استانا قالاسىندا «تومەن كومىرتەكتى دامۋ: قر-دىڭ 2060 جىلعا دەيىنگى كومىرتەكتى بەيتاراپتىعىنا قول جەتكىزۋ ستراتەگياسىن ەنگىزۋدىڭ جول كارتاسىن ازىرلەۋ ءۇشىن نەگىزگى ويلار» اتتى ەكولوگيالىق سەمينار ءوتتى, دەپ حابارلايدى Egemen.kz ۇلتتىق ەكونوميكا مينيسترلىگىنە سىلتەمە جاساپ.
كەزدەسۋ اشىق پىكىرتالاس فورماتىندا ءوتتى. ءىس-شاراعا ورتالىق مەملەكەتتىك ورگانداردىڭ, دۇنيەجۇزىلىك بانكتىڭ, ازاماتتىق قوعام مەن عىلىمي ورتانىڭ وكىلدەرى قاتىستى. جيىندا كومىرتەگى بەيتاراپتىعىنا قول جەتكىزۋ ستراتەگياسىنىڭ جول كارتاسى تالقىلاندى. اتاپ ايتقاندا مەملەكەتتىك ساياسات, الداعى شارالار جانە ينۆەستيتسيالاردى تارتۋ ماسەلەلەرى قوزعالدى.
ۇلتتىق ەكونوميكا ءمينيسترى الىبەك قۋانتىروۆ ءوز سوزىندە اتاپ وتكەندەي, قازاقستاننىڭ 2060 جىلعا دەيىنگى كومىرتەگى بەيتاراپتىعىنا قول جەتكىزۋ ستراتەگياسى ەكونوميكانىڭ نەگىزگى سەكتورلارىن قامتيدى. سونداي-اق ول پارنيكتىك گازدار شىعارىندىلارىن قىسقارتۋ, ەنەرگيا تيىمدىلىگىن ارتتىرۋ جانە جاڭارتىلاتىن ەنەرگيا كوزدەرىن دامىتۋ بويىنشا ماڭىزدى باعىتتاردى ايقىندايدى.
ء«بىزدىڭ ماقساتىمىز – كومىرتەگى ءىزىن ازايتۋ, ەكونوميكانىڭ تۇراقتى ءوسۋى, دەنساۋلىق ساقتاۋ سالاسىن جاقسارتۋ جانە كليماتتىق تاۋەكەلدەردى ازايتۋدىڭ جاڭا ارتىقشىلىقتارىن پايدالانۋ. تومەن كومىرتەكتى تەحنولوگيالارعا ارنالعان تازا ينۆەستيتسيالار كولەمى $610 ملرد-قا باعالانۋدا. بۇل جاڭا نارىقتاردىڭ پايدا بولۋىنا جانە وتاندىق وندىرۋشىلەر ءۇشىن جۇمىس ىستەپ تۇرعان نارىقتاردىڭ كەڭەيۋىنە ىقپال ەتىپ, جاڭا جۇمىس ورىندارىن قۇرۋدى ىنتالاندىرادى», دەپ اتاپ ءوتتى ول.
ونىڭ ايتۋىنشا, قاجەتتى ينۆەستيتسيانىڭ جارتىسىنان استامى نەمەسە $386,3 ملرد – بۇل ەكونوميكاداعى قولدانىستاعى جانە اينالىمداعى ينۆەستيتسيالار. ياعني شيكىزات سالاسىنان ەكونوميكانىڭ «جاسىل» سەكتورلارىنا قايتا باعدارلاناتىن بولادى. قالعان $223,7 ملرد جاڭا ينۆەستيتسيالىق رەسۋرس بولادى.
ينۆەستيتسيالاردى تارتۋ, جاڭا ماماندىقتار قۇرۋ, تاجىريبە الماسۋ ءۇشىن قازاقستان حالىقارالىق ۇيىمدارمەن جانە باسقا ەلدەرمەن ىنتىماقتاستىقتى نىعايتۋعا نيەتتى.
ء«بىزدىڭ الدىمىزدا قوعامدىق دەنساۋلىقتى جاقسارتۋ, ەنەرگەتيكالىق قاۋىپسىزدىك پەن تۇراقتى ەكونوميكالىق ءوسۋ بويىنشا ۇلكەنت مىندەت تۇر. ۇكىمەت وسى ماقساتتارعا قول جەتكىزۋ ءۇشىن جوسپارلى جۇمىس جۇرگىزۋدە», دەدى ۆەدومستۆو باسشىسى.