بولگاريادا باس جۇلدە بۇيىرعان جوق

سوفياداعى سايىسقا ەل بىرىنشىلىگىنىڭ جەڭىمپازدارى مەن جۇلدەگەرلەرى, سونداي-اق حالىقارالىق بايراقتى باسەكەلەردە الەم جانە ازيا چەمپيوناتىنىڭ, وليم­پيا ويىندارىنىڭ جۇلدەگەرلەرىنەن جاساقتالعان 12 بوكسشىمىز قاتىستى. ءتىپتى ولاردىڭ قاتارىندا ۇلتتىق قۇرا­ماعا ءبىر جارىم جىلدان كەيىن قايتا ورالعان 2019 جىلعى الەم چەمپيونى دەي­تىن دارداي اتاعى بار بەكزات نۇر­داۋلەتوۆ, توكيو وليمپياداسىنىڭ قولا جۇل­دەگەرى قامشىبەك قوڭقاباەۆ بار. بىراق بۇل بوكس­شىلاردان ەش قايران بولمادى.

تەك اتالعان جارىستىڭ فينالىندا جۇدىرىقتاسقان 57 كيلوداعى ورازبەك اسىلقۇلوۆتىڭ عانا ونەرى جانكۇيەرلەردىڭ كوڭىلىنەن شىقتى. اقمولالىق بوكسشى بولگارياداعى باسەكەنىڭ فينالىندا تەك جارىس قوجايىنى حاۆەر يبانەسكە تورەشىلەردىڭ شەشىمىمەن جول بەردى (1:4) دەمەسەڭىز, جارىس بويى ايدارىنان جەل ەسكەن كىل مىقتىلاردى تۇعىردان تايدىردى. ماسەلەن, شيرەك فينالدا وزبەكستاننىڭ داڭقتى بوكسشىسى, جاس­تار اراسىنداعى الەم جانە وليمپيادا چەمپيونى, ەرەسەكتەر اراسىنداعى سارى قۇر­لىق بىرىنشىلىگىنىڭ جەڭىمپازى, الەم چەمپيوناتىنىڭ كۇمىس جۇلدەگەرى ابدۋماليك حالوكوۆتى, بىلتىرعى ەۋروپا چەمپيوناتىنىڭ كۇمىس جۇل­دەگەرى ارتۋر بازەياندى كۇمانسىز جەڭ­دى. ال فينالدا شىققان تەگى كۋبالىق, بىراق بولگاريا قۇراماسى ساپىندا جۇ­دى­رىقتاساتىن حاۆەر يبانەستەن تورە­شىلەردىڭ ارالاس شەشىمىمەن عانا ۇتىلدى.

جارتىلاي فينالدا جۇدىرىقتاسقان 75 كيلوداعى نۇرقانات رايىس ءداستۇرلى ءتۋرنيردىڭ قولا جۇلدەگەرى اتاندى. قازاق­ستان بىرىنشىلىگىنىڭ جەڭىمپازى, ازيا بىرىنشىلىگىنىڭ كۇمىس جۇلدەگەرى نۇرقانات فينالعا بەرىلەر جولدامانى جەرگىلىكتى بوكسشى رامي كيۆانمەن ساراپقا سالىپ, قارسىلاسىنا جول بەردى.

جاسىراتىنى جوق, قازاقستاننىڭ بوكس جانكۇيەرلەرى سوفيا شارشى الا­ڭىندا ۇلتتىق قۇراماعا قايتا ورال­عان بەكزات نۇرداۋلەتوۆ پەن توكيو وليمپياداسىنىڭ قولا جۇلدەگەرى قام­شىبەك قوڭقاباەۆتان التىن كۇتكەن ەدى. وكى­نىشكە قاراي, ەل ءۇمىت ارتقان ەكى بوكسشىمىز دا بولگاريادان قۇرالاقان ورا­لىپ, سەنىم ۇدەسىنەن شىعا المادى. 80 كيلو سالماقتا جۇدىرىقتاسقان 2019 جىلعى الەم چەمپيونى شيرەك فينالدا اتى كوپشىلىككە بەيمالىم, وز­بەك­ستان قۇراماسىنىڭ ەكىنشى الدە ءۇشىنشى ءنومىرلى بوكسشىسى جاسۋربەك يۋل­­دوشەۆكە ەسە جىبەردى. +92 كيلوداعى قام­شىبەك قوڭقاباەۆ العاشقى اينالىمدا نيدەرلاند وكىلى ستەن بەرتەنسومدى ەكىنشى راۋندتا نوكاۋتقا جىبەرگەن سوڭ جانكۇيەرلەر قوڭقاباەۆ پەن جالولوۆ ەكەۋى­نىڭ اراسىنداعى تارتىستى جەكپە-جەك­­تىڭ كۋاسى بولۋعا اسىقتى. بىراق شيرەك في­­نالدا وتانداسىمىز وزبەكستاندىق قار­سى­لاسىمەن جۇدىرىقتاسۋدان باس تار­تىپ, رينگكە شىققان جوق. مۇنىڭ سەبە­بىنە ۇڭىلسەك, قوڭقاباەۆ جاراقاتىنا باي­­لانىس­تى جارىسقا شىقپاپتى. بىراق بۇل ۋاجگە جانكۇيەرلەر سەنبەيدى. ولار مۇنىڭ اس­تارىندا باسقا گاپ بار دەپ ەسەپ­تەيدى...

وسىلايشا, الەمنىڭ 38 ەلىنەن كەلگەن 400-گە جۋىق بوكسشى جۇدىرىقتاسقان سايىستا قازاقستان قۇراماسى 1 كۇمىس جانە 1 قولامەن جالپىكوماندالىق ەسەپتە 7-ورىنعا تۇراقتادى. 7 التىن, 4 كۇمىس, 5 قولا مەدال جەڭىپ العان وزبەكستان مەدال كەستەسىندە جەكە-دارا كوش باستادى. كەيىنگى ورىندارعا بولگاريا (4+1+1) مەن اقش (1+2) قۇرامالارى جايعاستى.

بىلتىر ءدال وسى تۋرنيردە قازاقستان قۇراماسى 2 التىن, 2 كۇمىس جانە 5 قولا جۇلدەمەن جالپىكوماندالىق ەسەپتە رەسەي بوكسشىلارىمەن ەكىنشى جانە ءۇشىنشى ورىنداردى ءوزارا بولىسكەن ەدى. باس جۇلدە ادەتتەگىدەي وزبەكستان قۇرا­ماسىنىڭ ەنشىسىندە كەتكەن بولاتىن. وڭتۇستىكتەگى كورشىلەرىمىز بيىل بىزدەن الدەقايدا ۇزاپ كەتتى. مەدال سانى جا­عىنان دا, دەڭگەيى جاعىنان دا.