«Amanat» پارتياسىنىڭ رەسپۋبليكالىق سايلاۋالدى شتابى مۇشەلەرىنىڭ وڭىرلەردەگى سايلاۋشىلارمەن كەزدەسۋى جالعاسىپ جاتىر. كەشە پارتيالىقتار اباي وبلىسىنا باردى.
سەمەي قالاسىندا پارتيا توراعاسى ەرلان قوشانوۆ №35 باعىتتاعى اۆتوبۋسقا وتىرىپ, قالا تۇرعىندارىمەن سويلەستى. تۇرعىندار تۇرعىن ءۇي-كوممۋنالدىق شارۋاشىلىق, جول جوندەۋ, الەۋمەتتىك نىساندار سالۋ سياقتى ماڭىزدى ماسەلەلەردى كوتەردى.
بۇدان سوڭ اۆتوبۋس پاركىندە وتكەن قوعامدىق كولىك سالاسىنىڭ قىزمەتكەرلەرىمەن كەزدەسۋدە جولاۋشىلار تاسىمالى ماسەلەلەرى تالقىلاندى.
«قوعامدىق كولىك سالاسىن دامىتۋ – ەلىمىزدىڭ بارلىق قالاسىندا وزەكتى. لىق تولى اۆتوبۋستار, ولاردى ايالدامادا سارىلىپ ۇزاق كۇتۋ جانە توزىعى جەتكەن قوعامدىق كولىكتەر تۇرعىنداردىڭ ءومىر ءسۇرۋ ساپاسىنا كەرى اسەرىن تيگىزەدى», دەدى ە.قوشانوۆ.
پارتيالىقتار ءار وڭىردە قوعامدىق كولىك تاپشىلىعى مەن ەسكىرگەن اۆتوپاركتەرگە قاتىستى كۇردەلى ماسەلەنى شەشۋگە جۇيەلى تۇردە كۇش سالاتىنىن جەتكىزدى. ۇكىمەتپەن بىرلەسىپ, ەسكى اۆتوبۋستاردى قىسقا مەرزىمدە جاڭا, وتاندىق كولىكتەرگە اۋىستىرۋعا مۇمكىندىك بەرەتىن شەشىمدەر ازىرلەنەدى.
سونداي-اق شتاب مۇشەلەرى يادرولىق مەديتسينا جانە ونكولوگيا ورتالىعىنىڭ ۇجىمىمەن كەزدەسىپ, سايلاۋالدى باعدارلامانىڭ وڭىرلەردەگى مەديتسينالىق ينفراقۇرىلىمدى جاقسارتۋعا باعىتتالعان ءبولىمى تۋرالى ايتتى. پارتيا 2027 جىلعا دەيىن مەديتسينا قىزمەتكەرلەرىنىڭ ورتاشا جالاقىسىن كوتەرۋگە جانە دارىگەرلەر مارتەبەسىن زاڭنامالىق تۇرعىدان بەكىتۋگە كۇش سالادى. پارتيا سەمەيدە وبلىستىق 5 دەنساۋلىق ساقتاۋ نىسانىنىڭ سالىنۋىن قامتاماسىز ەتەدى. اتاپ ايتقاندا, 300 كەلۋشىگە ارنالعان 2 ەمحانا, 400 توسەكتىك كوپبەيىندى اۋرۋحانا, ەمحاناسى بار بالالار اۋرۋحاناسىن جانە قان ورتالىعىن تۇرعىزۋعا اتسالىسادى.
بۇل كۇنى شتاب مۇشەلەرى سەمەيدەگى تۇرعىن ءۇي-كوممۋنالدىق شارۋاشىلىق سالاسىنىڭ وكىلدەرىمەن جانە قالا بەلسەندىلەرىمەن كوممۋنالدىق ينفراقۇرىلىمدى دامىتۋ جانە م ۇلىك يەلەرىنىڭ بىرلەستىگى جوباسىن ەنگىزۋگە قاتىستى ماسەلەلەردى تالقىلادى.