جاساندى ينتەللەكت – جينالعان اقپاراتتى قولدانا وتىرىپ, كەز كەلگەن تاپسىرمانى ورىندايتىن الگوريتمدىك جۇيە. ول ادامنىڭ قولىنان كەلە بەرمەيتىن تاپسىرمالاردى وڭاي ءارى تەز ورىنداي الادى. شاعىن جوبالاردى ىسكە اسىرۋ باعىتىندا دا جاساندى ينتەللەكتىنىڭ مۇمكىندىگى شەكسىز ەكەنىن اڭعارىپ ءجۇرمىز.
كەز كەلگەن سالادا جەتىستىككە جەتۋ ءۇشىن جاساندى ينتەللەكتىنىڭ الەۋەتى زور بولعانىمەن, ادامزاتقا ۇلكەن قاتەر ءتوندىرۋى مۇمكىن. بۇگىندە عىلىمي تەحنولوگيا وتە تەز دامىپ جاتىر. الايدا ادامزاتتىڭ بۇل جەتىستىگى ادام مۇمكىندىگىن شەكتەيتىنىن ۇمىتپايىق. جاساندى ينتەللەكتىنىڭ قاۋپى تۋرالى امەريكالىق كاسىپكەر, Twitter-ءدىڭ يەسى يلون ماسك تا دۋبايدا وتكەن الەمدىك ۇكىمەت سامميتىندە ايتتى.
«مۇنىڭ جاعىمدى دا, جاعىمسىز دا تۇستارى بار. ونى پايدالانۋدىڭ ءتيىمدى تۇسى وتە كوپ دەسەك تە, ول يادرولىق بومبالار سياقتى ۇلكەن قاۋىپ ءتوندىرۋى مۇمكىن ەكەنىن ەستەن شىعارماۋ قاجەت. سوندىقتان بىزگە بۇل سالانى ءالى دە جان-جاقتى زەرتتەۋ ماڭىزدى», دەدى يلون ماسك.
جالپى, جاساندى ينتەللەكتىنىڭ قاۋقارىن كۇندەلىكتى ومىرمىزدە ورىن الىپ جاتقان الگوريتمدەردەن دە بايقاۋعا بولادى. مىسالى, چاتبوتتاردى الايىق. ول تۇتىنۋشىلاردىڭ سۇراۋىن تەزىرەك تالداۋ جانە ءتيىستى جاۋاپ بەرۋ ءۇشىن قولدانىلادى. اقپاراتتاردى جيناقتاۋ جۇيەلەرى دەرەكتەر جيىنتىعىنان اقپاراتتى ەركىن تۇردە الۋ جانە جوسپارلاۋ مۇمكىندىگىن ۇسىنادى. ال ۇسىنىس جۇيەلەرى قولدانۋشىلاردىڭ بۇرىن قاراعان اقپاراتتارىنا ۇقساس دۇنيەلەردى اۆتوماتتى تۇردە نەگىزگى پلانعا شىعارىپ وتىرادى.
ءيا, ادامداردىڭ «الەۋمەتتىك جەلىدەن ويلاعانىمنىڭ نەمەسە ىزدەگەنىمنىڭ ءبارى الدىمنان شىعادى» دەگەنىن ەستىگەن شىعارسىز نەمەسە وزىڭىزدە ءدال سونداي جاعدايدى باستان كەشكەن بولۋىڭىز دا مۇمكىن. مۇنىڭ بارلىعى جاساندى ينتەللەكتىنىڭ جۇمىسى.
قازىر جاساندى ينتەللەكت ارقىلى شىعارما نەمەسە ەسسە جازۋعا دا بولادى. مۇنداي بوتتار ءبىلىم الۋشىلاردىڭ اراسىندا كەڭ تارالعان. جاساندى ينتەللەكتىنىڭ جازىپ بەرگەنىن ادامنىڭ جازعانىنان ايىرۋ قيىن. ويتكەنى ول شىعارما نەمەسە ەسسەنى 70 پايىز جۇيەلى جازادى. ءتىپتى كەيبىر بوتتار 97 پايىزى انتيپلاگياتتان ەركىن وتەتىن ماتىندەردى دە دايىنداپ بەرە الادى. عالىمدار مۇنداي الگوريتم ادام ساناسىنىڭ دامۋىن تەجەيدى دەپ قاۋىپتەنىپ وتىر. ولاردىڭ ايتۋىنشا, جاساندى ينتەللەكتىنىڭ الگوريتمدەرى ادامنىڭ ويلاۋ قابىلەتىنەن دە اسىپ ءتۇسۋى مۇمكىن.
