استانا. 21 ماۋسىم. بۇگىن تاڭ الدىندا برازيليادا ءوتىپ جاتقان فۋتبولدان الەم چەمپيوناتىندا ەكۆادور كومانداسى گوندۋراس قۇراماسىن 2:1 ەتىپ تىزە بۇكتىردى. بۇل تۋرالى egemen.kz حابارلادى.
گوندۋراس – ەكۆادور 1:2 (1:1).
21 ماۋسىم. كۋريتيبا. «ارەنا بايشادا» ستاديونى. 39 224 كورەرمەن. تورەشى - بەندجامين ۋيليامس (اۆستراليا).
گوندۋراس: نوەل ۆاليادارەس, برايان بەكەلەس, ۆيكتور بەرناردەس, مەينور فيگەروا, ەميليو يساگيررە (حۋان كارلوس گارسيا, 46), بونەك گارسيا (مارۆين چاۆەس, 83), لۋيس گارريدو (ماريو مارتينەس, 71), حورحە كلاروس, روحەر ەسپينوسا, دجەرري بەنگتسون, كارلو كوستلي.
ەكۆادور: الەكساندەر دومينگەس, حۋان كارلوس پارەدەس, حورحە گۋاگۋا, فريكسون ايوۆي, انتونيو ۆالەنسيا, وسۆالدو ميندا (كارلوس گرۋەسو, 83), كريستيان نوبوا, دجەففەرسون مونتەرو (گابريەل اسيلەر, 90+1), فەليپە كايسەدو (ەديسون مەندەس, 82), ەننەر ۆالەنسيا.
گولدار: كارلو كوستلي (31), ەننەر ۆالەنسيا (34, 65).
ەسكەرتۋلەر: ۆيكتور بەرناردەس (7), دجەرري بەنگتسون (45+3) – انتونيو ۆالەنسيا (57), ەننەر ۆالەنسيا (73), دجەففەرسون مونتەرو (80).
ءبىرىنشى تۋردا گوندۋراس فرانتسيادان تالاسسىز جەڭىلسە (0:3), ەكۆادوردىڭ شۆەيتساريادان ۇتىلۋى (1:2) وكىنىشتىرەك بولدى. ال وسى ەكى جاساقتىڭ بۇل جولعى ءوزارا كەزدەسۋى ايتارلىقتاي جاقسى شىقتى. مۇندا گوندۋراستىقتار ۇتىلىپ قالعانىنا قاراماستان, ماتچتىڭ سوڭىنا دەيىن قارسىلاستارىمەن قاسارىسىپ باقسا, ەكۆادورلىقتار العاشقى ۇتىستارى ارقىلى ءۇش ۇپايعا يە بولىپ, توپتان كەلەسى كەزەڭگە شىعۋ جونىندەگى ۇمىتتەرىنىڭ قولامتاسىن قايتا قوزدىرىپ قويدى.
دەگەنمەن, ەكۆادور كومانداسى ءۇشىن بۇل جەڭىس ۇلكەن تارتىسپەن كەلدى. سول تارتىستى 31-مينۋتتا ەسەپ اشقان گوندۋراستىق كارلو كوستلي باستاپ بەردى. ال ارادا ءۇش مينۋت وتكەندە تارازى باسى قايتا تەڭەستى. ونى ەننەر ۆالەنسيا جاسادى. ايتا كەتۋ كەرەك, وسى ماتچتا ەكۆادورلىق بۇل فۋتبولشى كومانداسىنىڭ ەكىنشى گولىن دا سوعىپ, ورتاق جەڭىستى قامتاماسىز ەتۋمەن بىرگە, تۋرنيردە دۋبل جاساعانداردىڭ قاتارىنا قوسىلدى.
الايدا, وعان دەيىن ءالى ءبىراز ۋاقىت بار ەدى. وڭتۇستىك امەريكا فۋتبولشىلارى وسى گولدان كەيىن دە ءبىراز جورتۋىلدارعا شىقتى. ولار سونىڭ بارىسىندا بىرنەشە قاۋىپتى ايىپ سوققىلارىن دا جاسادى. سولاردىڭ ءبىرى 43-مينۋتتا قاقپادان ءسال عانا قيىس كەتتى. ال تايم سوڭىنا قوسىلعان ۋاقىتتا گوندۋراستىقتار گول سوعىپ كەتە جازدادى. اۋەلى ۆيكتور بەرناردەس قاتتى سوققىسىمەن گولكيپەردىڭ اپشىسىن قۋىرسا, ارتىنان كارلوس كوستلي باسىمەن ۇرعان دوبىن ماڭدايشاعا تيگىزدى. ال ونى قايتا ۇرىپ تورعا اتتاندىرماق بولعان دجەرري بەنگتسون تورەشىنىڭ پايىمىنشا قولىمەن ويناپ قويعان. سوسىن اربيترمەن ءسوز تالاستىرعان ويىنشى «سارى قاعاز» الىپ تىندى.
ەكىنشى تايمنىڭ باسىندا ەكۆادور قارقىندى اتتىرۋعا تىرىستى. الايدا, قاقپاعا ناقتى قاۋىپ توندىرۋگە جەتە قويمادى. تەك 58-مينۋتتا عانا ولار سونداي مۇمكىندىك الدى. بۇل ۋاقىتتاردا لۋيس فەرناندو سۋارەستىڭ شاكىرتتەرى قارسىلاستارىنان تومەن وينادى دەپ تە ايتۋعا بولمايدى. بىراق ەكۆادوردىڭ جەكەلەگەن فۋتبولشىلارىنىڭ شەبەرلىكتەرى باسىمدىلىقتارى بايقالىپ تۇردى. سول ارتىقشىلىق اقىرى جەڭىس دوبىن دا سوقتىردى. ول 65-مينۋتتا گوندۋراس قاقپاسىنان ءبىر-اق شىقتى.
دامير قوجامقۇل.
دەرەككوز: چەمپيونات.رۋ.
فوتو: Sportbox.ru.