وتكەن سەنبى كۇنى قازاقستاندا كەزەكتى فۋتبول ماۋسىمىنىڭ شىمىلدىعى ءتۇرىلدى. جىلدىڭ العاشقى رەسمي ماتچىندا بىلتىرعى ەل چەمپيونى «استانا» مەن قازاقستان كۋبوگى باسەكەسىنىڭ جەڭىمپازى شىمكەنتتىڭ «ورداباسى» كلۋبتارى قازاقستان سۋپەركۋبوگىن ساراپقا سالدى.
«استانا ارەنا» ستاديونىندا وتكەن ەلىمىزدەگى ەڭ مىقتى ەكى ۇجىم اراسىنداعى كەزدەسۋدىڭ ءسوزسىز ءفاۆوريتى «استانا» كلۋبى ەدى. ويتكەنى ولار بىرىنشىدەن ءوز الاڭىندا, ەكىنشىدەن جەرگىلىكتى جانكۇيەرلەردىڭ قىزۋ قولداۋى استىندا وينادى. دەسە دە, كوپشىلىك جۇرت ماۋسىمارالىق ۇزىلىستە قۇرامىن تۇگەلدەي جاڭارتىپ, قاتارىن ۇلتتىق قۇراما ساپىندا ونەر كورسەتەتىن مىقتى فۋتبولشىلارمەن تولىقتىرعان «ورداباسى» كلۋبىنان دا ەرەكشە ويىن كۇتتى. شىمكەنتتىك ۇجىمدا بيىلدان باستاپ قازاقستان ۇلتتىق قۇراماسى مەن بۇرىنعى «توبىلدىڭ» جارتىلاي قورعاۋشىسى اسحات تاعىبەرگەن, سونداي-اق ەلىمىزدىڭ باس قۇراماسىندا وينايتىن قورعاۋشىلار تەمىرلان ەرلانوۆ پەن سەرگەي مالىي, قاقپاشى مۇحامەدجان سەيسەن, شابۋىلشى ايبار جاقسىلىقوۆ جانە تاعى باسقا فۋتبولشىلار دوپ تەبەدى.
گريگوري بابايان جاتتىقتىراتىن «استانا» كلۋبى دا ترانسفەر كەزەڭىندە قاراپ قالعان جوق. ماسەلەن, ەلىمىزدىڭ جەتى دۇركىن چەمپيوندارى ءوز قاتارىنا سەربيالىق جارتىلاي قورعاۋشى دۋشان ءيوۆانچيچتى, چەرنوگوريالىق قورعاۋشى جاركو توماشەۆيچتى, گامبيالىق شابۋىلشى دەمبو داربوەنى, حورۆاتيالىق قاقپاشى يوسيپ ءچوندريچتى جانە فرانتسيالىق جارتىلاي قورعاۋشى فابەن ۋرەگاندى قوسىپ الدى.
ءسويتىپ, قازاقستان سۋپەركۋبوگى اياسىندا توقسان مينۋتقا جالعاسقان تارتىستى ماتچتا «استانا» كلۋبىنىڭ مەرەيى ۇستەم بولىپ, التىنشى مارتە التىن كۋبوگتى جەڭىپ الدى. ەلوردالىق ۇجىم بۇعان دەيىن 10 مارتە فينالدا ويناپ, سونىڭ تەك بەسەۋىندە عانا جەڭىس تويىن تويلاعان بولاتىن. مىنە, بيىل التىنشى مارتە جاڭا ماۋسىمدى جەڭىسپەن باستاپ وتىر. «ورداباسى» كلۋبىنا كەلەر بولساق, وڭتۇستىكتەن كەلگەن كوماندا بيىل ءوز تاريحىندا ەكىنشى رەت سۋپەركۋبوكتىڭ فينالىنا شىقتى. العاش رەت ولار 2012 جىلعى فينالدا ويناپ, سول جىلى-اق كۋبوكتى باسىنان اسىرا كوتەرگەن ەدى.
جەتى مىڭنان اسا جانكۇيەر تاماشالاعان بيىلعى «استانا» مەن «ورداباسى» اراسىنداعى ماتچتا الاڭ يەلەرى ايقىن باسىمدىقپەن جەڭىسكە جەتتى دەپ ايتا المايمىز. تەڭ دارەجەدە وتكەن ويىن تاعدىرىن 11 مەترلىك ايىپ دوبى شەشىپ كەتتى. كەزدەسۋدىڭ ەسەبىن 8-مينۋتتا «استانانىڭ» جاڭا ويىنشىسى الەكسا امانوۆيچ اشتى. قورعاۋشىنىڭ الىستان باعىتتاعان جويقىن سوققىسىمەن سالعان ادەمى گولىنا جەرگىلىكتى جانكۇيەرلەر قۋانىپ بولامىن دەگەنشە «ورداباسىعا» قايتا ورالعان ەركەبۇلان تۇڭعىشباەۆ كوماندالاسى اسحات تاعىبەرگەننىڭ پاسىنان كەيىن باسپەن گول سوعىپ, ءبىر مينۋتتىڭ ىشىندە تارازى باسىن تەڭەستىرىپ كەتتى – 1:1. كەيىننەن ماتچ ءبىراز سايابىرسىپ قالعانداي بولدى. ءبىرىنشى تايم اياقتالار تۇستا قوناقتاردىڭ ويىنشىسى شوحبوز ۋماروۆ ەلوردالىق شابۋىلشى دەمبو داربوعا قارسى ويىن ەرەجەسىن بۇزىپ, تورەشى «ورداباسى» قاقپاسىنا پەنالتي بەلگىلەدى. 11 مەترلىك نۇكتەدە ءمۇلت كەتپەگەن داربو ءوزىنىڭ دەبيۋتتىك كەزدەسۋىندە گول سوعىپ, كومانداسىن جەڭىسكە جەتەلەدى. ويىننىڭ ەكىنشى كەزەڭىندە قوس كوماندا ەسەپتى وزگەرتۋگە تىرىسقانىمەن, گول سوعا المادى. قورىتىندى ەسەپ – 2:1. وسىلايشا, «استانا» ءوز تاريحىندا التىنشى رەت قازاقستان سۋپەركۋبوگىنىڭ جەڭىمپازى اتاندى.
ەندى كوماندالار كەلەسى اپتادا باستالاتىن فۋتبولدان قازاقستان چەمپيوناتىنىڭ ماتچتارىنا دايىندالادى. 4-5 ناۋرىز كۇندەرىنە جوسپارلانعان ەل بىرىنشىلىگىنىڭ 1-تۋر ويىندارىندا «استانا» ءوز الاڭىندا قاراعاندىنىڭ «شاحتەرىن» قابىلداسا, «ورداباسى» شىمكەنتتە اقتاۋدىڭ «كاسپيىمەن» كەزدەسەدى. سونداي-اق بۇل تۋردا «جەتىسۋ» – «اقتوبە», «توبىل» – «اقسۋ», «قايسار» – «قىزىلجار», «وقجەتپەس» – «ماقتاارال» جانە «قايرات» – «اتىراۋ» كوماندالارى وينايدى.