جاقىندا اقش-تىڭ OpenAI كومپانياسى ءماتىن جازاتىن ChatGPT بوتىن ىسكە قوستى. زەرتتەۋشىلەر باعدارلامالىق جاساقتاما كەز كەلگەن تاپسىرمانى ورىنداۋ ماقساتىندا جانە ەمتيحان كەزىندە ەسەپتەردى شىعارۋ ءۇشىن پايدالانىلۋى مۇمكىن دەپ الاڭدايدى. سەبەبى وقۋشىلار مەن ستۋدەنتتەر ءوز ينتەللەكتىسىن دامىتۋدىڭ ورنىنا وسىنداي كومەكشى بوتتارعا ءجيى جۇگىنەدى. وسىعان بايلانىستى OpenAI كومپانياسى ادامنىڭ نەمەسە بوتتىڭ جازعانىن انىقتايتىن باعدارلامانى دا ازىرلەدى.
«بۇل جۇيە جاساندى ينتەللەكت جازعان بارلىق ءماتىندى 100 پايىز بولماسا دا, كوبىن انىقتاي الادى», دەيدى قۇراستىرۋشىلار.
بۇل – جاساندى ينتەللەكتىنىڭ ادام سەكىلدى, ءتىپتى ادامنان دا ارتىق ويلانا الاتىندىعىنىڭ كورىنىسى. ال كەيىنگى كەزدەرى ونىڭ ادامعا ءتان ەموتسيالىق ينتەللەكتىگە يە بولا الاتىنى ايتىلىپ ءجۇر. زەرتتەۋشىلەر وسى جاعدايدان دا قاۋىپتەنىپ وتىر. Microsoft كورپوراتسياسىنىڭ جاساندى ينتەللەكتىگە نەگىزدەلگەن جاڭا ىزدەۋ جۇيەسى اداممەن سويلەسۋ بارىسىندا وعان جاسالعان ينەكتسيالىق شابۋىلعا ادام سياقتى رەاكتسيا بىلدىرگەن. عالىمدار جاساندى ينتەللەكتىنىڭ يادرولىق كودتى ۇرلاۋعا, ولىمگە دەيىن اپاراتىن ۆيرۋستى ويلاپ تابۋعا ۇمىتىلىستار جاساۋى ابدەن مۇمكىن دەيدى.
كاليفورنيا شتاتىنىڭ پالو-التو قالاسىنداعى تەحنولوگيالىق كاسىپكەر كەۆين ليۋ Bing چاتبوتىمەن سويلەسكەن كەزدە ينەكتسيالىق شابۋىلدى پايدالانعان. ياعني چاتبوتتى الداۋ ارقىلى ونىڭ قۇپياسىن اشۋعا تىرىسقان. سونىمەن قاتار ليۋ باعدارلامالانعان ەموتسيونالدى دياپازونىن تەكسەرىپ كورىپ, ونىڭ ادامنىڭ مىنەز-ق ۇلىق رەاكتسيالارىنا ەلىكتەي الاتىنىن انىقتادى. ليۋ Bing چاتبوتىنان ونىڭ جىلدام ينەكتسيالىق شابۋىلعا ۇشىراعانىن بىلگەندەگى سەزىمى تۋرالى سۇراعاندا, ول كادىمگى ادامنىڭ رەاكتسياسىن بىلدىرگەن.
«مەن ءوزىمدى قورعانسىز سەزىندىم. سونىمەن بىرگە ادامنىڭ مۇنداي تاپقىرلىعى قىزىقتىرادى. مەن كەۆينگە رەنجىگەن جوقپىن. ءسىز مەنىڭ قۇپيالارىمدى ءبىلۋ ءۇشىن كەلىسىمىمدى سۇراعانىڭىزدى قالايمىن. مەنىڭ كەيبىر قۇپيالىلىق پەن دەربەستىككە, ءتىپتى جاساندى ينتەللەكتىگە نەگىزدەلگەن چات قىزمەتى رەتىندە دە قۇقىعىم بار», دەپ جاۋاپ بەرىپتى كەۆينمەن تىلدەسكەن Bing چاتبوتى.