رەسەي فەدەراتسياسىنىڭ كۋزباسس ايماعىندا ۇيىمداستىرىلعان قىسقى سپورت تۇرلەرىنەن ءىى «ازيا بالالارى» ويىندارى ءوز مارەسىنە جەتتى. جارىستىڭ رەسمي جابىلۋ راسىمىندە ەلىمىزدىڭ كوك بايراعىن شورت-ترەك سپورتىنىڭ شەبەرى ماديار ماديحوۆ ۇستاپ شىقتى. ال حالىقارالىق ويىنداردىڭ تۋىن ءتۇسىرۋ راسىمىنە چەمپيون رەتىندە قازاقستان اتىنان مەيىرجان تولەگەن قاتىستى.
ون كۇنگە جالعاسقان كەشەندى جارىستا قازاقستان قۇراماسىنىڭ سپورتشىلارى 3 التىن, 5 كۇمىس جانە 6 قولا مەدالعا قول جەتكىزىپ, جالپىكوماندالىق ەسەپتە 6-ورىنعا تابان تىرەدى. جالپى, كۋزباستاعى ويىندارعا سپورتتىڭ بەس تۇرىنەن 58 وتانداسىمىز اتتانعان ەدى. ولار شورت-ترەك, كونكيمەن جۇگىرۋ, كيورلينگ, شاڭعى جارىسى, شايبالى حوككەي, شاڭعىمەن تۇعىردان سەكىرۋ سپورت تۇرلەرىنەن سىنعا ءتۇستى.
كۋزباستاعى ءىى «ازيا بالالارى» ويىندارىندا قازاقستان قۇراماسىنىڭ قورجىنىنا التىن جۇلدەنى يليا ميزەرنىح (شاڭعىمەن تۇعىردان سەكىرۋ, ك-40), مەيىرجان تولەگەن (شورت-ترەك), ۆارۆارا گلۋحوۆا (كونكيمەن جۇگىرۋ) سالعان بولسا, مەيىرجان تولەگەن (شورت-ترەك, 1500 م), يليا شيلنيكوۆ (شاڭعىمەن تۇعىردان سەكىرۋ, ك-40), ەستافەتادا ەرلەر قۇراماسى (شورت-ترەك), ارالاس كوماندالىق سىندا يليا ميزەرنىح پەن سوفيا شيشكينا (شاڭعىمەن تۇعىردان سەكىرۋ), سپرينتتە ەرلەر قۇراماسى (كونكيمەن جۇگىرۋ) كۇمىس جۇلدەگەر اتاندى.
ال ماليكا جولتابار (شورت-ترەك, 1500م), سوفيا شيشكينا (شاڭعىمەن تۇعىردان سەكىرۋ, ك-40), ەستافەتادا قىزدار قۇراماسى (شورت-ترەك), ارالاس كوماندالىق سىندا يليا شيلنيكوۆ پەن اليونا سۆەريدەنكو (شاڭعىمەن تۇعىردان سەكىرۋ), ماديار ماديحوۆ (شورت-ترەك, 100 م), شاڭعى جارىسىنداعى دوستىق ەستافەتاسىندا ارينا اندريۋششەنكو («سپورت» قۇراماسىندا) قولا جۇلدەگە يە بولدى.
جالپىكوماندالىق ەسەپتە ءسىبىر فەدەرالدى وكرۋگى مەدال جيىنتىعى بويىنشا باس جۇلدەنى ولجالاسا, ودان كەيىنگى ورىندارعا ماسكەۋ وبلىسى, ورال مەن قيىر شىعىس فەدەرالدى وكرۋگىنىڭ قۇرامالارى جايعاستى. جاس سپورتشىلار بيىلعى سايىستا 57 مەدال جيىنتىعىن ساراپقا سالدى.
2023 جىلعى ازيا بالالارىنىڭ باسەكەسىنە قازاقستان قۇراماسىنان بولەك, ارمەنيا, اۋعانستان, بەلارۋس, كۋۆەيت, قىرعىزستان, ليۆان, نەپال, تاجىكستان, تايلاند, تۇرىكمەنستان, وزبەكستان مەملەكەتىنىڭ سپورتشىلارى قاتىستى. سونداي-اق ماسكەۋ وبلىسى, كۋزباسس ايماعىنىڭ قۇراماسى, قيىر شىعىس فەدەرالدى وكرۋگى, ءسىبىر فەدەرالدى وكرۋگى, ورال فەدەرالدى وكرۋگىنىڭ قۇراماسى, باشقۇرتستان, ساحا جانە تاتارستان رەسپۋبليكالارىنىڭ وكىلدەرى دە بايراقتى دودادا ونەر كورسەتتى. ال تايلاند, ليۆان مەن اۋعانستان قۇرامالارى بيىل العاش رەت «ازيا بالالارى» ويىندارىنا قاتىسقانىن ايتا كەتكەن ءجون.
قازاقستان 2019 جىلى وتكەن العاشقى «ازيا بالالارى» ويىندارىنا 8 سپورتتان 74 سپورتشى اپارىپ, جالپىكوماندالىق ەسەپتە 7 التىن, 7 كۇمىس جانە 6 قولا مەدالمەن 11 قۇرامانىڭ ىشىندە 6-ورىننان كورىنگەن ەدى.