العىس ايتۋ مەرەكەسىن استانا پەرزەنتحانالارىنىڭ دارىگەرلەرى مەن ناۋقاستارى دا اتاپ ءوتتى. ناۋقاستار اق حالاتتى ابزال جاندارعا العىس ايتىپ, جىلى لەبىزدەرىن جەتكىزدى, دەپ حابارلايدى Egemen.kz ەلوردا اكىمدىگىنىڭ ءباسپاسوز قىزمەتىنە سىلتەمە جاساپ.
مەيرام كۇنىندە قالامىزدا 71 ءسابي دۇنيەگە كەلدى: ونىڭ 35-ءى - قىز, 36-سى - ۇل بالا.
«العىس كۇنى – ىزگى مەيرام. ەڭ الدىمەن جاۋاپتى, ىزگى ءىس اتقارىپ جۇرگەن ارىپتەستەرىمە العىس بىلدىرەمىن. بۇگىنگى اكتسيانىڭ ماقساتى – سىيلاستىق پەن دوستىق سەكىلدى حالقىمىزدىڭ يگى قۇندىلىقتارىن دارىپتەۋ», دەدى دارىگەر انار قىستاۋباەۆا.
دارىگەرلەرگە شەكسىز ريزاشىلىعىن ءبىلدىرىپ, يگىلىكتى اكتسياعا اتسالىسقان جانداردىڭ ءبىرى يۋليا ەسىمدى قالا تۇرعىنى 5,2 كەلى اۋىر سالماقتا باتىر ۇلدى دۇنيەگە اكەلگەن. اۋىر اسقىنۋلارمەن تۇسكەن ناۋقاس ۇلىن امان-ساۋ ومىرگە اكەلۋگە بىردەن-ءبىر كاسىبي كومەك كورسەتكەن اقحالاتتى جاندارعا ريزاشىلىعىن ءبىلدىردى.
«ماعان وتا جاساپ, قامقورلىق تانىتقان دارىگەرلەرىمە ۇلكەن العىس. دارىگەر اتانۋ — ۇزاق ءارى قيىن, جاۋاپتى قىزمەت. بۇل جولدى تاڭداۋدىڭ ءوزى – باتىرلىق», دەدى ول.