوۆتىڭ تۋعان كۇنىنە وراي شىعارماشىلىق كەش, قالا دەڭگەيىندە ادەبي جانە عىلىمي جوبالار بايقاۋىن, مۋزەي ساعاتى, پوەزيا ساعاتى, ءتىپتى سپورتتىق ءىس-شارا ۇيىمداستىرۋدى داعدىعا اينالدىرعان.
ال مەكتەپتىڭ ءماجىلىس زالىنا اپاراتىن دالىزدە اقىننىڭ ولەڭ جولدارىنداعى پەيزاجدى شەبەر سۋرەتتەپ, قاعاز بەتىنە تۇسىرگەن وقۋشىلاردىڭ ەڭبەگى ءىلۋلى تۇر. بۇل اقىننىڭ 85 جىلدىق مەرەيتويىندا دارىندى وقۋشىلار سالعان تاڭداۋلى سۋرەتتەر ەكەن.
تولەگەن ايبەرگەنوۆتىڭ مۇراسىن ساقتاپ وتىرعان مەكتەپ ۇجىمى اۋەلى اقىننىڭ شىعارماشىلىعىن ناسيحاتتاۋعا باسىمدىق بەرەتىنى ءسوزسىز. سوندىقتان كەز كەلگەن سىنىپتىڭ وقۋشىسى اقىننىڭ كەم دەگەندە ءبىر ولەڭىن جاتقا بىلەدى.