كاسىبي تەننيسشىلەر (ATP) مەن ايەلدەر تەننيسى قاۋىمداستىعى (WTA) ءداستۇر بويىنشا اپتا باسىندا سپورتشىلاردىڭ رەيتينگىن جاريالادى.
ايەلدەر اراسىنداعى رەيتينگتە اسا كوپ وزگەرىس بايقالا قويعان جوق. ەلىمىزدىڭ ءبىرىنشى راكەتكاسى ەلەنا رىباكينا بۇرىنعىداي رەيتينگتەگى 10-ورنىن ساقتاپ قالسا, يۋليا پۋتينتسەۆا وتكەن اپتامەن سالىستىرعاندا ەكى ساتى تومەندەپ, جاعدايىن ءبىراز ناشارلاتىپ الدى. ءبىر اپتا بۇرىن توپ-40 تەننيسشىنىڭ قاتارىندا تۇرعان جەرلەسىمىز بۇل كۇندەرى 42-ورىنعا جايعاستى. كوش باسىنداعى ۇزدىكتەر دە وزگەرىسسىز قالدى. ايەلدەر اراسىندا ادەتتەگىدەي يگا سۆەنتەك (پولشا) ءبىرىنشى ورىندى ەنشىلەپ تۇرسا, ونى ارينا سوبولەنكو (بەلارۋس) مەن دجەسسيكا پەگۋلا وكشەلەپ كەلەدى.
ەرلەر اراسىنداعى ەلىمىزدىڭ ءبىرىنشى راكەتكاسى الەكساندر بۋبليك تە اتر تىزىمىندەگى ءوز ورنىن ساقتاپ قالدى. ال تيموفەي سكاتوۆ التى ساتى تومەندەپ, 140-ورىنعا تۇراقتادى. ەرلەر باسەكەسىندە نوۆاك دجوكوۆيچ (سەربيا) الدا كەلەدى. ودان كەيىنگى ورىندارعا كارلوس الكاراس (يسپانيا) پەن ستەفانوس تسيتسيپاس (گرەكيا) جايعاسقان.