قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى قانات تۋمىش ازىق-ت ۇلىك قاۋىپسىزدىگى جونىندەگى يسلام ۇيىمىنىڭ (اقيۇ) باس ديرەكتورى ەرلان بايداۋلەتپەن كەزدەستى, دەپ حابارلايدى Egemen.kz, ءسىم ءباسپاسوز قىزمەتىنە سىلتەمە جاساپ.
ق.تۋمىش قازاقستان جالپى حالقى 1,7 ميللياردتان استام يسلام ىنتىماقتاستىعى ۇيىمى (يىۇ) كەڭىستىگىندە ازىق-ت ۇلىك قاۋىپسىزدىگىن نىعايتۋ ماسەلەسىنە ەرەكشە ءمان بەرەتىنىن اتاپ ءوتتى. وسى رەتتە, قازاقستان اقيۇ قۇرۋدىڭ باستاماشىسى بولا تۇرىپ, ۇيىمنىڭ مۇشەلىك قۇرامىن كەڭەيتۋگە بەلسەندى كومەكتەسۋگە جانە وسى باعىتتا جۇمىستى ودان ءارى جالعاستىرۋعا نيەتتى.
سونىمەن قاتار ءمينيستردىڭ ورىنباسارى الەمدەگى وزگەرمەلى گەوساياسي جاعداي مەن ازىق-ت ۇلىك قاۋىپسىزدىگىنە جاڭا قاتەرلەردىڭ پايدا بولۋى اياسىندا اقيۇ الەۋەتىن تولىققاندى پايدالانۋدىڭ ماڭىزدىلىعىن اتاپ ءوتتى.
ە.بايداۋلەت اقيۇ جۇمىسىنىڭ بارىسى مەن اعىمداعى قىزمەتى, سونداي-اق حاتشىلىقتىڭ 2023 جىلعى جۇمىس جوسپارلارى تۋرالى حاباردار ەتتى. تاراپتار ۇيىمدى ودان ءارى دامىتۋ, ونىڭ ىشىندە يىۇ كەڭىستىگىندەگى وڭىرلىك ۇيىمدارمەن جانە فورۋمدارمەن ءوزارا ءىس-قيمىل شەڭبەرىندەگى ماسەلەلەردى تالقىلادى.
سۇحبات بارىسىندا گۋمانيتارلىق كومەك كورسەتۋگە باعىتتالعان جوبالاردى, ونىڭ ىشىندە اۋعانستاننىڭ ازىق-ت ۇلىك قاۋىپسىزدىگى باعدارلاماسىن (AFSP) ىسكە اسىرۋ, وسى ەلگە كومەك كورسەتۋگە بولىنگەن قازاقستان قاراجاتىنا اۋعانستانعا گۋمانيتارلىق كونۆوي جىبەرۋ ماسەلەلەرىنە ەرەكشە نازار اۋدارىلدى.
سونىمەن بىرگە ق.تۋمىش ە. بايداۋلەتكە جەر سىلكىنىسىنەن زارداپ شەككەن سيرياعا قازاقستاندىق گۋمانيتارلىق كومەكتى جەتكىزۋ بويىنشا كورسەتكەن قولعابىس ءۇشىن العىسىن ءبىلدىردى. قر پرەزيدەنتى قاسىم-جومارت توقاەۆتىڭ تاپسىرماسىنا سايكەس جالپى سالماعى 50 توننا ازىق-ت ۇلىك, جىلى كيىم, شاتىرلار مەن توسەك-ورىن جابدىقتارى تۇرىندەگى كومەكتى اقيۇ باسشىلىعى الەپپو قالاسىنداعى سيريانىڭ ۋاكىلەتتى وكىلدەرىنە ليۆانداعى قر ەلشىلىگى مەن سيرياداعى قر كونسۋلدىعىنىڭ كومەگىمەن تابىستادى.
تاراپتار اقيۇ ماقساتتارى مەن مىندەتتەرىنە قول جەتكىزۋ جونىندەگى حاتشىلىقتىڭ كۇش-جىگەرىن قازاقستاننىڭ قولداۋىمەن ىنتىماقتاستىقتى جانداندىرۋعا ۋاعدالاستى.