سانيتارلىق اۆياتسيا سەپتىگى

مەديتسينالىق اۆياتسيا جەلىسى بويىنشا ۇلت­تىق شۇعىل مەديتسينانى ۇي­لەس­تىرۋ ورتالىعىنىڭ كومە­گىنە جۇگىنەتىن پاتسيەنتتەر – بۇل رەسپۋبليكانىڭ مەدي­تسينالىق ۇيىمدارىندا اۋىر نەمەسە اسا اۋىر جاعدايدا جۇرگەن, وبلىستىق نەمەسە رەس­پۋب­ليكالىق كلينيكالاردا م­ا­مانداندىرىلعان نەمەسە جوعا­رى تەحنولوگيالىق ەمدەۋدى قاجەت ەتەتىن ادامدار.

دەنساۋلىق ساقتاۋ مي­نيس­تر­­لىگىنىڭ حابارلاۋىنشا, وت­كەن جىلى 4 420 پاتسيەنتكە سانيتارلىق اۆياتسيانىڭ كومەگى كورسەتىلىپتى. ونىڭ ىشىن­دە 1 468 (33%) پاتو­لوگيا­سى بار بالاعا, 730 (17%) جا­ر­اقاتتانعان, جازاتايىم وقي­عالارمەن جا­نە ۋلانۋمەن اۋى­راتىن پاتسيەنتكە, 859 (19%) اكۋ­شەرلىك پراكتيكاداعى شۇعىل جاعدايلار بويىنشا پاتسيەنتكە, 560 (13%) قاناينالىم جۇيەسى اۋرۋلارى بار پاتسيەنتكە, 517 (12%) جاڭا تۋعان پاتسيەنتتەرگە, 286 (6%) باسقا اۋرۋلارى بار پاتسيەنتكە مەديتسينالىق كومەك كورسەتىلدى.

جالپى, 2022 جىلدىڭ قورى­تىندىسى بويىنشا 5 230 مەديتسينالىق قىزمەت ورىن­دالدى. ونىڭ ىشىندە مەديتسي­نالىق ۇيىمدارعا 2 381 پاتسيەنت (45%) تاسىمالداندى, 153 كۇندىزگى كونسۋلتاتسيا (3%) وتكىزىلدى, 205 وپەراتسيا (4%) ورىندالدى, 2 491 (48%) قاشىق­تىقتان مەديتسينالىق قىزمەت ۇيىمداستىرىلدى.

حالىققا كونسۋلتاتسيالىق جانە جەدەل مەديتسينالىق كومەك كورسەتۋ ءۇشىن استانا, ال­ماتى قالالارىنىڭ رەسپۋب­ليكالىق كلينيكالارى مەن مەديتسينالىق ۇيىمدارىنان 251 مامان تارتىلدى.

مەديتسينالىق اۆياتسيا جۇ­مىسى پاتسيەنتتەردى تاسىمالداۋ, بەتپە-بەت كونسۋلتاتسيالار, وپەراتسيالار جۇرگىزۋ, قاشىقتىقتان مەديتسينالىق قىزمەتتەر كورسەتۋ, دونورلىق اعزالار مەن بيوماتەريالداردى تاسىمالداۋ سياقتى باعىت­تاردا جۇرگىزىلەدى. بۇگىنگى تاڭدا رەسپۋبليكا بويىنشا ورتاشا مەديتسينالىق اۆياتسيا تاۋلىگىنە 15 ۇشۋعا دەيىن جۇزەگە اسىرىلادى.

بىلتىر مەديتسينالىق اۆياتسيا نىسانىندا قاجەتتى قىزمەتتەر كورسەتۋ ءۇشىن ۇلت­تىق شۇعىل مەديتسينانى ۇيلەستىرۋ ورتالىعىنىڭ ديس­پەتچەرلىك قىزمەتىنە 2 985 ءوتىنىم كەلىپ ءتۇستى. ونىڭ 628-ىنەن باس تارتىلدى (مەتەو­جاعدايلار, تەحنيكالىق سەبەپتەر, پاتسيەنتتىڭ جاي-كۇيىنىڭ ناشارلاۋى جانە ت.ب.).

2022 جىلدىڭ قورى­تىن­دىسى بويىنشا مەديتسي­نالىق اۆياتسيا 2 357 قىز­مەتتى ورىنداسا, ونىڭ ىشىن­دە تىكۇشاقتارمەن – 470, ۇشاقتارمەن 1 887 رەت ۇش­تى. بۇل رەتتە 41 ۇشۋدى ازا­ماتتىق اۆياتسيانىڭ تۇراق­تى رەيستەرىنىڭ اۋە كەمەلەرى ورىنداعانىن اتاپ وتكەن ءجون.

رەسپۋبليكا شەگىندەگى مە­دي­تسينالىق اۆياتسيا رەيس­تەرىنەن باسقا, شەتەلدەر­دەگى مەديتسي­نالىق ۇيىمداردا اسا اۋىر جاعداي­دا جۇرگەن قازاقستان ازاماتتارى مەن قانداستاردى حالىقارالىق تاسىمالداۋ جۇزەگە اسىرىلادى. بىلتىر شەتەلدىك كلينيكالاردان مەديتسينالىق اۆياتسيا وتاندىق مەدي­تسي­نالىق ۇيىمداردا ەم­دەۋ­دى جالعاستىرۋ ءۇشىن قا­زاق­ستاننىڭ 16 ازاماتىن تاسىمالدادى.

ال دونورلىق اعزالاردى الۋ جونىندەگى مامانداردى تاسىمالداۋ ءۇشىن 5 ۇشۋ جانە بيوماتەريالدى 1 تاسىمالداۋ ورىندالدى.

مەديتسينالىق اۆياتسيانىڭ مۇددەسى ءۇشىن 2022 جىلى 33 اۋە كەمەسى, ياعني 20 ۇشاق جانە 13 تىكۇشاق پايدالانىلدى. بارلىق پايدالانىلاتىن اۋە كەمەلەرى ەلىمىزدىڭ ازاماتتىق اۆياتسيا كوميتەتىندە سەرتي­فيكاتتالعان.

احۋالدىق ورتالىقتىڭ قىزمەتكەرلەرى تاۋلىك بويى كۇشەيتىلگەن رەجىمدە اۋىر جاعدايداعى پاتسيەنتتەر ءۇشىن تەلەفون ارقىلى 33 143 كونسۋلتاتسيا ۇيىمداستىردى. احۋالدىق ورتالىق تۇراقتى نەگىزدە ەلىمىزدە بولعان تو­تەنشە جاعدايلارعا كۇندە­لىكتى مونيتورينگ جۇرگىزەدى.

ەل ازاماتتارىنا مەديتسي­نالىق اۆياتسيا نىسانىندا شۇعىل مەديتسينالىق كومەك كورسەتۋ تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە جۇزەگە اسىرىلادى.