الەمدەگى ساياسي جاعدايعا بايلانىستى تۋىنداعان اۋەسقوي بوكس توڭىرەگىندەگى داۋ قايتا ءورشي ءتۇستى. وتكەن ايدا بىرقاتار مەملەكەتتىڭ بوكس فەدەراتسيالارى قىزدار ء(ۇندىستان) مەن ەرلەر (وزبەكستان) اراسىنداعى بوكستان الەم چەمپيوناتىنا قاتىسۋدان باس تارتقانى بەلگىلى. سونىڭ قارىمتاسى رەتىندە بىرەر كۇن بۇرىن حالىقارالىق بوكس اسسوتسياتسياسى (IBA) رەسەي مەن بەلارۋس بىلعارى قولعاپ شەبەرلەرىنىڭ دۇنيەجۇزىلىك دودادا ونەر كورسەتۋىنە قارسى بولعان فەدەراتسيا باسشىلارىنا قاتىستى تارتىپتىك ءىس قوزعادى.
«IBA تاۋەلسىز ەتيكا كوميتەتى اقش, كانادا, چەحيا, شۆەتسيا جانە جاڭا زەلانديا بوكس فەدەراتسيالارىنىڭ وكىلدەرىنە IBA كونستيتۋتسياسىن جانە ونىڭ ءتارتىپ پەن ەتيكا كودەكسىن بۇزعانى ءۇشىن شاعىم ءتۇسىردى», دەلىنگەن IBA-نىڭ رەسمي سايتىنداعى حابارلامادا.
اتاپ ايتقاندا, IBA اقش بوكس فەدەراتسياسىنىڭ باس ديرەكتورى مايك ماكەت, كانادا بوكس فەدەراتسياسىنىڭ پرەزيدەنتى رايان و’شي, چەحيا بوكس اسسوتسياتسياسىنىڭ پرەزيدەنتى مارەك شيما, شۆەتسيا بوكس اسسوتسياتسياسىنىڭ توراعاسى پەر-اكسەل شەحولم جانە جاڭا زەلانديا بوكس فەدەراتسياسىنىڭ پرەزيدەنتى ستيۆ حارتليگە قاتىستى تارتىپتىك ءىس قوزعادى. سونىمەن قاتار تاۋەلسىز ەتيكا كوميتەتى وزگە دە ۇلتتىق فەدەراتسيا باسشىلارىنىڭ بويكوتقا قاتىسى بار-جوعىن تەكسەرەتىنىن دە مالىمدەدى. وسىلايشا, IBA جاسىرىن تۇردە وزدەرىنە قارسى شىققان ۇلتتىق فەدەراتسيالارمەن اشىق ايقاسقا كىرىسكەنىن بايقاتتى.
«بوكستا كەمسىتۋشىلىكتىڭ قانداي دا ءبىر تۇرىنە ورىن جوق جانە IBA مۇنداي جاعدايدى بولدىرماۋدى ءوزىنىڭ ميسسياسى دەپ سانايدى. سونىمەن قاتار حالىقارالىق بوكس اسسوتسياتسياسى حالىقارالىق ارەناداعى ءوزىنىڭ ادالدىعى مەن بەدەلىنە نۇقسان كەلتىرەتىن بەلگىلى ءبىر توپ وكىلدەرىنىڭ قارالاۋىنا جول بەرمەيدى», دەلىنگەن حابارلامادا.
ەستەرىڭىزدە بولسا, 2022 جىلدىڭ قازانىندا IBA پرەزيدەنتى ۋمار كرەملەۆ رەسەي مەن بەلارۋس سپورتشىلارى 2023 جىلى وتەتىن بوكستان قىزدار مەن ەرلەر اراسىنداعى الەم چەمپيوناتتارىندا ءوز تۋلارى استىندا ونەر كورسەتەتىنىن مالىمدەگەن بولاتىن. حالىقارالىق وليمپيادا كوميتەتى (حوك) تاراپىنان سالىنعان سانكتسيالارعا ء(وز تۋى استىندا جارىستارعا قاتىستىرماۋ) قاراماستان, IBA-نىڭ قابىلداعان وسىنداي داۋلى شەشىمىنە جوعارىدا اتتارى اتالعان مەملەكەتتىڭ بوكس فەدەراتسيالارى ءوز نارازىلىقتارىن ءبىلدىرىپ, بىرىنەن سوڭ ءبىرى الەم چەمپيوناتتارىنا بويكوت جاريالاي باستادى. سونداي-اق اقش بوكس فەدەراتسياسى حالىقارالىق بوكس ۇيىمىنىڭ قارجىلىق باسقارۋى اشىق تۇردە جاريالانبايتىنىن جانە سانكتسيا سالىنعان كومپانيالارمەن تىعىز جۇمىس ىستەۋى بويكوت جاريالاۋعا سەبەپ بولعانىن مالىمدەگەن ەدى.
الەمنىڭ وننان اسا مەملەكەتى بوكس باسەكەلەرىنە قاتىسۋدان باس تارتاتىندارىن ايتسا دا, IBA پرەزيدەنتى ۋمار كرەملەۆ حالىقارالىق فەدەراتسيالار مەن حوك تالابىن ورىنداۋعا ءبارىبىر نيەتتى ەمەس ەكەنىن جەتكىزدى. اتاپ ايتقاندا, ول ءار سپورتشىعا ءوز ەلىنىڭ تۋى استىندا رينگتە ونەر كورسەتۋىنە جانە مەملەكەتىنىڭ ءانۇرانىن شىرقاتۋعا مۇمكىندىك بەرەتىنىنە ۋادە بەردى. سونىمەن قاتار كرەملەۆ سپورتشىلاردى مۇنداي مۇمكىندىكتەن ايىرىپ وتىرعان شەنەۋنىكتەر مەن ساياساتكەرلەرگە سپورتتا ورنى جوق ەكەنىن دە جەتكىزدى.
...ءبىرىنشى راۋند بارىسىندا ەكى «بوكسشى» دا رينگ ورتاسىندا ءبىر قارىس ارتقا شەگىنبەي, ءوز مۇددەسى ءۇشىن اشىق ايقاستان ايانىپ قالعان جوق. قازىرشە ءۇزىلىس. ەكى تاراپ رينگتىڭ ەكى بۇرىشىندا «باپكەرلەرىنىڭ» اقىل-كەڭەسىن تىڭداپ, ەكىنشى راۋندتا ۇستازدارىنىڭ بەرگەن تاپسىرمالارىن بۇلجىتپاي ورىنداۋ ءۇشىن دايىندالىپ جاتىر... بۇل تارتىستا كىمنىڭ جەڭەتىنى ازىرگە بەلگىسىز. ءبىرىنشى راۋندتان كەيىن تارازى باسى تەڭ ءتۇسىپ تۇر.
ايتا كەتەيىك, ءۇندىستان استاناسى – نيۋ-دەليدە جالاۋى جەلبىرەيتىن ايەلدەر اراسىنداعى الەم چەمپيوناتى 15-31 ناۋرىز, وزبەكستاننىڭ تاشكەنت قالاسىنداعى ەرلەر باسەكەسى 1-14 مامىر ارالىعىندا وتەدى دەپ جوسپارلانعان.