بۇل كۇندەرى مىسىردىڭ الەكساندريا قالاسىندا كۇرەستەن وليمپيادا چەمپيونى يبراھيم مۇستافانى ەسكە تۇسىرۋگە ارنالاعان رەيتينگتىك تۋرنير جالعاسىپ جاتىر. جارىستىڭ العاشقى كۇنىندە گرەك-ريم كۇرەسىنىڭ بالۋاندارى بەلدەسىپ, 10 سالماقتىڭ ۇزدىكتەرىن انىقتادى.
الەكساندرياداعى بالۋاندار باسەكەسىنە قازاقستان قۇراماسىنىڭ وكىلدەرى بيىل ەكىنشى مارتە قاتىسىپ جاتسا دا, «كلاسسيكتەرىمىز» ءساتتى ونەر كورسەتىپ, جالپىكوماندالىق ەسەپتە ەكىنشى ورىنعا يە بولدى. بۇل سىندا جەرلەستەرىمىز 2 التىن, 3 كۇمىس جانە 4 قولا مەدال جەڭىپ الدى.
جارىستىڭ العاشقى كۇنىندە بوزكىلەمگە شىققان 55 كيلوعا دەيىنگى سالماقتا ۇلتتىق قۇرامانىڭ 3 بالۋانى تۇعىر بيىگىنە كوتەرىلىپ, جانكۇيەرلەردىڭ قوشەمەتىنە بولەندى. امانعالي بەكبولاتوۆ پەن مارلان مۇقاشەۆ اراسىندا وربىگەن فينالدىق باسەكەدە العاشقىسىنىڭ مەرەيى ۇستەم بولىپ, جارىس جەڭىمپازى اتاندى. ال تاعى ءبىر وتانداسىمىز يسحار قۇرباەۆ قولا مەدال ءۇشىن تالاستا 2019 جىلعى الەم چەمپيونى گرۋزيالىق نۋگزاري تسۋرتسۋميانى 7:3 ەسەبىمەن جەڭدى. كۇمىس جۇلدەگەر اتانعان مارلان العاشقى اينالىمدا ءدال وسى نۋگزاريدى ۇتقان. ايتا كەتەيىك, مارلان – جۋىردا الماتىدا وتكەن كۇرەستەن ەل سپارتاكياداسىنىڭ جەڭىمپازى.
كوپ ۇزاماي بوزكىلەمگە شىققان 60 كيلوداعى وتانداسىمىز ەرنار فيداحمەتوۆ تە باس جۇلدە ءۇشىن بەلدەسۋگە مۇمكىندىك الدى. وكىنىشكە قاراي, بيىلعى سپارتاكيادانىڭ قولا جۇلدەگەرى فينالدا تۇركيالىق كەرەم كامالدىڭ وسال تۇسىن تابا الماي, كۇمىس مەدالدى قاناعات تۇتتى. ال 63 كيلوداعى سپارتاكيادانىڭ جەڭىمپازى مۇحاممەدالى مامىربەك مىسىردا ءوز مىقتىلىعىن دالەلدەي المادى. ول قولا جۇلدە ءۇشىن كۇرەستە داستان زارلىحانوۆتان جەڭىلىپ قالدى. ال سپارتاكيادادا جۇلدەگە ىلىگە الماعان داستان حالىقارالىق جارىستىڭ قولا مەدالىن موينىندا جارقىراتتى.
67 كيلودا بەلدەسكەن مەرەي بەكەنوۆ ءوز سالماعىندا قارسىلاس شاق كەلتىرمەي, قازاقستان قۇراماسىنىڭ قورجىنىنا ەكىنشى التىن جۇلدەنى سالدى. شەشۋشى ايقاستا ول گرۋزيالىق دجوني حەتسۋريانيدى ۇتتى. مەرەي سپارتاكيادانىڭ فينالىندا قازاقستاننىڭ داڭقتى بالۋانى المات كەبىسپاەۆقا ەسە جىبەرگەن ەدى. اسا اۋىر سالماقتاعى ەل چەمپيونى ءالىمحان سىزدىقوۆ قىرعىزستاندىق رومان كيمدى جەڭىپ, قولا جۇلدەنى قانجىعاسىنا بايلادى.
ەكىنشى جارىس كۇنىندە بالۋاندار تاعى 3 سالماقتاعى كىم مىقتىنى انىقتادى. بۇل كۇنگى بەلدەسۋلەردە دە قازاقستان بالۋاندارى ورەلى ونەرىمەن كوزگە ءتۇسىپ, ەكى سالماق دارەجەسىندە جۇلدەگەرلەر قاتارىنان كورىندى. اۋەلى 72 كيلودا بەلدەسكەن دانيار قالەنوۆ قولا مەدال ءۇشىن كەزدەسۋدە مىسىرلىق ماحمۇد حالەد ابدەلساتار ابدەلراحماندى 4:1 ەسەبىمەن ۇتىپ, ءۇشىنشى ورىنعا تابان تىرەسە, 77 كيلوداعى تاجىريبەلى وتانداسىمىز دەمەۋ جادىراەۆ فينالعا دەيىن ىركىلمەي جەتكەنىمەن, شەشۋشى كەزدەسۋدە وسالدىق تانىتىپ, بولگاريالىق ايك مناتساكانيانعا ەسە جىبەردى.
ءسويتىپ, سەرىك جۇماشەۆ باپتايتىن قازاقستان قۇراماسىنىڭ گرەك-ريم كۇرەسى وكىلدەرى 2 التىن, 3 كۇمىس پەن 4 قولا مەدال ولجالاپ, جالپىكوماندالىق ەسەپتە 161 ۇپايمەن 2-ورىنعا تۇراقتادى. كوش باسىنداعى گرۋزيا قۇراماسىنىڭ ەنشىسىندە 166 ۇپاي بار.
بىلتىر قاراشادا الەكساندريا قالاسىندا وتكەن ءدال وسى تۋرنيرگە گرەك-ريم كۇرەسىنەن ۇلتتىق قۇراما وكىلدەرى العاش رەت قاتىسىپ, جالپى ەسەپتە 1-ورىنعا يە بولعان ەدى. ول كەزدە داستان زارلىحانوۆ (63 كگ), سۇلتان اسەت ۇلى (67 كگ), دەمەۋ جادىراەۆ (77 كگ), ميراس بارشىلىقوۆ (82 كگ), انتون ساۆەنكو (130 كگ) ءوز سالماعىندا چەمپيون اتانسا, مارلان مۇقاشەۆ (55 كگ), ەرنۇر فيداحمەتوۆ (60 كگ), ەراسىل نۇربوسىنوۆ (72 كگ), مانسۇر شادۋكاەۆ كۇمىس جۇلدەگە يە بولعان. بىلتىر بۇل رەيتينگتىك جارىس تىزىمىنە ەنبەگەن ەدى.
ايەلدەر مەن ەركىن كۇرەس شەبەرلەرىنىڭ ناتيجەسىن گازەتىمىزدىڭ ەرتەڭگى نومىرىنەن وقي الاسىزدار.