استانا. 23 ماۋسىم. كەشە تۇندە برازيليادا ءوتىپ جاتقان الەم چەمپيوناتىندا كورەيا مەن الجير كوماندالارى كەزدەسىپ, افريكالىقتار 4:2 ەسەبىمەن جەڭىسكە جەتتى. بۇل تۋرالى egemen.kz حابارلادى. كورەيا – الجير 2:4 (0:3). 22 ماۋسىم. پورتۋ-الەگري. «بەيرا-ريو» ستاديونى. 42 732 كورەرمەن. تورەشى - ۆيلمار رولدان (كولۋمبيا). كورەيا: دجۋن سۋن رەن, لي ەن, حون دجون حو, كيم ەن گۆون, يۋن سوك ەن, حان گۋك ەن (دجي دون ۆون, 78), لي چۋن ەن (لي گىن حو, 64), كۋ دجا چحول, پاك دجۋ ەن (كيم شين ۆۋك, 57), سون حىن مين. الجير: رايس مبولي, ايسسا ماندي, كارل مەدجاني, مادجيد بۋگەررا (ەسسايد بەلكالەم, 89), رافيك الليش, دجامەل مەسبا, سوفيان فەگۋلي, ياسين برايمي (مەحدي لاسەن, 77), ابدەلمۋمەن دجابۋ (نابيل گيلاس, 73), نابيل بەنتالەب, يسلام سليماني. گولدار: يسلام سليماني (26), رافيك الليش (28), ابدەلمۋمەن دجابۋ (38), سون حىن مين (50), ياسين برايمي (62), كۋ دجا چحول (72). ەسكەرتۋلەر: لي ەن (54), حان گۋك ەن (69) – مادجيد بۋگەررا (67). بۇل ن توبىندا وسى كەزگە دەيىن وتكەن بارلىق ويىنداردىڭ اراسىنداعى ەڭ قىزىقسىزدارى رەسەي قۇراماسىنىڭ قاتىسۋىمەن وتكەن ماتچتار بولىپ وتىر. ءبىرىنشى تۋردا وينالعان كورەيانىڭ وسى ەل جاساعىمەن كەزدەسۋى بارىنشا سۇرەڭسىز بولىپ شىقتى. ەكىنشى تۋردا بەلگيالىقتار دا جارقىلداعان ويىنىمەن كوزگە تۇسپەگەنىمەن, تۇپكى ماقساتىنا قول جەتكىزىپ, 6 ۇپايمەن كەلەسى كەزەڭگە شىعۋ ماسەلەسىن شەشىپ الدى. ال كورەيلەردىڭ الجير قۇراماسىمەن ايقاسى بارىنشا تارتىستى دا قىزىقتى بولدى. ويىن باستالعاننان افريكالىق ارابتار وزدەرىنىڭ الدارىنا ۇلكەن ماقسات قويىپ وتىرعاندارىن تانىتىپ الدى. ولار ءبىرىنشى تايمدا قارسىلاستارىن الىپ تا جىقتى, شالىپ تا جىقتى. سونىڭ ناتيجەسىندە قارسىلاستارى قاقپاسىنا جاۋاپسىز ءۇش گول سالىپ ۇلگەردى. كەزدەسۋدىڭ باسىنان ونىڭ تىزگىنىن قولدارىنا ۇستاعان الجيرلىكتەر تايمنىڭ ورتاسى اۋا ونى گولعا اينالدىرا ءبىلدى. ولاردىڭ سەريالى شابۋىلدارىنىڭ نۇكتەسىن 26-مينۋتتا يسلام سليماني قويدى. ول قاقپاشىمەن جەكە-دارا شىققان ءساتىن پايدالانىپ كەتتى. جاعدايدىڭ بۇلايشا قالىپتاسۋى ابدەن زاڭدى ەدى. مۇنىڭ ارتىنشا ايىپ الاڭىنا قۇيىنداي قۇيعىتىپ كىرگەن ياسين برايميدىڭ تاعى ءبىر گول سوعاتىن مۇمكىندىگى بولدى. بىراق ونىڭ سوققى جاساۋىنا قورعاۋشىلار كەدەرگى كەلتىردى. دەگەنمەن, مۇنى ءساتى ۇزاق كۇتتىرمەدى. 28-مينۋتتا بۇرىشتامادان تاستالعان دوپقا كورەي قاقپاشىسى جەتە المادى, سوسىن ونى رافيك الليش بيىك سەكىرىپ, قاقپاعا سارت ەتكىزدى – 2:0! ارادا تاعى ءبىر ون مينۋت وتكەننەن كەيىن ابدەلمۋمەن دجابۋ ارىپتەسى سليمانيدىڭ اياعىنىڭ استىنا سالىپ بەرگەن دوبىن توردىڭ اياسىنان ءبىر-اق شىعاردى. وسىلايشا ءبىرىنشى تايمدا-اق ويىننىڭ تاعدىرى شەشىلىپ قالعانداي بولدى. كورەيا فۋتبولشىلارى ەكىنشى تايمدى بەلسەندى باستادى. بۇعان ءبىرىنشى كەزەڭدەگى ەسەپتەن كەيىن الجيرلىكتەردىڭ ەپتەپ بوساڭسىعاندارى دا اسەر ەتكەن سياقتى. اقىرىندا كوپ ۇزاماي كورەيلەر ءبىر دوپتىڭ قارىمتاسىن قايتارا الدى. الايدا, بۇدان كەيىن ەكى جاق دوپ الماستى دا, نەگىزگى باسىمدىق سول قالپىندا ساقتالىپ قالدى. دامير قوجامقۇل. دەرەككوز: چەمپيونات.رۋ. فوتو: Sportbox.Ru.