«قازاقستان تەمىر جولى» ۇلتتىق كومپانياسى قىتايدىڭ سيان قالاسىنداعى قۇرعاق پورت اۋماعىندا تەرمينال سالاتىن بولدى. وسى ماقساتتا قىتاي تاراپى 8 گەكتار جەر بولۋگە دايىن. بۇل تۋرالى ۇلتتىق كومپانييا باسشىلىعىنىڭ قىتايعا ساپارى كەزىندە ءمالىم بولدى.
كەزدەسۋ بارىسىندا كولىك مارشرۋتتارى مەن ينفراقۇرىلىمدى دامىتۋ ماسەلەلەرى تالقىلانعان. تاراپتار سيان قالاسى قىتايدىڭ ەڭ ءىرى كولىك-لوگيستيكالىق حابى ەكەنىن اتاپ ءوتتى.
«ونىڭ اۋماعىندا «سيان حالىقارالىق ساۋدا-لوگيستيكالىق پاركى» حالىقارالىق قۇرعاق پورتى ورنالاسقان. وسى قۇرعاق پورتقا جۇكتەردىڭ 40%-ى قازاقستان تاراپىنان كەلەدى. سونداي-اق مۇندا قحر-ەو قاتىناسىمەن جونەلتىلگەن كونتەينەرلىك پويىزداردىڭ جالپى كولەمىنەن كونتەينەرلەردىڭ 30%-ى قالىپتاستىرىلادى», دەلىنگەن حابارلامادا.
كەزدەسۋ قورىتىندىسى بويىنشا كەلىسىمگە قول قويىلىپ, سوعان سايكەس سيان قالاسىنداعى قۇرعاق پورت اۋماعىندا تەرمينال سالۋ ءۇشىن 8 گەكتار جەر ۋچاسكەسى بولىنبەك. قالا مەرياسى «قتج» ۇك» اق-عا جاڭا لوگيستيكالىق جوبانى ىسكە اسىرۋ بويىنشا قولداۋ كورسەتۋگە دايىن ەكەنىن راستاعان.
جۇك تاسىمالى ماسەلەسىندە قىتايدىڭ باستى كوزىر ەل بولىپ تۇرعانى جاسىرىن ەمەس. بۇعان دەيىن قتج باسشىلىعى «قىتاي تەمىر جولدارى» مك باسشىلارىمەن دە كەزدەسۋ وتكىزگەن ەدى. «قىتاي تەمىر جولدارى» مك-نىڭ باسشىسى ليۋ چجەنفان اتاپ وتكەندەي, «قازاقستان تەمىر جولى» دەلەگاتسياسى – بۇل پاندەميادان كەيىن قىتاي تاراپى قابىلداعان العاشقى اكىمشىلىك.
كەزدەسۋدە ەكى ەل اراسىنداعى جۇك تاسىمالداۋ كولەمى وڭ قارقىن كورسەتىپ وتىرعانى اتاپ ءوتىلدى. 2022 جىلى جۇك تاسىمالى 23 ملن توننانى قۇراپ, تاريحي ماكسيمۋمنان اسقان. بۇل 2021 جىلمەن سالىستىرعاندا 15%-عا كوپ. تاراپتار قازاقستان ارقىلى وتەتىن حالىقارالىق كولىك دالىزدەرىن دامىتۋ ماسەلەلەرى بويىنشا ىنتىماقتاستىقتىڭ اعىمداعى جاي-كۇيى مەن پەرسپەكتيۆالارىن تالقىلادى. قحر-دان يمپورت ماسەلەسىنە دە ەرەكشە نازار اۋدارىلدى.
كەزدەسۋدە جاڭا جوبالار تۋرالى دا ايتىلدى. ناقتىلاساق, دوستىق – مويىنتى ۋچاسكەسىن جاڭعىرتۋ جانە باقتى – تاچەن ۋچاسكەسىندە ءۇشىنشى تەمىرجول شەكارا وتكەلىن سالۋ ماسەلەلەرى قارالدى.