رەسەيدىڭ “لۋكويل” كومپانياسى – ەلىمىزدە مۇناي سالاسىندا جۇمىس ىستەيتىن ءىرى شەتەلدىك ينۆەستور. ول “قازمۇنايگاز” ۇك” اكتسيونەرلىك قوعامىمەن بىرگە “قازاقويلاقتوبە” جاۋاپكەرشىلىگى شەكتەۋلى سەرىكتەستىگىنىڭ قۇرىلتايشىسى بولىپ تابىلادى. سەرىكتەستىك مۇعالجار اۋدانىنداعى الىبەكمولا, قوجاساي كەن ورىندارىنان مۇناي وندىرۋمەن اينالىسادى. بۇل كومپانيانىڭ وزگە شەتەلدىك ينۆەستورلارعا قاراعاندا ءبىر ەرەكشەلىگى – بيزنەستىڭ الەۋمەتتىك جاۋاپكەرشىلىگىنە باسا نازار اۋداراتىندىعى. سونىڭ ىشىندە الەۋمەتتىك جوبالارعا قارجىلاي قولداۋ كورسەتۋى ارقىلى تەك قانا اۋىلدىقتاردىڭ از قامتىلعان توبىنا ءوز ءىسىن اشۋعا جاعداي تۋعىزىپ وتىرعانى قۋانتادى. بۇعان دەيىن ماڭعىستاۋ وبلىسىندا وسىنداي يگىلىكتى ىستەر تىندىرعان كومپانيا وزدەرىنىڭ “اراي” باعدارلاماسى اياسىندا بيىل مۇنايلى ءوڭىر مۇعالجار اۋدانىندا قاناتقاقتى جوبالاردى جۇزەگە اسىرۋعا كىرىسكەن بولاتىن. كومپانيا سول ءۇشىن ءوز بيزنەسىن اشۋعا جانە شىعارماشىلىق قابىلەتتەرىن شىڭداۋعا تالاپ قىلۋشىلار اراسىندا كونكۋرس جاريالاپ ەدى. جاقىندا ءوز ىستەرىن اشۋعا بيزنەس-جوبالارىن ۇسىنعانداردىڭ اراسىنان وزىپ شىققاندارعا “لۋكويل” كومپانياسىنىڭ 850 مىڭ تەڭگەگە دەيىنگى كولەمدە قايتارىمسىز گرانتتارى تاپسىرىلدى.
كومپانيانىڭ قايتارىمسىز گرانتتارىنا يە بولعان 56 مۇعالجارلىق التى شاشتاراز, سونشاما تىگىن تسەحى مەن ناۋبايحانا, ەكى تەحنيكالىق قىزمەت كورسەتۋ ستانساسىن, ەكى گاز-دانەكەرلەۋ تسەحىن اشۋعا جولداما الدى.
– بارلىق بيزنەس-جوبالاردى ءتاۋەلسىز كوميسسيا مۇشەلەرى سارالاپ, تالداپ, ىرىكتەدى. الىس اۋدان تۇرعىندارىنىڭ ىسكەرلىك بەلسەندىلىگىن ءبىر گرانتقا 8 جوبا ۇسىنىلعانىنان دا اڭعارۋعا بولادى. بۇل جوبا شىن ءمانىندە حالىقتىق بولدى دەسەك, ارتىق ايتقاندىق بولماس. جوبالاردىڭ ءبارىنىڭ ايماق ءۇشىن الەۋمەتتىك ماڭىزى زور,–دەدى “لۋكويل” كومپانياسى قازاقستاندىق فيليالىنىڭ ديرەكتورى اندرەي كيريللوۆ.
كومپانيا از قامتىلعان اۋىلدىقتاردىڭ قولىنا قارجىنى ۇستاتا سالىپ ءىس ءبىتتى دەگەن جوق. قايتارىمسىز گرانتتار تاپسىرىلعاننان كەيىن كونكۋرس جەڭىمپازدارىنا ارنالعان سەمينار وتكىزىپ, ءوز بيزنەسىن نەدەن باستاۋ كەرەكتىگىنە باعىت-باعدار سىلتەدى, كاسىپكەرلىكتىڭ قىر-سىرىن جەتە ءتۇسىندىردى.
ساتىبالدى ءساۋىرباي.
اقتوبە وبلىسى.